କଥାରେ ଅଛି ମା’ ସର୍ବସଂହା। ନିଜର ପିଲା ପାଇଁ ସେ କିଛି ବି କରିପାରେ। କେବେ ତାକୁ କାଖରେ ଧରି ସେ ମଜୁରିଆ ଭାବେ କାମ କରିପାରେ ତ କେବେ ପିଠିରେ ପକାଇ ନିଜର ଡ୍ୟୁଟି ମଧ୍ୟ କରିପାରେ। ଏଭଳି ଅନେକ ଦୃଶ୍ୟ ମା’ର ମହାନତାକୁ ବୟାନ କରେ। ଏହି କ୍ରମକୁ ଏବେ ଆଗକୁ ନେଇଛନ୍ତି ଜଣେ ମଡେଲ। ପ୍ରଥମ ଥର ପାଇଁ ମଡେଲଜଣଙ୍କ ହାତରେ ନିଜ କୁନି ଶିଶୁକୁ ଧରି ର଼୍ୟାମ୍ପ ଓ୍ବାକ୍ କରିଛନ୍ତି, ଯାହାକି ଏବେ ଚର୍ଚ୍ଚାର ବିଷୟ ପାଲଟିଛି।
ମଡେଲଜଣଙ୍କ ହେଲେ ଅଲିଶା ଗୌତମ ଉରାଓଁ। କିଛି ବର୍ଷ ଧରି ସେ ମଡେଲିଂ କରି ଆସୁଛନ୍ତି। ନିକଟରେ ସେ ଏକ ଆଦିବାସୀ ଫ୍ୟାଶନ ଶୋ’ରେ ଭାଗ ନେଇଥିଲେ। ସେଥିରେ ସେ ନିଜର ପରିଧାନ ସହ କୋଳରେ ଝିଅଙ୍କୁ ଧରି ର଼୍ୟାମ୍ପ ଓ୍ବାକ୍ କରିଥିଲେ। ଏହି ଶୋ’କୁ ଏବେ ସୁପରହିଟ୍ ବୋଲି କୁହାଯାଉଛି।
ଅଲିଶା ଏନେଇ କହିଛନ୍ତି, କିଛିଦିନ ପୂର୍ବେ ଏହି ଫ୍ୟାଶନ ଶୋ’ ହୋଇଥିଲା। ଏଥିରେ ସେ ତାଙ୍କ ଝିଅଙ୍କୁ ସାଙ୍ଗରେ ନେଇ ଯାଇଥିଲେ। ର଼୍ୟାମ୍ପ ଓ୍ବାକ୍ ସମୟରେ ଦଶ ମାସର ଝିଅ ନାୟରା ତାଙ୍କୁ ଛାଡ଼ିବାକୁ ଅମଙ୍ଗ ଥିଲେ। ସେ ତାଙ୍କୁ ଜାବୁଡ଼ି ଧରିଥିଲେ। ଏଥିଯୋଗୁ ତାଙ୍କ ପାଳି ଆସିବା ପରେ ସେ ଝିଅଙ୍କୁ ଧଳା ରଙ୍ଗର ଲୁଗାରେ ଗୁଡାଇ ର଼୍ୟାମ୍ପ ଓ୍ବାକ୍ କରିବାକୁ ଯାଇଥିଲେ। ଲୋକେ ତାହା ଦେଖି କ’ଣ ଭାବିବେ ସେ ଚିନ୍ତା କରି ନ ଥିଲେ। ହେଲେ ଲୋକଙ୍କ ତାଳି ସାଙ୍ଗକୁ ପ୍ରଶଂସା ଦେଖି ସେ ବିଭୋର ହୋଇଛନ୍ତି। ଯଦି ଜଣେ ମା’ ଛୁଆକୁ ନେଇ ବିଲରେ ଧାନ ରୁଇଁ ପାରୁଛି ତେବେ ର଼୍ୟାମ୍ପ ଓ୍ବାକ୍ କାହିଁକି ନୁହେଁ ବୋଲି ସେ ପ୍ରଶ୍ନ କରିଛନ୍ତି। ଛୁଆ ହୋଇଗଲେ କ୍ୟାରିୟର ଶେଷ ହୋଇଯିବ ତାହା ନୁହେଁ। ଦେଖନ୍ତୁ ଝିଅଙ୍କୁ ଧରି ର଼୍ୟାମ୍ପ ଓ୍ବାକ୍ କରିବା ପରେ ସମସ୍ତେ ତାଙ୍କୁ ଫୋନ୍ କରୁଛନ୍ତି। ତାଙ୍କ କାମର ଯଥାର୍ଥତା ତାଙ୍କୁୁ ମିଳିଛି ବୋଲି ସେ କହିଛନ୍ତି।
