କାନପୁର/ଲକ୍ଷ୍ନୌ,୭ା୭(ପି.ଟି.): ଅଗଷ୍ଟ ୧୫ ସୁଦ୍ଧା କୋଭିଡ୍ ଟିକା ଶୁଭାରମ୍ଭ କରିବା ପାଇଁ ଭାରତୀୟ ଭେଷଜ ଗବେଷଣା ପରିଷଦ (ଆଇସିଏମ୍ଆର୍) ଲକ୍ଷ୍ୟ ଧାର୍ଯ୍ୟ କରିଥିବାବେଳେ ଏହା ଅବାସ୍ତବ ଓ ସମ୍ଭବ ନୁହେଁ ବୋଲି ଇଣ୍ଡିଆନ୍ ଏକାଡେମୀ ଅଫ୍ ସାଇନ୍ସ (ଆଇଏଏସ୍ସି) ପକ୍ଷରୁ କୁହାଯାଇଛି। କରୋନା ମହାମାରୀ ଭାରତ ସମେତ ସାରା ବିଶ୍ୱରେ ମାଡ଼ିଚାଲିଥିବାବେଳେ ଏହାକୁ ରୋକିବା ପାଇଁ ଟିକାର ଜରୁରୀ ଆବଶ୍ୟକତା ରହିଛି। ତେବେ ମାନବ ବ୍ୟବହାର ପାଇଁ ପ୍ରସ୍ତୁତ ହେବାକୁ ଥିବା ଟିକା ବୈଜ୍ଞାନିକ ପଦ୍ଧତିରେ ବିଭିନ୍ନ ପର୍ଯ୍ୟାୟ କ୍ଲିନିକାଲ ପରୀକ୍ଷା ଦେଇ ବିକଶିତ କରାଯିବ। ଏଥିପାଇଁ ସମୟ ଲାଗିବ ବୋଲି ଆଇଏଏସ୍ସି କହିଛି। ପ୍ରଶାସନିକ ମଞ୍ଜୁରୀକୁ ତ୍ୱରାନ୍ବିତ କରାଯାଇପାରେ, କିନ୍ତୁ ବୈଜ୍ଞାନିକ ଅନୁଧ୍ୟାନ ପ୍ରକ୍ରିୟା ଓ ତଥ୍ୟ ସଂଗ୍ରହ ପାଇଁ ସ୍ବାଭାବିକ ସମୟ ବ୍ୟବଧାନ ଆବଶ୍ୟକ, ଯାହାକୁ କମାଇ ହେବନାହିଁ। ଦେଶର ପ୍ରଥମ କୋଭିଡ୍ ଟିକା କୋଭାକ୍ସିନ୍କୁ ଆଇସିଏମ୍ଆର ଏବଂ ଘରୋଇ ଔଷଧ କମ୍ପାନୀ ଭାରତ ବାୟୋଟେକ୍ ଇଣ୍ଡିଆ ଲିମିଟେଡ୍ ମିଳିତ ଭାବେ ପ୍ରସ୍ତୁତ କରୁଛନ୍ତି। ଏହାକୁ ଆଇଏଏସ୍ସି ପକ୍ଷରୁ ସ୍ବାଗତ କରାଯିବା ସହ ଯଥାଶୀଘ୍ର ସର୍ବସାଧାରଣଙ୍କ ବ୍ୟବହାର ଲାଗି ଉପଲବ୍ଧ ହେବାକୁ ଆଶା ରଖିଛି। ତେବେ ଏଥିପାଇଁ ସମୟସୀମା ଧାର୍ଯ୍ୟ ହେବା ସମୀଚୀନ ନୁହେଁ। ସମୟସୀମା ଧାର୍ଯ୍ୟ ହେବା ଦ୍ୱାରା ଏହା ଜନସାଧାରଣଙ୍କ ମଧ୍ୟରେ ଅହେତୁକ ଆଶା ଆକାଂକ୍ଷା ସୃଷ୍ଟି କରିବ। ଭାକ୍ସିନ୍ ପ୍ରସ୍ତୁତି ପାଇଁ ବିଶ୍ୱ ସ୍ତରରେ ଗ୍ରହଣୀୟ ନିୟମାବଳୀକୁ ପାଳନ କରିବାକୁ ପଡ଼ିବ ବୋଲି ବୈଜ୍ଞାନିକମାନଙ୍କର ଏହି ସଂଗଠନ ପକ୍ଷରୁ କୁହାଯାଇଛି।
