ଭୁବନେଶ୍ୱର, ୧୫।୮(କ୍ରୀଡ଼ା ପ୍ରତିନିଧି)- ଭୁବନେଶ୍ୱରର କଳିଙ୍ଗ ଷ୍ଟାଡିୟମ ସମେତ ଦେଶର ୫ଟି ସ୍ଥାନରେ ହେବାକୁଥିବା ୧୭ ବର୍ଷରୁ କମ୍ ମହିଳା ଫିଫା ବିଶ୍ୱକପ ପାଇଁ ଇଂଲଣ୍ଡ, ଜର୍ମାନୀ ଓ ସ୍ପେନ ଯୋଗ୍ୟତା ଅର୍ଜନ କରିଛନ୍ତି। ୟୁନିୟନ ଅଫ୍ ୟୁରୋପିଆନ ଫୁଟବଲ ଆସୋସିଏଶନ୍ସ(ୟୁଫା) ପକ୍ଷରୁ ଶୁକ୍ରବାର ଏହା ପ୍ରକାଶ କରାଯାଇଛି। କରୋନା ଭାଇରସ ସଂକ୍ରମଣ ଜନିତ କାରଣରୁ ୨୦୨୦ ୟୁଫା ୧୭ ବର୍ଷରୁ କମ୍ ମହିଳା ଫୁଟବଲର ଚାମ୍ପିୟନଶିପ୍ର ଅନ୍ତିମ ରାଉଣ୍ଡକୁ ବାତିଲ କରାଯାଇଛି। ପୂର୍ବ ମ୍ୟାଚ ଗୁଡ଼ିକର ଫଳାଫଳ ଏବଂ ର଼୍ୟାଙ୍କିଙ୍ଗ୍ ଦୃଷ୍ଟିରୁ ଇଂଲଣ୍ଡ, ଜର୍ମାନୀ ଓ ସ୍ପେନ ବିଶ୍ୱକପ ଖେଳିବେ। ୫ମ ଥରପାଇଁ ଏହି ମେଗା ପ୍ରତିଯୋଗିତା ଖେଳିବାକୁ ଯାଉଥିବା ସ୍ପେନ ୨୦୧୮ରେ ଚାମ୍ପିୟନ ହୋଇଥିଲା। ତେଣୁ ଏହି ଦଳ ଡିଫେଣ୍ଡିଂ ଚାମ୍ପିୟନଭାବେ ଖେଳିବ। ୩ୟ ଥର ପାଇଁ ଖେଳିବାକୁ ଯାଉଥିବା ଇଂଲଣ୍ଡ ୨୦୦୮ରେ ସର୍ବାଧିକ ୪ର୍ଥ ସ୍ଥାନ ହାସଲ କରିଥିବାବେଳେ ଜର୍ମାନୀ ୭ମ ଥର ପାଇଁ ପ୍ରତିଯୋଗିତାରେ ଅବତୀର୍ଣ୍ଣ ହେବ। ୨୦୦୮ରେ ତୃତୀୟ ସ୍ଥାନ ହାସଲ ଏହି ଦଳର ଶ୍ରେଷ୍ଠ ପ୍ରଦର୍ଶନ।
ପୂର୍ବରୁ ଆୟୋଜକ ଦଳଭାବେ ଭାରତ ପ୍ରଥମଥରପାଇଁ ଏହି ପ୍ରତିଯୋଗିତା ଲାଗି ଯୋଗ୍ୟ ବିବେଚିତ ହୋଇଛି। ୨୦୧୯ ଏଏଫସି ୧୬ ବର୍ଷରୁ କମ୍ ମହିଳା ଫୁଟବଲ ଟୁର୍ନାମେଣ୍ଟରେ ପ୍ରଦର୍ଶନ ଆଧାରରେ ଏସିଆନ ଫୁଟବଲ କନ୍ଫେଡେରେଶନରୁ ଜାପାନ ଓ ଉତ୍ତର କୋରିଆ ଯୋଗ୍ୟତା