କାମାକ୍ଷାନଗର,୫।୫(ଡି.ଏନ୍.ଏ.): କାଜୁ ସଂଗ୍ରହ କରିବାକୁ ବଗିଚାକୁ ଯାଇଥିବା ବେଳେ ମାଡ଼ିଆସିଲା ତୋଫାନ। ପ୍ରବଳ ବେଗରେ ଝଡ଼ବର୍ଷା ହେବା ସହିତ ପଡ଼ିଲା ଚଡ଼କ। ଏଥିରେ ଲିଭିଗଲା ସମ୍ପର୍କୀୟ ଶଳା, ଭିଣୋଇଙ୍କ ଜୀବନ ଦୀପ। ଢେଙ୍କାନାଳ ଜିଲା କାମାକ୍ଷାନଗର ଥାନା ବଡସୁଆଁଳ ପଞ୍ଚାୟତ ଚକାପାଳ ଗ୍ରାମରେ ଗୁରୁବାର ଅପରାହ୍ନରେ ଘଟିଛି ଏଭଳି ଅଭାବନୀୟ ଘଟଣା, ଯାହାକୁ ନେଇ ଅଞ୍ଚଳରେ ସୃଷ୍ଟି ହୋଇଛି ଶୋକାକୁଳ ପରିବେଶ।
ପୋଲିସ ସୂଚନା ଅନୁଯାୟୀ, ଚକାପାଳ ଗ୍ରାମର ପ୍ରକାଶ ପଧାନ (୩୦)ଙ୍କ ଏକ କାଜୁ ବଗିଚା ଅଛି। କାଜୁ ସଂଗ୍ରହ କରିବାରେ ସହାୟତା କରିବାକୁ ତାଙ୍କ ସମ୍ପର୍କୀୟ ଶଳା ତଥା କଙ୍କଡାହାଡ଼ ଥାନା ମକୁଆକାଟେଣୀ ଗ୍ରାମର ଦେବଦତ୍ତ ପଧାନ (୧୭) ପ୍ରାୟ ସପ୍ତାହେ ହେଲା ଆସିଥିଲେ। ଗୁରୁବାର ଅପରାହ୍ନରେ ଉଭୟେ ବଗିଚାକୁ କାଜୁ ସଂଗ୍ରହ କରିବାକୁ ଯାଇଥିବା ବେଳେ ହଠାତ୍ ଆରମ୍ଭ ହୋଇଯାଇଥିଲା ଝଡ଼ବର୍ଷା। ବର୍ଷାରୁ ରକ୍ଷା ପାଇଁ ଗଛତଳେ ଛିଡ଼ା ହୋଇଥିବାବେଳେ ବଜ୍ରପାତ ହୋଇଥିଲା। ଦୁହେଁ ଘଟଣାସ୍ଥଳରେ ଟଳି ପଡ଼ିଥିଲେ। ସୂଚନା ପାଇ ପରିବାର ଲୋକେ ପହଞ୍ଚତ୍ ଉଭୟଙ୍କୁ ଉଦ୍ଧାର କରି କାମାକ୍ଷାନଗର ଉପଖଣ୍ଡ ଡାକ୍ତରଖାନାକୁ ନେଇ ଯାଇଥିଲେ। ତେବେ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ। ପୋଲିସ ମୃତଦେହ ଜବତ କରି ଦୁଇଟି ଅପମୃତ୍ୟୁ ମାମଲା ରୁଜୁ କରିଛି। ଶୁକ୍ରବାର ଶବ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରାଯିବ ବୋଲି ପୋଲିସ କହିଛି।
