ନୂଆଦିଲ୍ଲୀ, ୧୩।୨ : ଉତ୍ତରପ୍ରଦେଶର ଦ୍ୱିତୀୟ ପର୍ଯ୍ୟାୟ ବିଧାନସଭା ନିର୍ବାଚନ ପାଇଁ ଫେବୃୟାରୀ ୧୪ରେ ମତଦାନ ହେବାକୁ ଯାଉଛି। ୯ ଜିଲାର ୫୫ ଆସନରେ ଭୋଟିଂ ହେବ। ଏହି ପର୍ଯ୍ୟାୟରେ ମୋଟ ୫୮୬ ଜଣ ପ୍ରାର୍ଥୀ ନିର୍ବାଚନ ଲଢୁଛନ୍ତି। ମୁଖ୍ୟ ପ୍ରତିଦ୍ୱନ୍ଦ୍ୱିତା ହେଉଛି ଭାଜପା, ଏସ୍ପି,ଆରଏଲଡି ମିଳିତ ମଞ୍ଚ, ବିଏସ୍ପି ଏବଂ କଂଗ୍ରେସ ମଧ୍ୟରେ ହେବ। ୯ଜିଲା ମଧ୍ୟରେ ୭ ଜିଲାରେ ମୁସଲମାନ୍ ଭୋଟରଙ୍କ ସଂଖ୍ୟା ଅଧିକ ରହିଛି।
୨୦୧୭ରେ ଏସବୁ ଆସନ ମଧ୍ୟରୁ ଭାଜପା ଖାତାକୁ ୩୮ ଆସନ ଯାଇଥିଲା। ତେବେ ଚଳିତଥର ସ୍ଥିତିରେ ପରିବର୍ତ୍ତନ ଘଟିଥିବାରୁ ଆଶା ଏବଂ ଆଶଙ୍କା ମଧ୍ୟରେ ଭାଜପା ରହିଛି।
ଦ୍ୱିତୀୟ ପର୍ଯ୍ୟାୟରେ ଉତ୍ତରପ୍ରଦେଶର ସାହାରନପୁର, ରାମପୁର, ବିଜନୋର, ଆମରୋହା, ସମ୍ଭଲ, ମୋରାଦାବାଦ, ବରେଲି, ବଦାୟୁଂ ଏବଂ ଶାହାଜାହାନପୁରର ୫୫ ଟି ବିଧାନସଭା ଆସନରେ ନିର୍ବାଚନ ଅନୁଷ୍ଠିତ ହେବ।
ବରେଲି ଏବଂ ସାହାରନପୁରରେ ମୁସଲମାନ ଧାର୍ମିକ ନେତାମାନଙ୍କର ବହୁତ ପ୍ରଭାବ ରହିଛି।
ଏହି ଜିଲାଗୁଡ଼ିକର ବିଧାନସଭା ଆସନରେ ମୁସଲମାନ ଭୋଟରଙ୍କ ସଂଖ୍ୟା ଯଥେଷ୍ଟ ଅଧିକ ରହିଛି। ବିଶେଷକରି ୭ ଟି ଜିଲାରେ ଏଭଳି ସ୍ଥିତି ରହିଛି।
ସେଥିମଧ୍ୟରୁ ରାମପୁରରେ ୫୦.୫୭ ପ୍ରତିଶତ, ମୋରାଦାବାଦରେ ୫୦.୮୦ ପ୍ରତିଶତ, ଆମରୋହାରେ ୪୦.୭୮ ପ୍ରତିଶତ, ବିଜନୋରରେ ୪୩.୦୪ ପ୍ରତିଶତ, ବରେଲିରେ ୩୪.୫୪ ପ୍ରତିଶତ , ସମୱାଲରେ ୩୨.୮୮ ପ୍ରତିଶତ ଏବଂ ବଦାୟୁଂରେ ୨୩.୨୬ ପ୍ରତିଶତ ସୁମଲମାନ୍ ଭୋଟର ରହିଛନ୍ତି। ମୁସଲମାନମାନଙ୍କ ସହିତ ଜାଟ ଭୋଟରଙ୍କ ସଂଖ୍ୟା ମଧ୍ୟ ଅଧିକ ରହିଛି।
ତେଣୁ ଦ୍ୱିତୀୟ ପର୍ଯ୍ୟାୟରେ ପ୍ରଥମ ପର୍ଯ୍ୟାୟ ଅପେକ୍ଷା ଭାଜପା ପାଇଁ ଅଧିକ ଚ୍ୟାଲେଞ୍ଜିଂ ସୃଷ୍ଟି ହେବ ବୋଲି ବିବେଚନା କରାଯାଉଛି।
