ବରଗଡ଼ ଅଫିସ,୨୯।୭: ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ଚଳିତ ବର୍ଷ ମାଟ୍ରିକ ପରୀକ୍ଷା ଫଳ ବୁଧବାର ପ୍ରକାଶ ପାଇଛି। ଏଥିରେ ସବୁ ଜିଲାକୁ ଫଛରେ ପକାଇ ବରଗଡ଼ ଜିଲା ରାଜ୍ୟରେ ପ୍ରଥମ ସ୍ଥାନରେ ରହିଛି। ତେବେ ବରଗଡ଼ ସରସ୍ବତୀ ଶିଶୁ ବିଦ୍ୟା ମନ୍ଦିର (ଓଡିଆ ବିଭାଗ)ର ଦୁଇ ଛାତ୍ର ଅନ୍ବେଷ କୁମାର ସାହୁ ଏବଂ ପ୍ରବୀଣ କୁମାର ସାହୁ ୫୭୩ (୯୫.୫ ପ୍ରତିଶତ) ଲେଖାଏ ସମାନ ମାର୍କ ରଖି ଜିଲା ଟପ୍ପର ହୋଇଛନ୍ତି। ସ୍ଥାନୀୟ ଆଡ୍ଭୋକେଟ ମହେନ୍ଦ୍ର ସାହୁ ଓ ବାଳିକା ହାଇସ୍କୁଲର ଶିକ୍ଷୟିତ୍ରୀ ନନ୍ଦିନୀ ପ୍ରଧାନଙ୍କ ପୁଅ ଅନ୍ବେଷ ଭାରତୀୟ ପ୍ରଶାସନିକ ସେବା (ଆଇଏଏସ)ରେ କାର୍ଯ୍ୟ କରିବା ପାଇଁ ଲକ୍ଷ୍ୟ ରଖିଛନ୍ତି। ସେହିପରି ସ୍ଥାନୀୟ ଜର୍ଜ ହାଇସ୍କୁଲର ଶିକ୍ଷକ ଫକୀର ମୋହନ ସାହୁ ଓ ଗୃହିଣୀ କାଦମ୍ବିନୀ ସାହୁଙ୍କ ପୁଅ ପ୍ରବୀଣ ଜଣେ ବୈଜ୍ଞାନିକ ହେବା ତାଙ୍କ ଜୀବନର ଲକ୍ଷ୍ୟ ଥିବା କହିଛନ୍ତି। ତେବେ ଇଂରାଜୀରେ ୯୦ରୁ ଅଧିକ ମାର୍କ ମିଳିବ ବୋଲି ସେ ଆଶା ରଖିଥିବା ବେଳେ ୮୮ ମାର୍କ ମିଳିଛି ବୋଲି ପ୍ରବୀଣ କହିଛନ୍ତି।
