ଲୋଇସିଂହା,୨୩ା୯(ସୁଶାନ୍ତ ବାରିକ): ବଲାଙ୍ଗୀର ଜିଲା ଲୋଇସିଂହା ବ୍ଲକ ଅନ୍ତର୍ଗତ ବାଦିବାହାଲ ଗ୍ରାମକୁ ବାହାର ଅଞ୍ଚଳର ଜଣେ ବେପାରୀ ଆସି ଘରଘର ବୁଲି ପିଡିଏସ୍ ଚାଉଳ କିଣି ନେଉଛନ୍ତି। ଯେଉଁମାନଙ୍କ ନିଜ ଖର୍ଚ୍ଚ ବାଦ ଚାଉଳ ବଳକା ରହୁଛି ସେମାନେ ବେପାରୀଙ୍କୁ ଚାଉଳ ବିକି ଦେଉଛନ୍ତି। ଅପରପକ୍ଷରେ ବସ୍ତିରେ ବହୁ ଗରିବ ଶ୍ରେଣୀ ଲୋକ ବାସ କରୁଛନ୍ତି। ପଞ୍ଚାୟତରୁ ମିଳୁଥିବା ପିଡିଏସ ଚାଉଳ ସେମାନଙ୍କ ଆବଶ୍ୟକତା ପୂରଣ କରି ପାରୁନି। ଏପରିସ୍ଥଳେ ସେମାନେ ବେପାରୀଙ୍କୁ ଦିଆଯାଉଥିବା ଦରରେ ଚାଉଳ କିଣିବାକୁ ଚାହୁଁଛନ୍ତି। ହେଲେ ସେମାନଙ୍କୁ ମିଳୁନାହିଁ। ଏହାକୁ ନେଇ ପଡ଼ାବାସୀ ଓ ସମ୍ପୃକ୍ତ ବେପାରୀଙ୍କ ମଧ୍ୟରେ ଛକାପଞ୍ଝା ଲାଗି ରହିଛି। କିଛି ଦିନ ତଳେ ବସ୍ତିର ଆଲୋକ ନାଗ, ଧର୍ମେନ୍ଦ୍ର ନାଗ, ଜୟସ୍ବର ବାଗ, ଶ୍ରବଣ ବାରିକ, ଗଦି ନାଗ, ସତ୍ୟନାରାୟଣ ବାଦି, ଦଧି ନାଗ, ଚକ୍ରଧର ନନ୍ଦ, କଷ୍ଟ ତନ୍ତୀ ପ୍ରମୁଖ ଚାଉଳ କ୍ରୟ ପାଇଁ ଆସିଥିବା ସମ୍ପୃକ୍ତ ବେପାରୀଙ୍କୁ ଗାଁକୁ ଆଉ ଚାଉଳ କ୍ରୟ କରିବାକୁ ନ ଆସିବାକୁ କହିଥିଲେ। ଏପରିକି ଚାଉଳ ବୋଝେଇ ଚାରିଚକିଆ ଯାନକୁ ଅଟକ ରଖିଥିଲେ। ହେଲେ ସେତେବେଳେ କେତେଜଣ ବ୍ୟକ୍ତି ସମ୍ପୂର୍ଣ୍ଣ ବେପାରୀଙ୍କୁ ସମର୍ଥନ ଜଣାଇଥିଲେ। ଏବେ ପୁଣିଥରେ ସେ ଆସି ଚାଉଳ କିଣି ନେଉଥିବାରୁ ହରିଜନ ବସ୍ତିବାସୀ ଅସନ୍ତୋଷ ପ୍ରକାଶ କରିଛନ୍ତି। ସ୍ଥିତିରେ ପରିବର୍ତ୍ତନ ନ ହେଲେ ସେମାନେ ଥାନା ଦ୍ବାରସ୍ଥ ହେବେ ବୋଲି କହିଛନ୍ତି।
