ମହାରାଷ୍ଟ୍ରର ସତାରାର ଏକ ଭିଡିଓ ଆଜିକାଲି ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏହି ଭିଡିଓରେ ଜଣେ ୮୦ ବର୍ଷୀୟ ବୃଦ୍ଧ ପ୍ରତିଦିନ ୨୫୦ ଗ୍ରାମ ପଥର ଖାଉଥିବା ଦେଖାଯାଇଛି। ଆଜିକୁ ପ୍ରାୟ ୩୦ ବର୍ଷ ହେବ ସେ ପଥର ଖାଉଥିବା ଜଣାପଡିଛି। ରାମଭାଉ ବୋଡକେ ନାମକ ଏହି ବୃଦ୍ଧ ଜଣଙ୍କୁ ସ୍ଥାନୀୟ ଗ୍ରାମବାସୀ ‘ପଥର ଭାଲେ ବାବା’ ନାମରେ ଡାକନ୍ତି। ଏକ ସାକ୍ଷାତକାରରେ ରାମଭାଉ କହିଛନ୍ତି ୧୯୮୯ରେ ମୁମ୍ବାଇରେ ଶ୍ରମିକ ଭାବେ କାର୍ଯ୍ୟ କରୁଥିଲେ। ହଠାତ୍ ପେଟ ଯନ୍ତ୍ରଣା ହେବାରୁ ୩ ବର୍ଷ ପର୍ଯ୍ୟନ୍ତ ଚିକତ୍ସିତ ହୋଇଥିଲେ। ଏହାସତ୍ତ୍ୱେ ଯନ୍ତ୍ରଣା ନ କମିବାରୁ ସତାରା ଆସି ଚାଷ କାର୍ଯ୍ୟ ଆରମ୍ଭ କଲେ। ଦିନେ ବିଲରେ ଚାଷ କରୁଥିବାବେଳେ ଗାଁର ଜଣେ ବୃଦ୍ଧା ତାଙ୍କୁ ପଥର ଖାଇବାର ଉପାୟ କହିଥିଲେ। ଏହାପରେ ସେ ପଥର ଖାଇବା ଆରମ୍ଭ କରିଥିଲେ। ପଥର ଖାଇବା କ୍ଷଣି ତାଙ୍କ ପେଟ ଯନ୍ତ୍ରଣାରୁ ଉପଶମ ମିଳିଥିଲା। ସେବେଠୁ ସେ ପ୍ରତିଦିନ ପଥର ଖାଇବା ଆରମ୍ଭ କରିଥିଲେ। ଏବେ ତାଙ୍କୁ ପଥର ଖାଇବାକୁ ମଜା ଲାଗୁଥିବା କହନ୍ତି ରାମଭାଉ। ଏପରିକି ତାଙ୍କ ପର୍ସରେ ମଧ୍ୟ ଛୋଟ ଛୋଟ ପଥର ଖଣ୍ଡ ଦେଖିବାକୁ ମିଳେ। ଯେତେବେଳେ ମନ ହୁଏ ସେ ପର୍ସରୁ ପଥର ବାହାର କରି ଖାଆନ୍ତି। ଏହି ନିଆରା ମଣିଷଙ୍କୁ ଦେଖିବାକୁ ଲୋକଙ୍କ ଭିଡ ଜମେ। ନିକଟରେ ରାମଭାଉଙ୍କ ପେଟ ସମସ୍ୟା ଦେଖାଦେବାରୁ ସେ ହସ୍ପିଟାଲରେ ଭର୍ତ୍ତି ହୋଇଥିଲେ। ଡାକ୍ତର ତାଙ୍କ ଏଭଳି ଅଭ୍ୟାସ ବିଷୟରେ ଜାଣି ଆଶ୍ଚର୍ଯ୍ୟ ହୋଇଯାଇଥିଲେ।
