ଦୁବାଇ,୧୪।୧୨(ପି.ଟି.): ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ରବିବାର ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି। ଓ୍ବେଷ୍ଟଇଣ୍ଡିଜ୍ରେ ଖେଳାଯିବାକୁ ଥିବା ୨୦୨୨ ବିଶ୍ୱକପ୍ର କ୍ୱାଲିଫିକେଶନ ପାଥ୍ଓ୍ବ ବା କାର୍ଯସୂଚୀକୁ ଆଇସିସି ପୁନଃନିର୍ଦ୍ଧାରିତ କରିଛି। ଏହି ଯୋଗ୍ୟତା ପର୍ଯ୍ୟାୟ ଟୁର୍ନାମେଣ୍ଟରେ ୩୩ଟି ଦଳ ୫ଟି ସ୍ଥାନ ପାଇଁ ପ୍ରତିଯୋଗିତାରେ ଅବତୀର୍ଣ୍ଣ ହେବେ।
ଏହି ବିଶ୍ୱକପ୍ ପାଇଁ ଭାରତ, ଆଫଗାନିସ୍ତାନ, ଅଷ୍ଟ୍ରେଲିଆ, ବାଂଲାଦେଶ, ଇଂଲଣ୍ଡ, ନ୍ୟୁଜିଲାଣ୍ଡ, ପାକିସ୍ତାନ, ଦକ୍ଷିଣ ଆଫ୍ରିକା, ଶ୍ରୀଲଙ୍କା, ଓ୍ବେଷ୍ଟଇଣ୍ଡିଜ ଓ ଜିମ୍ବାଓ୍ବେ ଯୋଗ୍ୟାତ ହାସଲ କରିସାରିଛନ୍ତି। ବିଶ୍ୱକପ୍ର ୨୦୨୦ ସଂସ୍କରଣରେ ଏହି ଦଳଗୁଡିକ ପ୍ରଦର୍ଶନ ଅନୁସାରେ ଶ୍ରେଷ୍ଠ ୧୧ଟି ସ୍ଥାନରେ ରହି ଯୋଗ୍ୟାତ ହାସଲ କରିଛନ୍ତି। କୋଭିଡ୍-୧୯ ମହାମାରୀ ପାଇଁ ୨୦୨୨ ସଂସ୍କରଣର ଯୋଗ୍ୟତା ପର୍ଯ୍ୟାୟ ଗୋଟିଏ ବର୍ଷ ବିଳମ୍ବିତ ହୋଇଛି। ବାକିଥିବା ୫ଟି ସ୍ଥାନ ରିଜିଓନାଲ କ୍ୱାଲିଫିକେଶନ ଦ୍ୱାରା ନିର୍ଦ୍ଧାରିତ ହେବ। ଏହା୨୦୨୧ ଜୁନ୍ରୁ ଆରମ୍ଭ ହେବ।
ତେବେ ପ୍ରତିଯୋଗିତାରେ ଅବତୀର୍ଣ୍ଣ ହେବାକୁ ଥିବା ୩୩ଟି ଦଳ ୭ଟି ରିଜିଓନାଲ ଇଭେଣ୍ଟରୁ ପ୍ରଦର୍ଶନ ମାଧ୍ୟମରେ ବଛା ଯିବେ। ଆଫ୍ରିକା ଓ ଏସିଆରେ ୨- ଡିଭିଜନ କ୍ୱାଲିଫିକେଶ ପାଥ୍ଓ୍ବେ ଆୟୋଜନ ହେବ। ସେହିପରି ଆମେରିକା, ଇଷ୍ଟ ଏସିଆ ପ୍ୟାସିଫିକ୍ (ଇଏପି) ଓ ୟୁରୋପ ପାଇଁ ଓ୍ବାନ ଡିଭିଜନ କ୍ୱାଲିଫାଇଂ ପ୍ରକ୍ରିୟା ଆୟୋଜନ ହେବ। ପ୍ରତ୍ୟେକ ରିଜିଓନାଲ୍ କ୍ୱାଲିଫାୟର ବିଜେତା ୫ଟି ମଧ୍ୟରୁ ଗୋଟିଏ ସ୍ଥାନ ଅଧିକାର କରିବେ ଓ ବିଶ୍ୱକପ୍ ଖେଳିବାକୁ ଯୋଗ୍ୟତା ହାସଲ କରିବେ।
୧୯ ବର୍ଷରୁ କମ୍ ବିଶ୍ୱକପ୍ରେ ଭବିଷ୍ୟତର ତାରକା କ୍ରିକେଟରମାନେ ସୃଷ୍ଟି ହେବେ। ତେଣୁ କ୍ରିକେଟ ବିଶ୍ୱର କୋଣ ଅନୁକୋଣରେ ପହଞ୍ଚିବାର ଆବଶ୍ୟକତା ରହିଛି। ଏପରି ହେଲେ କ୍ରିକେଟର ଲୋକପ୍ରିୟତା ସାରା ବିଶ୍ୱରେ ବୃଦ୍ଧି ପାଇବ ବୋଲି ଆଇସିସି ହେଡ୍ ଅଫ୍ ଇଭେଣ୍ଟ୍ସ କ୍ରିସ୍ ଟେଟ୍ଲେ କହିଛନ୍ତି।
