ଭୁବନେଶ୍ୱର, ୧୨।୯(କ୍ରୀଡ଼ା ପ୍ରତିନିଧି): ଅଷ୍ଟ୍ରେଲିଆନ ସେଣ୍ଟ୍ରାଲ୍ ବ୍ୟାକ୍ ଜ୍ୟାକବ ଟ୍ରଟ୍ଙ୍କ ସହ ଚୁକ୍ତି କରିଛି ଓଡ଼ିଶା ଏଫସି। ଫଳରେ ଏହି ଅଷ୍ଟ୍ରେଲୀୟ ଡିଫେଣ୍ଡର ଇଣ୍ଡିଆନ ସୁପରଲିଗ୍(ଆଇଏସଏଲ)ର ୭ମ ସଂସ୍କରଣରେ ଭୁବନେଶ୍ୱର ଭିତ୍ତିକ ଏହି ଫ୍ରାଞ୍ଚାଇଜ୍ ପକ୍ଷରୁ ଖେଳିବା ସ୍ପଷ୍ଟ ହୋଇଯାଇଛି। ୨୬ ବର୍ଷୀୟ ଟ୍ରଟ୍ ଜଣେ ପ୍ରତିଭା ସମ୍ପନ୍ନ ଡିଫେଣ୍ଡର। ସେ ଉଭୟ ରାଇଟ୍ ବ୍ୟାକ୍ ଓ ସେଣ୍ଟର ବ୍ୟାକ୍ରେ ଖେଳିବା ଦକ୍ଷତା ରଖିଛନ୍ତି। ୟୁଥ୍ ବର୍ଗରେ ସିଡ୍ନୀ ଏଫସି ପକ୍ଷରୁ ଖେଳିବାପରେ ସେ କ୍ରମାଗତଭାବେ ଅଷ୍ଟ୍ରେଲିଆନ-ଏ ଲିଗ୍ରେ ଖେଳିଥିଲେ। ସେ ସିଡ୍ନୀ ଏଫସି ସହିତ ସିଡ୍ନୀ ୟୁନାଇଟେଡ, ଓ୍ବେଲିଂଟନ ଫୋଏନିକ୍ସ, ସୁଥରଲାଣ୍ଡ ଶାର୍କ୍ସ ଓ ପର୍ଥ ଗ୍ଲୋରି ପକ୍ଷରୁ ପ୍ରତିନିଧିତ୍ୱ କରିଥିଲେ। ଟ୍ରଟଙ୍କ ଉପସ୍ଥିତିରେ ଓଡ଼ିଶା ଏଫସି ଡିଫେନ୍ସ ଲାଇନ୍ ଶକ୍ତିଶାଳୀ ହେବ ବୋଲି ମୁଖ୍ୟ କୋଚ୍ ଷ୍ଟୁଆର୍ଟ ବକ୍ସଟର ଆଶା ପ୍ରକାଶ କରିଛନ୍ତି।
