ସଜନାଗଡ଼, ୨୭ା୪(ଡି.ଏନ.ଏ.) – ବାଲେଶ୍ୱର ଜିଲାରୁ ମୟୂରଭଞ୍ଜ ଜିଲାକୁ ସଂଯୋଗ କରୁଥିବା ୧୯ନଂ. ରାଜ୍ୟ ରାଜପଥ ନୀଳଗିରିରୁ ଝରଣଘାଟି ପର୍ଯ୍ୟନ୍ତ ରାସ୍ତାର କିଛି କିଛି ସ୍ଥାନରେ ଅବସ୍ଥା ଶୋଚନୀୟ ହୋଇପଡ଼ିଛି। ବାରମ୍ବାର ବିଭାଗୀୟ ଅଧିକାରୀଙ୍କ ଦୃଷ୍ଟି ଆକର୍ଷଣ କରାଯାଇଥିଲେ ମଧ୍ୟ କୌଣସି ସୁଫଳ ମିଳିଲାନି। ଫେଲ୍ ମାରିଲା ପୂର୍ତ୍ତବିଭାଗ। ଶେଷରେ ରାଜ୍ୟ ରାଜପଥକୁ ପ୍ରାଖ ଗ୍ରାମବାସୀ ଓ ସରପଞ୍ଚ ମିଶି ମରାମତି କରିଛନ୍ତି। ପ୍ରତିଦିନ ଉକ୍ତ ରାସ୍ତାରେ ଶହ ଶହ ଭାରିଯାନ, ଯାତ୍ରୀବାହୀ ଯାନ, ଆମ୍ବୁଲାନ୍ସ, ସ୍କୁଲଗାଡ଼ି ଯାତାୟାତ କରିଥାନ୍ତି। ରାସ୍ତାର ବିଭିନ୍ନ ସ୍ଥାନରେ ପିଚୁ ଉଠିଯାଇ ଗାତ ହୋଇଯାଇଥିବା ବେଳେ ଏଥିରେ ପିଟି ହୋଇ ବାଇକ୍ ଓ ସାଇକେଲ ଆରୋହୀ ବାରମ୍ବାର ଦୁର୍ଘଟଣାର ସମ୍ମୁଖୀନ ହେଉଛନ୍ତି। ନୀଳଗିରି ପୂର୍ତ୍ତ ବିଭାଗ ପକ୍ଷରୁ କୌଣସି ପଦକ୍ଷେପ ନିଆଯାଉ ନ ଥିବା ବାରମ୍ବାର ଅଭିଯୋଗ ସତ୍ତ୍ୱେ କୌଣସି ପଦକ୍ଷେପ ଗ୍ରହଣ କରାଯାଇ ନ ଥିଲା। ଶେଷରେ ସଜନାଗଡ଼ ପଞ୍ଚାୟତ ଭାଲୁକାଶୁଣୀ ଗ୍ରାମର କେତେଜଣ ବାସିନ୍ଦା ଓ ନବନିର୍ବାଚିତ ସରପଞ୍ଚ ପ୍ରଦୀପ କୁମାର ଖାଲପାଳିଆ ରାଜ୍ୟ ରାଜପଥର ଭାଲୁକାଶୁଣି ଛକଠାରେ ବିଭିନ୍ନ ସ୍ଥାନରେ ମାଟି ଗୋଡ଼ି ପକାଇ ମରାମତି କରିଛନ୍ତି। ଯୁବ ସରପଞ୍ଚଙ୍କ ଏଭଳି ପଦକ୍ଷେପକୁ ସାଧାରଣରେ ପ୍ରଶଂସା କରାଯାଇଛି।
