ନୂଆଦିଲ୍ଲୀ, ୨୭।୧ : କଂଗ୍ରେସ ନେତା ରାହୁଲ ଗାନ୍ଧୀ ସୋସିଆଲ ମିଡିଆ ପ୍ଲାଟଫର୍ମ ଟୁଇଟରକୁ ଏକ ଚିଠି ଲେଖିଛନ୍ତି। ଟୁଇଟର ତାଙ୍କ କଣ୍ଠରୋଧ କରୁଥିବା ସେ ଅଭିଯୋଗ କରିଛନ୍ତି। ସରକାରଙ୍କ ଚାପରେ ଏଭଳି କରାଯାଉଥିବା ସେ ଚିଠିରେ ଉଲ୍ଲେଖ କରିଛନ୍ତି। ତାଙ୍କ ଟୁଇଟର ଫଲୋୟର୍ସଙ୍କ ସଂଖ୍ୟା ଜାଣିଶୁଣି ହ୍ରାସ କରାଯାଉଛି ବୋଲି ରାହୁଲ ଅଭିଯୋଗ କରିଛନ୍ତି।
ଟୁଇଟର ଏହାର ଜବାବରେ କହିଛି ଯେ, ଫଲୋୟର୍ସଙ୍କ ସଂଖ୍ୟା ଗଣନା ଏକ ଦୃଶ୍ୟମାନ ଭିଜିବୁଲ୍ ଫିଚର। ଟୁଇଟର ଚାହେଁ ଯେ ସମସ୍ତଙ୍କର ବିଶ୍ୱାସ ରହିବା ଉଚିତ ଏହି ସଂଖ୍ୟାଗୁଡିକ ସଠିକ ଏବଂ ବାସ୍ତବ ତଥା ତଥ୍ୟତ୍ମକ। ହେରଫେର ଏବଂ ସ୍ପାମ ନେଇ ଟୁଇଟଟରରେ ଶୂନ୍ୟ ସହନଶୀଳତା ନୀତି (ଜିରୋ ଟେଲୋରାନ୍ସ୍ ପଲିସି) ରହିଛି।
ଫଲୋୟର୍ସଙ୍କ ସଂଖ୍ୟା ହ୍ରାସ ନେଇ ରାହୁଲଙ୍କ ଅଭିଯୋଗ ଉପରେ ଟୁଇଟର କହିଛି, ମେସିନ ଲର୍ଣ୍ଣିଂ ଟୁଲସ୍ ଏବଂ ଏକ ସୁସ୍ଥ ରଣନୀତି ଆଧାରରେ ନିର୍ଭରଯୋଗ୍ୟ ଆକାଉଣ୍ଟକୁ ସୁନିଶ୍ଚିତ କରିବା ପାଇଁ ବ୍ୟାପକ ଭାବରେ ହେରଫେର୍ ଏବଂ ସ୍ପାମ ଉପରେ ପଦକ୍ଷେପ ଗ୍ରହଣ କରାଯାଉଛଇ। ଆମର ନୀତି ଉଲ୍ଲଂଘନ କରିଥିବା ଆଧାରରେ ଆମେ ପ୍ରତି ସପ୍ତାହରେ ଲକ୍ଷ ଲକ୍ଷ ଆକାଉଣ୍ଟ ଅପସାରଣ କରୁଛୁ।
ରାହୁଲ ଗତ ମାସରେ ଟୁଇଟର ସିଇଓ ପରାଗ ଅଗ୍ରୱାଲଙ୍କୁ ଲେଖିଥିବା ଏକ ଚିଠିରେ ଉଲ୍ଲେଖ କରିଥିଲେ ଯେ ଭାରତରେ ଅଭିବ୍ୟକ୍ତିର ସ୍ବାଧୀନତାକୁ ରୋକିବାରେ ଟୁଇଟରରେ ଅନିଚ୍ଛାକୃତ ଭାବେ ଶାସକଙ୍କ ସହିତ ମିଳିତ ଭାବେ କାର୍ଯ୍ୟ କରୁଛି।
ଡିସେମ୍ବର ୨୭ର ଏହି ଚିଠିରେ ତାଙ୍କ ଟୁଇଟର ଆକାଉଣ୍ଟର ତଥ୍ୟର ବିଶ୍ଳେଷଣ ସହିତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ଏବଂ କଂଗ୍ରେସ ନେତା ଶଶି ଥରୁରଙ୍କ ସହ ରାହୁଲ ତୁଳନା କରିଥିଲେ। ଏଥିରେ ରାହୁଲ କହିଛନ୍ତି ଯେ ୨୦୨୧ ର ପ୍ରଥମ ସାତ ମାସରେ ତାଙ୍କ ଆକାଉଣ୍ଟରେ ହାରାହାରି ୪ ଲକ୍ଷ ଫଲୋୟର୍ସ ଯୋଗ ହୋଇଥିଲେ।
କିନ୍ତୁ ଗତ ବର୍ଷ ଅଗଷ୍ଟରେ ଆଠ ଦିନିଆ ନିଲମ୍ବନ ପରେ ଏହି ଅଭିବୃଦ୍ଧି ହଠାତ୍ ଅନେକ ମାସ ପର୍ଯ୍ୟନ୍ତ ବନ୍ଦ ହୋଇଯାଇଥିଲା। ଏହି ଅବଧିରେ, ଅନ୍ୟ ରାଜନେତାଙ୍କ ଫଲୋୟର୍ସଙ୍କ ସଂଖ୍ୟା ଅକ୍ଷୁର୍ଣ୍ଣ ରହିଲା । ସେ କହିଛନ୍ତି ଯେ, କୌଣସି ବୈଧ କାରଣ ବିନା ମୋର ଆକାଉଣ୍ଟକୁ କିଛି ଦିନ ପାଇଁ ଅବରୋଧ କରାଯାଇଛି।
