ଚେନ୍ନାଇ,୫ା୮: ଲୋକପ୍ରିୟ ଅଭିନେତ୍ରୀ ତ୍ରିଶାଙ୍କୁ ଇଙ୍ଗିତ କରି ଓ ତାଙ୍କ ସମ୍ମାନ ଏବଂ ନାରୀତ୍ୱକୁ ଅପମାନିତ କରି ଦ୍ୱିଅର୍ଥବୋଧକ ମନ୍ତବ୍ୟ ଦେବା ଅଭିଯୋଗରେ ତାମିଲନାଡୁର ପୂର୍ବତନ ଉପମୁଖ୍ୟମନ୍ତ୍ରୀ ଉଦୟନିଧି ଷ୍ଟାଲିନ୍ଙ୍କୁ ମଙ୍ଗଳବାର ଗିରଫ କରାଯାଇଥିଲା। ପାଖାପାଖି ୪ ଘଣ୍ଟା ପରେ ତାଙ୍କୁ ପୋଲିସ ହାଜତରୁ ମୁକ୍ତ କରିଦିଆଯାଇଛି। ମାମଲା ସମ୍ପର୍କରେ ଜେରା କରିବା ପରେ ଡିଏମ୍କେ ବିଧାୟକ ତଥା ତାମିଲନାଡୁ ବିଧାନସଭାର ବିରୋଧୀ ଦଳ ନେତା ଉଦୟନିଧିଙ୍କୁ ଛାଡ଼ିଦେବା ପାଇଁ ମାଡ୍ରାସ ହାଇକୋର୍ଟ ରାଜ୍ୟ ପୋଲିସ୍କୁ ନିର୍ଦ୍ଦେଶ ଦେଇଥିଲେ। ଆବଶ୍ୟକ ସମୟରେ ତଦନ୍ତରେ ସହଯୋଗ କରିବା ପାଇଁ ହାଇକୋର୍ଟ ଡିଏମ୍କେ ନେତାଙ୍କୁ ନିର୍ଦ୍ଦେଶ ଦେଇଛନ୍ତି। ହାଇକୋର୍ଟରେ ଶୁଣାଣି ବେଳେ ଥାଞ୍ଜାଭୁର ପୋଲିସ ତରଫରୁ ମହାଧିବକ୍ତା ବିଜୟ ନାରାୟଣ ଉପସ୍ଥିତ ରହି କହିଥିଲେ, ଉଦୟନିଧିଙ୍କୁ ଥାଞ୍ଜାଭୁରକୁ ନିଆଯାଇଛି। ତେବେ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇବା ପୋଲିସର ଉଦ୍ଦେଶ୍ୟ ନୁହେଁ। ତାଙ୍କୁ କେବଳ ଜେରା କରିବା ପରେ ଥାନାରୁ ଜାମିନରେ ଛାଡ଼ିଦିଆଯିବ।
କାବେରୀ ନଦୀଜଳ ପ୍ରସଙ୍ଗକୁ ନେଇ ସୋମବାର ଥାଞ୍ଜାଭୁରଠାରେ ଏକ ବିକ୍ଷୋଭ ସଭାରେ ଉଦୟନିଧି ଦ୍ୱିଅର୍ଥବୋଧକ ମନ୍ତବ୍ୟ ଦେଇଥିଲେ। ଜେରା କରିବା ପାଇଁ ପୋଲିସ ଉଦୟନିଧିଙ୍କ ବାସଭବନରେ ପହଞ୍ଚତ୍ବା ପରେ ତୁରନ୍ତ ଏକ ଆଗୁଆ ଜାମିନ ଆବେଦନ ଦାଖଲ କରାଯାଇଥିଲା ବୋଲି ଡିଏମ୍କେ ସୂତ୍ରରୁ ଜଣାପଡ଼ିଛି। ଏହା ସତ୍ତ୍ୱେ ପୋଲିସ ଉଦୟନିଧିଙ୍କୁ ଗିରଫ କରି ଥାଞ୍ଜାଭୁର ନେଇଥିଲା। ଅଶ୍ଳୀଳ ଶବ୍ଦ ବ୍ୟବହାର କରିବା ଓ ଅଭିନେତ୍ରୀଙ୍କ ନାରୀତ୍ୱକୁ ଅପମାନିତ କରିବା ଆଦି ଅଭିଯୋଗ ନେଇ ପୋଲିସ ତାଙ୍କ ବିରୋଧରେ ଆଇନର ବିଭିନ୍ନ ଦଫାରେ ମାମଲା ରୁଜୁ କରିଛି। କାବେରୀ ପ୍ରସଙ୍ଗରେ ବିରୋଧୀ ଦଳ ନେତା ଉଦୟନିଧି ଭାଷଣ ଦେଉଥିବାବେଳେ ଉପସ୍ଥିତ ଲୋକେ ତ୍ରିଶା ତ୍ରିଶା କହିବାରୁ ସେ ଏକ ଅଶ୍ଳୀଳ ଏବଂ ଦ୍ୱିଅର୍ଥବୋଧକ ମନ୍ତବ୍ୟ ଦେଇଥିଲେ ବୋଲି ଅଭିଯୋଗରେ ଦର୍ଶାଯାଇଛି।
ଉଦୟନିଧିଙ୍କ ଗିରଫଦାରିକୁ ନେଇ ଡିଏମ୍କେ ତାମିଲନାଡୁ ମୁଖ୍ୟମନ୍ତ୍ରୀ ବିଜୟଙ୍କୁ ସମାଲୋଚନା କରିଛି। ଶାସକ ଦଳ ଅହଙ୍କାରୀ। ଏହା ଦଳକୁ ଧ୍ୱଂସ କରିଦେବ ବୋଲି ଦଳର ମୁଖ୍ୟ ତଥା ଉଦୟନିଧିଙ୍କ ବାପା ଏମ୍.କେ. ଷ୍ଟାଲିନ୍ କହିଥିଲେ। ତେବେ ଅଶ୍ଳୀଳ ଶବ୍ଦ କହି ନ ଥିବା ଉଦୟନିଧି କହିଛନ୍ତି। କାବେରୀ ଜଳ ପାଇବା ଏବଂ ମେକେଡାଟୁ ଡ୍ୟାମ୍କୁ ବିରୋଧ କରିବାରେ ଟିଭିକେ ସରକାର ପ୍ରଶାସନିକ ସ୍ତରରେ ବିଫଳ ଓ ଅସମର୍ଥ ହୋଇଥିବା ସେ ଅଭିଯୋଗ କରିଛନ୍ତି। କାବେରୀ ପ୍ରସଙ୍ଗରୁ ଲୋକଙ୍କ ଧ୍ୟାନ ହଟାଇବା ପାଇଁ ଉଦୟନିଧିଙ୍କୁ ଗିରଫ କରାଯାଇଥିବା ଏମ୍.କେ. ଷ୍ଟାଲିନ୍ କହିଛନ୍ତି।
