ମୁମ୍ବାଇ: ପ୍ରଶଂସକଙ୍କ ହୃଦୟର ସ୍ପନ୍ଦନ ପାଲଟିଥିବା ଶେହନାଜ ଗିଲ୍ଙ୍କ ଆଜି ହେଉଛି ଜନ୍ମଦିନ। ଜାନୁୟାରୀ ୨୭ରେ ୨୯ ବର୍ଷ ତଳେ ଜନ୍ମ ହୋଇଥିଲେ ଶେହନାଜ। ଆଜିର ଏହି ସ୍ବତନ୍ତ୍ର ଦିନରେ ପ୍ରଶଂସକମାନେ ତାଙ୍କୁ ଜନ୍ମଦିନର ଶୁଭେଚ୍ଛା ଜଣାଇଛନ୍ତି। ତାଙ୍କ ବିଷୟରେ ଜାଣନ୍ତୁ କିଛି କଥା…
‘ପଞ୍ଜାବର କ୍ୟାଟ୍ରିନା କୈଫ୍’ରୁ ‘ଦେଶର ଧଡ୍କନ୍ ବା ସ୍ପନ୍ଦନ’ ପାଲଟିବା ପର୍ଯ୍ୟନ୍ତ ଶେହନାଜଙ୍କ ପାଇଁ ଆଦୌ ସହଜ ନ ଥିଲା। ସେ ତାଙ୍କର ସ୍ବପ୍ନକୁ ପୂରା କରିବାକୁ ଖୁବ୍ ପରିଶ୍ରମ କରିଛନ୍ତି। ନିଜର ସୁନ୍ଦର ଆଉ ଦୁଷ୍ଟାମୀ ଶୈଳୀ ସହିତ ପ୍ରଶଂସକଙ୍କ ହୃଦୟରେ ଏକ ବଡ଼ ସ୍ଥାନ ସୃଷ୍ଟି କରିଛନ୍ତି।
ଶେହନାଜ ଆଜିର ଦିନରେ ଜଣେ ମଡେଲ, ଅଭିନେତ୍ରୀ ଏବଂ ଗାୟିକା ଭାବରେ ଜଣାଶୁଣା। ୨୦୧୫ରେ ସେ ମଡେଲିଂ ଦୁନିଆରେ ପାଦ ଦେଇଥିଲେ। କ୍ୟାରିୟର ଆରମ୍ଭରେ ଗୁରବୀନ୍ଦର ବରାରଙ୍କ ସହ ଏକ ମ୍ୟୁଜିକ୍ ଭିଡିଓ ‘ଶିବ୍ ଦି କିତାବ୍’ ଏବଂ ୨୦୧୬ରେ ‘ମାଝେ ଦି ଜଟି’ଗୀତରେ କାମ କରିଥିଲେ। ପଞ୍ଜାବୀ ଗୀତରୁ କ୍ୟାରିୟର ଆରମ୍ଭ କରିବା ପରେ ଶେହନାଜ ପଞ୍ଜାବୀ ଫିଲ୍ମରେ ଏଣ୍ଟ୍ରି କରିଥିଲେ। ୨୦୧୭ରେ ‘ସତ୍ ଶ୍ରୀ ଅକାଲ ଇଂଲଣ୍ଡ’ ନାମକ ଏକ ପଞ୍ଜାବୀ ଫିଲ୍ମରେ ଡେବ୍ୟୁ କରିଥିଲେ। ସେ ପଞ୍ଜାବୀ ଇଣ୍ଡଷ୍ଟ୍ରିରେ ବେଶ୍ ନାଁ କମାଇବା ପରେ ବିଗ୍ ବସ୍ -୧୩ରେ ଭାଗ ନେଇଥିଲେ। ଏଥିରେ ମଧ୍ୟ ସଫଳତା ହାସଲ କରିଥିଲେ। ସେତେବେଳେ ସିଦ୍ଧାର୍ଥ ଶୁକ୍ଳାଙ୍କ ସହ ସାକ୍ଷାତ ହୋଇଥିଲା। ପରେ ଦୁହେଁ ପ୍ରେମରେ ପଡ଼ିଥିଲେ। ଦୁଇଜଣ ମିଶି ମ୍ୟୁଜିକ୍ ଭିଡିଓ କରିଥିଲେ। ଯାହାକି ସୁପରହିଟ୍ ହୋଇଥିଲା। ମାତ୍ର ସିଦ୍ଧାର୍ଥଙ୍କ ଦେହାନ୍ତ ପରେ ଶେହନାଜଙ୍କୁ ବଞ୍ଚିବା ଏକ ପ୍ରକାର କଷ୍ଟକର ହୋଇପଡ଼ିଥିଲା। ଧିରେଧିରେ ସେ ସାଧାରଣ ଅବସ୍ଥାକୁ ଫେରୁଛନ୍ତି। ଶେହନାଜଙ୍କ ମୁହଁରେ ଏବେ ହସ ଦେଖି ପ୍ରଶଂସକମାନେ ବି ଖୁସି ହୋଇଛନ୍ତି। ସମସ୍ତେ ତାଙ୍କୁ ଜନ୍ମଦିନର ଶୁଭେଚ୍ଛା ଜଣାଉଛନ୍ତି।
