ଭୁବନେଶ୍ୱର,୬।୧୧(ବ୍ୟୁରୋ): ଧାମନଗର ଉପନିର୍ବାଚନରେ ଭାଜପା ପ୍ରାର୍ଥୀ ସୂର୍ଯ୍ୟବଂଶୀ ସୂରଯ ବିଜୟୀ ହୋଇଛନ୍ତି। ଫଳାଫଳ ଘୋଷଣା ପରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ତାଙ୍କ ପ୍ରତିକ୍ରିୟାରେ ଏହା ଧାମନଗରବାସୀଙ୍କ ବିଜୟ ସହ ସ୍ବର୍ଗତ ବିଷ୍ଣୁ ସେଠୀଙ୍କ ପ୍ରତି ସେଠାକାର ଜନସାଧାରଣଙ୍କ ସ୍ନେହ ଏବଂ ଶ୍ରଦ୍ଧାର ବିଜୟ ବୋଲି କହିଛନ୍ତି। ଏହା ଗଣତନ୍ତ୍ର ଏବଂ ଓଡ଼ିଆ ସ୍ବାଭିମାନର ବିଜୟ। ଯେଉଁ ଭୂମିରେ ବାବା ଆଖଣ୍ଡଳମଣି ଅଛନ୍ତି, ଯେଉଁ ରାଜ୍ୟରେ ମହାପ୍ରଭୁ ଜଗନ୍ନାଥ ବିଦ୍ୟମାନ ସେଠାରେ ବହୁଦିନ ପର୍ଯ୍ୟନ୍ତ ଅନ୍ଧାର ରୁହେ ନାହିଁ। କେବେ ନା କେବେ ସତ୍ୟ ସାମ୍ନାକୁ ଆସେ। ଏ ସତ୍ୟ ସାମ୍ନାକୁ ଆସିଛି ବୋଲି କେନ୍ଦ୍ରମନ୍ତ୍ରୀ କହିଛନ୍ତି। ଭାଜପା ରାଜ୍ୟ ସଭାପତି ସମୀର ମହାନ୍ତି କହିଛନ୍ତି, ଯେଉଁମାନେ ନିଜକୁ ଅପରାଜେୟ ବୋଲି ଭାବୁଥିଲେ ତାହା ଭୁଲ୍ ପ୍ରମାଣିତ ହୋଇଛି। ଗଣତନ୍ତ୍ରରେ ଜୟ, ପରାଜୟ ରହିଛି। ସ୍ବାଭିମାନୀ ଧାମନଗରବାସୀ ତାହା ପ୍ରମାଣ କରି ଦେଖାଇଛନ୍ତି। ଏହା ସମସ୍ତଙ୍କ ପାଇଁ ଗଣତନ୍ତ୍ରର ବିଜୟ ବୋଲି ସମୀର କହିଛନ୍ତି।
