ରୂପସା, ୩୧।୧୦(ଡି.ଏନ.ଏ.): ବାଲେଶ୍ୱର ୬୦ ନଂ. ଜାତୀୟ ରାଜପଥର ବସ୍ତା ଥାନା ଅଧୀନ ନଳବାହାର ଛକ ନିକଟରେ ପୋଲିସ ସୋମବାର ଚଢାଉ କରି ୨ଟି ଗୋରୁ ବୋଝେଇ ଭ୍ୟାନ୍ ଜବତ କରିଛି। ଏଥିସହ ୩ ବ୍ୟବସାୟୀଙ୍କୁ ପୋଲିସ ଗିରଫ କରିଛି। ଗିରଫ ଅଭିଯୁକ୍ତ ହେଲେ ଜଗତସିଂହପୁର ଥାନା ଉହଳା ଅଞ୍ଚଳର ଦୁଇ ଭାଇ ମିର୍ଜା ଜାବିଦ ବେଗ ଓ ମିର୍ଜା ଜୁବେର ବେଗ, ରମ୍ଭାଦେଇପୁର ଗ୍ରାମର ଅଭିଜିତ ଜେନା। ଏ ସଂକ୍ରାନ୍ତରେ ଥାନାରେ ଏକ ମାମଲା (ନଂ. ୨୭୬/୨୨) ରୁଜୁ ହୋଇ ଗିରଫ ଅଭିଯୁକ୍ତଙ୍କୁ କୋର୍ଟଚାଲାଣ କରାଯାଇଛି। ରାଜପଥ ଦେଇ ଭ୍ୟାନ(ନଂ. ଓଡ଼ି୦୫ବିଏଫ୍-୧୨୯୧ ଓ ଓଡ଼ି୦୫ବିଏଫ୍-୧୯୦୫) ଯୋଗେ ୬ଟି ଗୋରୁ ବୋଝେଇ ହୋଇ ବେଆଇନ ଭାବେ ପଶ୍ଚିମବଙ୍ଗକୁ ଚୋରାଚାଲାଣ ହେଉଥିଲା। ଖବରପାଇ ଆଇଆଇସି ବାରିଣୀ ଦାସଙ୍କ ନେତୃତ୍ୱରେ ଏଏସ୍ଆଇ କମଳାକାନ୍ତ ନାୟକ ସଦଳବଳେ ଚଢ଼ାଉ କରି ସବୁ ଗୋରୁକୁ ଉଦ୍ଧାର କରିବା ସହ ଅଭିଯୁକ୍ତଙ୍କୁ ଗିରଫ କରିବାରେ ସମର୍ଥ ହୋଇଥିଲେ। ଉଦ୍ଧାର ଗୋରୁକୁ ରେମୁଣାସ୍ଥିତ ଗୋଶାଳାରେ ଛଡ଼ାଯାଇଛି।
