ଚିକିଟି,୨୬ା୨: ଗଞ୍ଜାମ ଜିଲା ଚିକିଟି ବ୍ଲକ ସୁନୁପୁର ସ୍ଥିତ ସମୁଦ୍ର ଉପକୂଳରେ ଏକ ବିରଳ ପ୍ରଜାତିର ହ୍ବେଲ୍ ସାର୍କ ଦେଖିବାକୁ ମିଳିଛି। ପର୍ଯ୍ୟଟକମାନେ ବେଳାଭୂମିରେ ବୁଲୁଥିବା ବେଳେ ହଠାତ୍ ସାର୍କଟି କୂଳକୁ ଆସିଥିବା ଦେଖିଥିଲେ। ଖବର ପ୍ରଚାର ହେବା ପରେ ବେଳାଭୂମିରେ ଲୋକଙ୍କ ଭିଡ଼ ଜମିଥିଲା। ଗ୍ରାମବାସୀ ବ୍ରହ୍ମପୁର ବନଖଣ୍ଡ ଅଧିକାରୀଙ୍କୁ ଜଣାଇବା ପରେ ଡିଏଫ୍ଓଙ୍କ ନିର୍ଦ୍ଦେଶରେ ଟାମଣା ଫରେଷ୍ଟର ରୂପକ କୁମାର ପ୍ରଧାନଙ୍କ ସମେତ ବନ କର୍ମଚାରୀ ପହଞ୍ଚତ୍ ଗ୍ରାମବାସୀଙ୍କ ସହାୟତାରେ ସାର୍କଟିକୁ ସମୁଦ୍ର ମଧ୍ୟକୁ ଛାଡିଥିଲେ।
୨୦୧୮ରୁ ୨୦୨୧ ମଧ୍ୟରେ ଏହି ବେଳାଭୂମିରେ ୩ ଥର ବିରଳ ପ୍ରଜାତିର ହ୍ବେଲ୍ ସାର୍କ ଦେଖିବାକୁ ମିଳିଲାଣି। ମାତ୍ର ସେମାନଙ୍କ ସୁରକ୍ଷା ଦିଗରେ ବନ ବିଭାଗ ଦୃଷ୍ଟି ଦେଉ ନ ଥିବା ଅଞ୍ଚଳବାସୀ କହିଛନ୍ତି। ଏ ସମ୍ପର୍କରେ ବ୍ରହ୍ମପୁର ବନଖଣ୍ଡ ଅଧିକାରୀ ଏ. କେ. ନାୟକ କହିଛନ୍ତି, ପ୍ରାୟ ୧୫ଫୁଟ ଲମ୍ବର ହ୍ବେଲ୍ ସାର୍କ ବେଳାଭୂମିକୁ ଆସିଥିଲା। ବାରମ୍ବାର ଏପରି ହ୍ବେଲ୍ ସାର୍କ ବେଳାଭୂମିକୁ ଆସୁଥିବାରୁ ସେମାନଙ୍କ ସୁରକ୍ଷା କ୍ଷେତ୍ରରେ ଲୋକଙ୍କୁ ସଚେତନ କରାଯିବ। ଏହାସହ ବେଳାଭୂମିକୁ ଆସୁଥିବା ପର୍ଯ୍ୟଟକମାନେ କିପରି ଆକୃଷ୍ଟ ହେବେ ବନ ବିଭାଗ ପକ୍ଷରୁ ବ୍ଲୁପ୍ରିଣ୍ଟ ପ୍ରସ୍ତୁତ କରାଯାଇଥିବା ସେ କହିଛନ୍ତି।
