ନୂଆଦିଲ୍ଲୀ, ୨୪।୭-ବିଶ୍ୱ ବକ୍ସିଂ ଇତିହାସରେ ସର୍ବକନିଷ୍ଠ ହେଭିଓ୍ବେଟ ଚାମ୍ପିୟନ ହେଉଛନ୍ତି ଆମେରିକାର ମାଇକ୍ ଟାଇସନ। ୧୯୮୬ରେ ମାତ୍ର ୨୦ ବର୍ଷ ବୟସରେ ସେ ଏହି ଟାଇଟଲ ଜିତିଥିଲେ। ନିଜ ସମୟରେ ସବୁଠାରୁ ଭୀତିପ୍ରଦ ଫାଇଟରଭାବେ ପରିଚିତ ହେଉଥିବା ଟାଇସନଙ୍କ କ୍ୟାରିୟର ବିବାଦରେ ମଧ୍ୟ ଭରପୂର ଥିଲା। ଏକ ସମୟରେ ସେ ବକ୍ସିଂ ଜଗତରେ ସବୁଠାରୁ ଖରାପ ବ୍ୟକ୍ତିତ୍ୱ ବିବେଚିତ ହେଉଥିଲେ ହେଁ ଜଣେ ପ୍ରସିଦ୍ଧ ବକ୍ସର ମଧ୍ୟ ଥିଲେ। ଗୋଟିଏ ପଞ୍ଚ୍ରେ ପ୍ରତିପକ୍ଷଙ୍କୁ ଧରାଶାୟୀ କରିବାର ଦକ୍ଷତା ତାଙ୍କ ନିକଟରେ ଥିଲା। ୨୦୦୫ରେ ସେ କ୍ରମାଗତ ୨ଟି ଲଢ଼େଇ ହାରିବାପରେ ଆଉ ବକ୍ସିଂ ରିଙ୍ଗ୍ରେ ଦେଖିବାକୁ ମିଳି ନ ଥିଲେ। ୫୪ ବର୍ଷୀୟ ଟାଇସନ ଏବେ ବକ୍ସିଂ ରିଙ୍ଗ୍କୁ ପୁଣିଥରେ ଓହ୍ଲାଇବାକୁ ଘୋଷଣା କରିଛନ୍ତି। ଆସନ୍ତା ସେପ୍ଟେମ୍ବର ୧୨ରେ ସେ ୪ଟି ଡିଭିଜନ ଚାମ୍ପିୟନ ଆମେରିକାର ରୟ ଜୋନ୍ସ ଜୁନିୟରଙ୍କ ବିପକ୍ଷରେ ଲଢ଼ିବେ। କାର୍ଲିଫର୍ନିଆର ଡିଗ୍ନିଟି ହେଲ୍ଥ ସ୍ପୋଟର୍ସ ପାର୍କରେ ୮ ରାଉଣ୍ଡ ବିଶିଷ୍ଟ ପ୍ରଦର୍ଶନୀ ମ୍ୟାଚରେ ଉଭୟ ପରସ୍ପରକୁ ଭେଟିବେ।
ନିଜର ଆକ୍ରମଣାତ୍ମକ ଶୈଳୀ ପାଇଁ ଟାଇସନ ଲଢ଼େଇ ସମୟରେ ନିଜ ପ୍ରଶଂସକ ମାନଙ୍କୁ ସର୍ବଦା ଭୟଭୀତ କରି ରଖିଥାନ୍ତି। ୧୯୮୦ ଦର୍ଶକର ଶେଷ ଭାଗରେ ସେ ଆଧିପତ୍ୟ ବିସ୍ତାର କରିଥିଲେ ଏବଂ ଅପ୍ରତିଦ୍ୱନ୍ଦ୍ୱୀ ଥିଲେ। ବିଶ୍ୱର ଏକମାତ୍ର ବକ୍ସରଭାବେ ସେ ଡବ୍ଲ୍ୟୁବିଏ, ଡବ୍ଲ୍ୟୁବିସି ଏବଂ ଆବିଏଫ ଟାଇଟଲ ହାସଲ କରିଥିଲେ। ଟାଇସନ ନିଜ ପ୍ରଥମ ୧୯ ଫାଇଟ୍କୁ ନକ୍ଆଉଟରେ ଜିତିଥିଲେ। ଏହା ମଧ୍ୟରୁ ୧୨ଟିରେ ସେ ପ୍ରଥମ ରାଉଣ୍ଡରେ ହିଁ ବିଜୟ ହାସଲ କରିଥିଲେ। ୯୦ ଦଶକର ଶେଷ ଭାଗରେ ତାଙ୍କ ପ୍ରଭାବ ହ୍ରାସ ପାଇବାରେ ଲାଗିଲା। ଶେଷରେ ୨୦୦୫ରେ ସେ ଏହି କ୍ରୀଡ଼ାରୁ ଓହରି ଯାଇଥିଲେ। ୫୧ ବର୍ଷୀୟ ଜୋନ୍ସ ପୂର୍ବରୁ ମିଡଲଓ୍ବେଟ, ସୁପର ମିଡଲଓ୍ବେଟ, ଲାଇଟ ହେଭିଓ୍ବେଟ ଏବଂ ୨୦୦୩ରେ ହେଭିଓ୍ବେଟ ଟାଇଟଲ ଜିତିଛନ୍ତି।
