ଶ୍ରୀନଗର,୪ା୧୧ : ଜମ୍ମୁ-କଶ୍ମୀର ବିଧାନସଭାର ପ୍ରଥମ ଅଧିବେଶନରେ ଅନୁଚ୍ଛେଦ ୩୭୦ ବିରୋଧରେ ପ୍ରସ୍ତାବକୁ ନେଇ ଉତ୍ତେଜନା ପ୍ରକାଶ ପାଇଥିଲା। ପିଡିପି ବିଧାୟକ ଓ୍ବାହିଦ ପାରା ସୋମବାର ବିଧାନସଭାରେ ୩୭୦ ଉଚ୍ଛେଦ ବିରୋଧରେ ପ୍ରସ୍ତାବ ଆଣିବା ସହ ତୁରନ୍ତ ଜମ୍ମୁ-କଶ୍ମୀରକୁ ସ୍ବତନ୍ତ୍ର ପାହ୍ୟା ପ୍ରଦାନ ପାଇଁ ଦାବି କରିଥିଲେ। ଏହାକୁ ନେଇ ଗୃହରେ ହଟ୍ଟଗୋଳ ସୃଷ୍ଟି ହୋଇଥିଲା। ନ୍ୟାଶନାଲ କନ୍ଫରେନ୍ସ (ଏନ୍ସି) ନେତା ତଥା ୭ ଥରର ବିଧାୟକ ଅବଦୁଲ ରହିମ୍ ରାଠେରଙ୍କୁ ଜମ୍ମୁ-କଶ୍ମୀର କେନ୍ଦ୍ରଶାସିତ ଅଞ୍ଚଳ ବିଧାନସଭାର ପ୍ରଥମ ବାଚସ୍ପତି ନିର୍ବାଚିତ କରାଯିବା ପରେ ପୁଲ୍ଓ୍ବାମା ବିଧାୟକ ଉପରୋକ୍ତ ପ୍ରସ୍ତାବ ଆଣିଥିଲେ। ଲୋକମାନଙ୍କ ଭାବାବେଗକୁ ଦୃଷ୍ଟିରେ ରଖି ଜମ୍ମୁ-କଶ୍ମୀରକୁ ସ୍ବତନ୍ତ୍ର ସୁବିଧା ପ୍ରଦାନ କରୁଥିବା ଅନୁଚ୍ଛେଦ ୩୭୦ର ଉଚ୍ଛେଦକୁ ଆମେ ବିରୋଧ କରୁଛୁ ବୋଲି ବିଧାୟକ କହିଥିଲେ। ଭାଜପାର ସମସ୍ତ ୨୮ ବିଧାୟକ ଛିଡ଼ାହୋଇ ଏହାର ପ୍ରତିବାଦ ଜଣାଇଥିଲେ। ବିଧାନସଭା ନିୟମର ଉଲ୍ଲଂଘନ କରି ପ୍ରସ୍ତାବ ଆଣିଥିବା ପାରାଙ୍କୁ ନିଲମ୍ବନ କରାଯାଉ ବୋଲି ଭାଜପା ବିଧାୟକ ଶାମ ଲାଲ୍ ଶର୍ମା ଦାବି କରିଥିଲେ। ବାରମ୍ବାର ଅନୁରୋଧ ସତ୍ତ୍ୱେ ହଟ୍ଟଗୋଳ କରୁଥିବା ସଦସ୍ୟମାନେ ସେମାନଙ୍କ ଆସନକୁ ଫେରିଯାଇ ନ ଥିଲେ। ଭାଜପା ସଦସ୍ୟମାନେ ଗୃହ କାର୍ଯ୍ୟରେ ବାଧା ସୃଷ୍ଟି କରୁଥିବା ନେଇ ଏନ୍ସି ବିଧାୟକ ସମାଲୋଚନା କରିଥିଲେ।