ହାସଲ କରି ସାରିଛନ୍ତି। ସେହିପରି ୨୦୨୦ ଓଏଫସି ୧୭ ବର୍ଷରୁ କମ୍ ମହିଳା ଫୁଟବଲର ଅନ୍ତିମ ଚରଣ ବାତିଲ ହେବାରୁ ଓସେନିଆ କନ୍ଫେଡେରେଶନରୁ ନ୍ୟୁଜିଲାଣ୍ଡ ଏହି ସମ୍ମାନଜନକ ପ୍ରତିଯୋଗିତା ପାଇଁ ମନୋନୀତ ହୋଇଛି। ୨୦୧୮ ସଂସ୍କରଣରେ ନ୍ୟୁଜିଲାଣ୍ଡ ସର୍ବାଧିକ ୩ୟ ସ୍ଥାନ ହାସଲ କରିଥିବାବେଳେ ୨୦୧୪ରେ ଜାପାନ ଏବଂ ୨୦୦୮ ଓ ୨୦୧୬ରେ ଉତ୍ତର କୋରିଆ ଚାମ୍ପିୟନ ହୋଇଛି। ନ୍ୟୁଜିଲାଣ୍ଡ, ଜାପାନ ଓ ଉତ୍ତର କୋରିଆ ୭ମ ଥର ପାଇଁ ପ୍ରତିଯୋଗିତା ଖେଳିବେ।
କନ୍ଫେଡେରେଶନ ଅଫ୍ ଆଫ୍ରିକାନ୍ ଫୁଟବଲ(କାଫ୍), କନ୍ଫେଡେରେଶନ ଅଫ୍ ନର୍ଥ, ସେଣ୍ଟ୍ରାଲ ଆମେରିକାନ ଆଣ୍ଡ କାରିବିୟନ ଆସୋସିଏଶନ ଫୁଟବଲ(କନ୍କାକାଫ) ଏବଂ ସାଉଥ୍ ଆମେରିକାନ ଫୁଟବଲ କନ୍ଫେଡେରେଶନ(କନ୍ମେବୋଲ)ରୁ ୩ଟି ଲେଖାଏ ଦଳ ଏହି ସମ୍ମାନଜନକ ପ୍ରତିଯୋଗିତା ପାଇଁ ଯୋଗ୍ୟତା ହାସଲ କରିବା ବାକି ରହିଛି। ପ୍ରକାଶ ଯୋଗ୍ୟ ଯେ, ଏହି ପ୍ରତିଯୋଗିତା ପ୍ରକୃତରେ ୨୦୨୦ ନଭେମ୍ବର ୨ରୁ ୨୧ ପର୍ଯ୍ୟନ୍ତ ହେବାର ଥିଲା। ମାତ୍ର କରୋନା ଭାଇରସ ସଂକ୍ରମଣକୁ ଦୃଷ୍ଟିରେ ରଖି ଏହା ୨୦୨୧ ଫେବୃୟାରୀ ୧୭ରୁ ମାର୍ଚ୍ଚ ୭ ପର୍ଯ୍ୟନ୍ତ ଅନୁଷ୍ଠିତ ହେବ। ଭାରତର ୫ଟି ଭେନ୍ୟୁ ଭୁବନେଶ୍ୱରର କଳିଙ୍ଗ ଷ୍ଟାଡିୟମ, କୋଲକାତାର ସଲ୍ଟଲେକ୍, ଗୁଆହାଟୀର ଇନ୍ଦିରାଗାନ୍ଧୀ ଆଥଲେଟିକ୍ ଷ୍ଟାଡିୟମ, ଅହମ୍ମଦାବାଦର ଏକା ଆରେନା ଏବଂ ନଭି ମୁମ୍ବାଇର ଡି.ଓ୍ବାଇ. ପାଟିଲ ଷ୍ଟାଡିୟମରେ ଆୟୋଜିତ ହେବ।
