ଜେନେଭା, ୨୭।୮ : ୟୁନିସେଫ ଚେତାବନୀ ଦେଇଛି ଯେ ଶ୍ରୀଲଙ୍କା ଆର୍ଥିକ ସଙ୍କଟର ସମ୍ମୁଖୀନ ହେଉଛି। ଲୋକଙ୍କ ପାଇଁ ଅତ୍ୟାବଶ୍ୟକ ଖାଦ୍ୟ ସାମଗ୍ରୀ ଯୋଗାଡ଼ କରିବା କଷ୍ଟସାଧ୍ୟ ହୋଇପଡିଛି। ପୁଷ୍ଟିହୀନତା ଦେଶରେ ସର୍ବାଧିକସ୍ତରରେ ପହଞ୍ଚିଛି। ଗରିବ ଏବଂ ଛୋଟ ପିଲାମାନେ ଏହା ଦ୍ୱାରା ଅଧିକ କ୍ଷତିଗ୍ରସ୍ତ ହେଉଛନ୍ତି।
ଦକ୍ଷିଣ ଏସିଆ ପାଇଁ ୟୁନିସେଫର ଆଞ୍ଚଳିକ ନିର୍ଦ୍ଦେଶକ ଜର୍ଜ ଲାରିଆ ଅଦଜେଇ କହିଛନ୍ତି ଯେ ଖାଦ୍ୟ ନିରାପତ୍ତା ଦେଶର ସାମାଜିକ ସମସ୍ୟାକୁ ବଢ଼ଇ ଦେଇଛି। ଖାଦ୍ୟ ମହଙ୍ଗା ହୋଇଥିବାରୁ ପରିବାରମାନେ ନିୟମିତ ଭାବେ ଭୋଜନ ତ୍ୟାଗ କରୁୁଛନ୍ତି। ଶୁକ୍ରବାର ଏକ ବିବୃତ୍ତିରେ ୟୁନିସେଫ କହିଛି ଯେ ପିଲାମାନେ ଭୋକିଲା ଶୋଇବାକୁ ଯାଉଛନ୍ତି। ସେମାନଙ୍କର ପରବର୍ତ୍ତୀ ଭୋଜନ କେଉଁଠୁ ଆସିବ ସେନେଇ ସେମାନଙ୍କର ମାତାପିତା ମଧ୍ୟ ନିଶ୍ଚିତ ନୁହନ୍ତି ବୋଲି ୟୁନିସେଫପକ୍ଷରୁ କୁହାଯାଇଛି।
ଅଦଜେଇ କହିଛନ୍ତି, ଆର୍ଥିକ ସଙ୍କଟ ଦ୍ୱାରା ପ୍ରଭାବିତ ଶ୍ରୀଲଙ୍କା ପିଲାମାନଙ୍କୁ ସାହାଯ୍ୟ କରିବା ପାଇଁ ଅଧିକ ପଦକ୍ଷେପ ଗ୍ରହଣ କରାଯିବା ଉଚିତ। ଯେପର୍ଯ୍ୟନ୍ତ ଦେଶ ଏହି ସଙ୍କଟର ସମାଧାନ ପାଇଁ କାର୍ଯ୍ୟ କରୁଛି ସେ ପର୍ଯ୍ୟନ୍ତ ଶିଶୁମାନଙ୍କୁ ଶିଶୁ କେନ୍ଦ୍ରରେ ରଖିବାକୁ ପଡ଼ିବ। ଖାଦ୍ୟର ଅଭାବ ଦେଶରେ ପୁଷ୍ଟିହୀନତା, ଦାରିଦ୍ର୍ୟ, ରୋଗ ଏବଂ ମୃତ୍ୟୁ ସଂଖ୍ୟା ବଢ଼ାଇ ଦେଇଛି।
ଆର୍ଥିକ ସଙ୍କଟ ଶିକ୍ଷା କ୍ଷେତ୍ର ଉପରେ ମଧ୍ୟ ପ୍ରଭାବ ପକାଇଛି। ଛାତ୍ରୀଛାତ୍ରଙ୍କ ନାମଲେଖା ହ୍ରାସ ପାଇଛି। ସମ୍ବଳର ସ୍ଥିରତା ହେତୁ ପୁରୁଣା ଭିତ୍ତିଭୂମି ଭୁଶୁଡି ପଡିଛି ।
ମହିଳା ଏବଂ ଶିଶୁମାନଙ୍କୁ ଜୀବନ ପ୍ରତି ବିପଦ ଏବଂ ପୁଷ୍ଟିହୀନତାରୁ ସେମାନଙ୍କୁ ରକ୍ଷା କରିବା ପାଇଁ କେନ୍ଦ୍ରୀୟ ଏବଂ ପ୍ରାଥମିକ ସ୍ବାସ୍ଥ୍ୟ ସେବାକୁ ପ୍ରାଥମିକତା ଦିଆଯିବା ଉଚିତ ବୋଲି ସେ କହିଛନ୍ତି।
