ଲକ୍ଷ୍ନୌ,୨୩।୧୨: ଯଦି କିଛି କରିବାକୁ ମନରେ ଆଗ୍ରହ ଅଛି, ତେବେ ଦୁନିଆରେ କିଛି ଅସମ୍ଭବ ନୁହେଁ। ଉତ୍ତରପ୍ରଦେଶର ମିର୍ଜାପୁର ଜିଲାର ଏକ ଛୋଟ ଗାଁର ବାସିନ୍ଦା ସାନିଆ ମିର୍ଜା ମଧ୍ୟ ଏଭଳି କାର୍ଯ୍ୟ କରିଛନ୍ତି। ସାନିଆ ଏନଡିଏ ପରୀକ୍ଷାରେ ୧୪୯ତମ ର଼୍ୟାଙ୍କ୍ ପାଇ ଫ୍ଲାଇଙ୍ଗ ୱିଙ୍ଗରେ ଦ୍ୱିତୀୟ ସ୍ଥାନ ଅଧିକାର କରିଛନ୍ତି। ଫ୍ଲାଇଙ୍ଗ ୱିଙ୍ଗରେ କେବଳ ଦୁଇଟି ସିଟ ଅଛି। ଏନଡିଏରେ ମହିଳାମାନଙ୍କ ପାଇଁ କେବଳ ୧୯ଟି ପୋଷ୍ଟ ସଂରକ୍ଷିତ। ଏନଡିଏରୁ ପାସ କରିବା ପରେ ସାନିଆ ଦେଶର ପ୍ରଥମ ମୁସଲମାନ ମହିଳା ଭାବେ ଯୁଦ୍ଧ ବିମାନ ପାଇଲଟ ହେବେ ସାନିଆ।
ସାନିଆଙ୍କ ପିତା ଶହିଦ ଅଲି ମିର୍ଜାପୁରରେ ଜଣେ ଟିଭି ମେକାନିକ ଭାବେ କାର୍ଯ୍ୟ କରନ୍ତି। ସାନିଆ ପିଲାଦିନରୁ ଜଣେ ଇଞ୍ଜିନିୟର ହେବାକୁ ଚାହୁଁଥିଲେ। ମିର୍ଜାପୁର ଦେହାଟ କୋଟୱାଲି ପୋଲିସ ଷ୍ଟେଶନ ଅଧୀନରେ ଥିବା ଏକ ଛୋଟ ଗାଁ ଜାସୋଭାରର ବାସିନ୍ଦା ସାନିଆ ଗାଁର ପଣ୍ଡିତ ଚିନ୍ତାମଣି ଦୁବେ ଇଣ୍ଟର କଲେଜରୁ ପ୍ରାଥମିକରୁ ଦଶମ ପର୍ଯ୍ୟନ୍ତ ଶିକ୍ଷା ସମାପ୍ତ କରିଥିଲେ। ସେ ୟୁପି ବୋର୍ଡ ପରୀକ୍ଷାରେ ଜିଲା ଟପ୍ପର୍ ମଧ୍ୟ ରହିଥିଲେ। ଏହା ପରେ ସାନିଆ ସହରର ଗୁରୁ ନାନକ ବାଳିକା ଇଣ୍ଟର କଲେଜରୁ ଦ୍ୱାଦଶ ପାସ୍ କରିଥିଲେ।
ଗତ ୧୦ ଏପ୍ରିଲରେ ସାନିଆ ଏନଡିଏ ପରୀକ୍ଷା ଦେଇଥିଲେ। ନଭେମ୍ବରରେ ପ୍ରକାଶିତ ତାଲିକାରେ ତାଙ୍କୁ ଚୟନ କରାଯାଇଛି। ଫ୍ଲାଇଙ୍ଗ୍ରେ ମନୋନୀତ ହୋଇଥିବା ଦୁଇଜଣ ମହିଳାଙ୍କ ମଧ୍ୟରୁ ସେ ଜଣେ। ଡିସେମ୍ବର ୨୭ରେ ସାନିଆ ପୁଣେରେ ଏନଡିଏ ତାଲିମରେ ଯୋଗଦେବେ।
ସାନିଆ ମିର୍ଜା କହିଛନ୍ତି, ମୁଁ ଜଣେ ଇଞ୍ଜିନିୟର ହେବାକୁ ଚାହୁଁଛି। ଏକାଦଶ ଶ୍ରେଣୀରେ ଦେଶର ପ୍ରଥମ ମହିଳା ଯୁଦ୍ଧ ବିମାନ ପାଇଲଟ ଅବନୀ ଚତୁର୍ବେଦୀ ବିଷୟରେ ଜାଣିଥିଲି। ସେ ମୋର ପ୍ରେରଣା ଉତ୍ସ ହୋଇଗଲେ ଏବଂ ମୁଁ ଏନଡିଏରେ ଯୋଗଦେବାକୁ ସ୍ଥିର କଲି।
