ଧାମନଗର,୧୭।୪(ଦେବେନ୍ଦ୍ର ଆନ୍ଦିଆ):ମଣିଷ ବଞ୍ଚତ୍ଥିବା ଯାଏ ଆଶା ମରେନାହିଁ, କିନ୍ତୁ କିଛି ଆଶା ଯେତେବେଳେ ନିରାଶାରେ ପରିଣତ ହୁଏ, ସେତେବେଳେ ସମୟ ବି ଦୁଃଖର ବୋଝ ଲଦି ଦିଏ। ସତରେ କୋକେଇ ବନ୍ଧା ହେଲା, ସାହି ଭାଇ ପରିବାର ଓ ପ୍ରିୟଜନ ମିଛି ମିଛିକା ଶବ କୋକେଇରେ ବାନ୍ଧି ସତ୍କାର ପାଇଁ ଶ୍ମଶାନ ନେଇଥିଲେ। ପରିବାର ଓ ଆତ୍ମୀୟସ୍ବଜନଙ୍କ କାନ୍ଦ ବୋବାଳିରେ ଗଁା ଦାଣ୍ଡ ସ୍ତବ୍ଧ ହୋଇଯାଇଥିଲା। ହେଲେ କୋକେଇରେ ଥିଲା ପ୍ରତୀକାତ୍ମକ ଶବ। ଏଭଳି ଏକ ହୃଦୟ ବିଦାରକ ଦୃଶ୍ୟ ଦେଖିବାକୁ ମିଳିଛି ଭଦ୍ରକ ଜିଲା ଧାମନଗର ବ୍ଲକ ଚୁଡ଼ାକୁଟି ପଞ୍ଚାୟତର ବିଦ୍ୟାଧରପୁର ଗ୍ରାମରେ। ଦୀର୍ଘ ୨୬ ବର୍ଷର ଅପେକ୍ଷା ପରେ ଶେଷରେ ଜଣେ ନିଖୋଜ ବ୍ୟକ୍ତିଙ୍କ ପରିବାର ଲୋକେ ଶାସ୍ତ୍ରୀୟ ବିଧି ଅନୁଯାୟୀ ବୁଧବାର ତାଙ୍କର ପ୍ରତୀକାତ୍ମକ ଶବ ସତ୍କାର କରିଛନ୍ତି।
ସୂଚନା ଅନୁଯାୟୀ, ଏହି ଗ୍ରାମର ଶତ୍ରୁଘ୍ନ ସାହୁ(୫୫) ୨୦୦୦ ମସିହାରୁ ହଠାତ୍ ନିଖୋଜ ହୋଇଯାଇଥିଲେ। ସେ ସମୟରେ ପରିବାର ଲୋକେ ବହୁ ଖୋଜାଖୋଜି କରିଥିଲେ ମଧ୍ୟ ତାଙ୍କର କୌଣସି ସନ୍ଧାନ ମିଳି ନ ଥିଲା। ବର୍ଷ ପରେ ବର୍ଷ ବିତିଗଲା, କିନ୍ତୁ ଶତ୍ରୁଘ୍ନ ଫେରିଲେ ନାହିଁ। ତାଙ୍କ ଫେରିବା ବାଟକୁ ଚାହିଁ ଚାହିଁ ପରିବାର ଲୋକଙ୍କ ଆଖିରୁ ଲୁହ ଶୁଖିଯାଇଥିଲା। ସମ୍ପର୍କୀୟମାନେ ବିଭିନ୍ନ ସ୍ଥାନରେ ଖବର ନେଇଥିଲେ ହେଁ କେଉଁଠାରୁ କୌଣସି ସୁରାକ ମିଳିପାରି ନ ଥିଲା। ଘଟଣାକୁ ଦୀର୍ଘ ୨୬ ବର୍ଷ ବିତିଯାଇଥିବା ବେଳେ ଶତ୍ରୁଘ୍ନଙ୍କ ବାବଦରେ କୌଣସି ଖବର ନ ଥିବାରୁ ପରିବାର ଲୋକେ ଶେଷରେ ଧର୍ମୀୟ ବିଧି ଅନୁସାରେ ତାଙ୍କର ପିଣ୍ଡଦାନ ଓ ଅନ୍ତ୍ୟେଷ୍ଟି କ୍ରିୟା କରିବାକୁ ନିଷ୍ପତ୍ତି ନେଇଥିଲେ। ଏନେଇ ପରିବାର ପକ୍ଷରୁ ପୁରୀ ଶ୍ରୀମନ୍ଦିରସ୍ଥିତ ମୁକ୍ତି ମଣ୍ଡପର ସହଯୋଗ ଲୋଡ଼ାଯାଇଥିଲା। ଶାସ୍ତ୍ରୀୟ ନିୟମ ଅନୁଯାୟୀ ଯଦି କେହି ବହୁ ବର୍ଷ ଧରି ନିଖୋଜ ରହନ୍ତି, ତେବେ ପ୍ରତୀକାତ୍ମକ ଭାବେ ଶବ ସଂସ୍କାର କରାଯିବାର ବିଧି ରହିଛି। ଗ୍ରାମରେ ଏକ ଶୋକାକୁଳ ପରିବେଶରେ ପରିବାର ଲୋକେ ଶାସ୍ତ୍ରୀୟ ରୀତିନୀତି ଅନୁଯାୟୀ ସମସ୍ତ କାର୍ଯ୍ୟ ସମ୍ପନ୍ନ କରିବା ସହ ଗ୍ରାମ ଶ୍ମଶାନରେ ପୋତାଯାଇଥିଲା।
Dharitri – Odisha’s No.1 Odia Daily
