ସ୍ପିଲବର୍ଗ (ଅଷ୍ଟ୍ରିଆ),୧୧ା୭ (ଏପି)-ଚଳିତବର୍ଷର ଫର୍ମୁଲା ଓ୍ବାନ କ୍ୟାଲେଣ୍ଡରରେ ଶୁକ୍ରବାର ପ୍ରଥମ ଥର ଟସ୍କାନ ଗ୍ରାଁ ପ୍ରିକୁ ସାମିଲ କରାଯାଇଛି। ଅନ୍ୟପକ୍ଷରେ ଦର୍ଶକଙ୍କ ଉପସ୍ଥିତିରେ ରଷିଆନ ଗ୍ରାଁ ପ୍ରି ଆୟୋଜନ କରିବା ଲାଗି ଯୋଜନା ହୋଇଛି। ମୋଞ୍ଜାରେ ଇଟାଲିଆନ ଗ୍ରାଁ ପ୍ରି ଅନୁଷ୍ଠିତ ହେବାର ଗୋଟିଏ ସପ୍ତାହ ପରେ ସେପ୍ଟେମ୍ବର ୧୩ରେ ମୁଗେଲୋ ସର୍କିଟ୍ରେ ଟସ୍କାନ ଗ୍ରାଁ ପ୍ରି ଆୟୋଜିତ ହେବ। ଏହା ପରେ ସୋଚି ଅଟୋଡ୍ରମ୍ଠାରେ ସେପ୍ଟେମ୍ବର ୨୭ରେ ରଷିଆନ ଗ୍ରାଁ ପ୍ରି ହେବ। ଟସ୍କାନ ଗ୍ରାଁପ୍ରି ସାମିଲ ହେବା ଦ୍ୱାରା ୟୁରୋପରେ ଚଳିତ ସିଜନରେ ଫର୍ମୁଲା ଓ୍ବାନ ରେସ୍ ସଂଖ୍ୟା ୧୦ରେ ପହଞ୍ଚତ୍ଛି। ଡିସେମ୍ବରରେ ବାହାରିନ ଓ ଆବୁଧାବିରେ ରେସ୍ ସହ ଫର୍ମୁଲା ଓ୍ବାନ କର୍ତ୍ତୃପକ୍ଷ ଏହି ସିଜନରେ ୧୫ରୁ ୧୮ ରେସ୍ ଆୟୋଜନ କରିବା ଲାଗି ଆଶା ରଖିଛନ୍ତି। ଫର୍ମୁଲା ଓ୍ବାନ ଚେୟାରମ୍ୟାନ ଚେଜ୍ କାରେ କହିଛନ୍ତି, ଗତ ରବିବାର ଅଷ୍ଟ୍ରିଆରେ ଚଳିତ ସିଜନର ପ୍ରଥମ ରେସ୍ ଅନୁଷ୍ଠିତ ହୋଇ ସାରିଛି। ୨୦୨୦ର ଅବଶିଷ୍ଟ ରେସ୍ଗୁଡ଼ିକ ସଫଳତାର ସହିତ ଆୟୋଜିତ ହୋଇପାରିବ ବୋଲି ଆମେ ଦୃଢ ଆଶାବାଦୀ। ମୁଗେଲୋରେ ପ୍ରଥମଥର ଫୁର୍ମଲା ଓ୍ବାନ ରେସ୍ ଆୟୋଜନ ହେବାକୁଯାଉଛି। ସେଠାରେ ଫେରାରି ଏହାର ୧୦୦୦ ତମ ଗ୍ରାଁ ପ୍ରି ରେସ୍ରେ ଭାଗ ନେବ। ଫ୍ଲୋରେନ୍ସଠାରୁ ୩୨ କିଲୋମିଟର ଦୂରରେ ମୁଗେଲୋରେ ଫର୍ମୁଲା-୨ ଏବଂ ମୋଟୋ ଜିପି ରେସ୍ ଅନୁଷ୍ଠିତ ହୋଇଥିଲେ ମଧ୍ୟ କେବେ ଫର୍ମୁଲା ଓ୍ବାନ ରେସ୍ ଆୟୋଜିତ ହୋଇ ନାହିଁ। ତେବେ ଅତୀତରେ ଫେରାରି ଏହାକୁ ଟେଷ୍ଟ ଟ୍ରାକ୍ ଭାବେ ବ୍ୟବହାର କରିଛି। ଫେରାରି ଡ୍ରାଇଭର ସେବାଷ୍ଟିଆନ ଭେଟେଲ ଗତ ମାସରେ ସେଠାରେ ଏକ ଟେଷ୍ଟ ଡ୍ରାଇଭ୍ କରିଛନ୍ତି।
