ଭଞ୍ଜନଗର,୯।୧୦(ବାବୁଲା ପ୍ରଧାନ): ଲୋକଙ୍କ ମଧ୍ୟରେ ସଚେତନତା ଅଭାବ ଯୋଗୁ ଭଞ୍ଜନଗର ବ୍ଲକ ଗୋହିରିବା ଗ୍ରାମବାସୀ ଦୈନନ୍ଦିନ ଲୋହରାଖଣ୍ଡି ନଦୀରୁ ପାଣି ଆଣି ରୋଷେଇ ଏବଂ ପାନୀୟଜଳ ରୂପେ ବ୍ୟବହାର କରୁଛନ୍ତି। ନଦୀ ତଟବର୍ତ୍ତୀ ଅନେକ ଗ୍ରାମରେ ଏହିଭଳି ସମସ୍ୟା ଦେଖିବାକୁ ମିଳିଛି। ଗୋହିରିବା ଗ୍ରାମରେ ଏକାଧିକ ଷ୍ଟାଣ୍ଡ ପୋଷ୍ଟ ସହ ହ୍ୟାଣ୍ଡ ଟ୍ୟୁବଲ ଅଛି। କିନ୍ତୁ ଗ୍ରାମବାସୀ ଉକ୍ତ ପାଣି କ୍ଷାରି ଲାଗୁଛି କହି ବ୍ୟବହାର କରୁନାହାନ୍ତି। ଗ୍ରାମବାସୀଙ୍କୁ ନଦୀପାଣି ବଦଳରେ ପାଇପ ପାଣି ବ୍ୟବହାର କରିବା ପାଇଁ ବିଭିନ୍ନ ସମୟରେ ଗ୍ରାମ୍ୟ ପାଇପ ଜଳଯୋଗାଣ ବିଭାଗ ପକ୍ଷରୁ ସଚେତନ କରାଯାଉଛି। କିନ୍ତୁ ଗ୍ରାମବାସୀ ନଦୀରୁ ହିଁ ପାଣି ଉଠାଇ ପାଇପ ମାଧ୍ୟମରେ ଦେବା ପାଇଁ କହୁଛନ୍ତି। ଏଥିସହ ଘରକୁ ଘର ପାଇପ ଯୋଗେ ପାଣି ଦେବାକୁ ଗ୍ରାମବାସୀ ନିବେଦନ କରିଛନ୍ତି। ଗ୍ରାମବାସୀ ଦୈନନ୍ଦିନ ନଦୀକୁ ସ୍ନାନ କରିବାକୁ ଯାଉଛନ୍ତି। ଫେରିବା ସମୟରେ ନଦୀରେ ଚୁଆ ଖୋଳି ପାଣି ଆଣୁଛନ୍ତି। ଏ ନେଇ ଗ୍ରାମ୍ୟ ପାଇପ ଜଳଯୋଗାଣ ବିଭାଗ ସହକାରୀ ଯନ୍ତ୍ରୀ ନୀହାର ରଞ୍ଜନ ସ୍ବାଇଁଙ୍କୁ ପଚାରିବାରୁ ସେ କହିଛନ୍ତି ଯେ ନଦୀପାଣି ବଦଳରେ ପାଇପ ପାଣି ବ୍ୟବହାର କରିବା ପାଇଁ ଗ୍ରାମବାସୀଙ୍କୁ ବାରମ୍ବାର ପରାମର୍ଶ ଦିଆଯାଇଛି। କିନ୍ତୁ ଗ୍ରାମବାସୀ ନଦୀରୁ ହିଁ ପାଣି ନେଇ ବ୍ୟବହାର କରୁଛନ୍ତି। ମେଗା ପାନୀୟଜଳ ପ୍ରକଳ୍ପ ମାଧ୍ୟମରେ ଉକ୍ତ ଗ୍ରାମର ସମସ୍ତ ଘରକୁ ଆଗାମୀ ଦିନରେ ପାଇପ ଯୋଗେ ପାଣି ଯୋଗାଇ ଦିଆଯିବ ବୋଲି ସେ କହିଛନ୍ତି।
