ଟୋକିଓ,୧୫।୫ (ଏପି): ଟୋକିଓ ଅଲିମ୍ପିକ୍ସ ଆୟୋଜନ କରିବା ନେଇ ଜାପାନ ସରକାର ତାଙ୍କର ଆଭିମୁଖ୍ୟ ପୁଣି ସ୍ପଷ୍ଟ କରିଛନ୍ତି। ଅଲିମ୍ପିକ୍ସ ଆୟୋଜନ ହେବାକୁ ଆଉ ମାତ୍ର ୨ ମାସ ବାକି ରହିଛି। ରାଜଧାନୀ ଟୋକିଓ ଓ ଅନ୍ୟ ୫ଟି ଅନ୍ୟ ସହରରୁ ଏବେ ୯ଟି ଅଞ୍ଚଳରେ ସରକାର କରୋନା ଭାଇରସ୍ ଇମର୍ଜେନ୍ସିକୁ ବଢ଼ାଇବାକୁ ନିଷ୍ପତ୍ତି ନେଇଛନ୍ତି। ଅଲିମ୍ପିକ୍ସ ପୂର୍ବରୁ ଜାପାନ କରୋନା ଭାଇରସ୍ ନେଇ ସଂଘର୍ଷ କରୁଛି। ଏବେ ଜାପାନର ଉତ୍ତରରେ ଥିବା ଦ୍ୱୀପ ରାଜ୍ୟ ହୋକାଇଡୋ, ହିରୋଶିମା ଓ ପଶ୍ଚିମ ଜାପାନର ଓକାୟାମାରେ ଇମର୍ଜେନ୍ସି ଲାଗୁ କରାଯିବ ବୋଲି କୁହାଯାଇଛି। ହୋକାଇଡୋରେ ଅଲିମ୍ପିକ୍ ମାରାଥନ ଆୟୋଜନ ହେବାର କାର୍ଯ୍ୟକ୍ରମ ରହିଛି।
ପୂର୍ବରୁ ଟୋକିଓ, ଓସାକା ଓ ଅନ୍ୟ ୪ଟି ଅଞ୍ଚଳରେ କରୋନା ସଂକ୍ରମଣ ପାଇଁ ବିଭିନ୍ନ କଟକଣା ଜାରି କରାଯାଇ ସାରିଛି। ଏହା ୩୧ ତାରିଖ ପର୍ଯ୍ୟନ୍ତ ଲାଗୁ ରହିବ। ଏହି ଅଞ୍ଚଳରେ ଥିବା ବାର୍, କରାଓକେ ପାର୍ଲର ଓ ମନୋରଞ୍ଜନ କାର୍ଯ୍ୟକ୍ରମକୁ ବାତିଲ କରାଯାଇଛି। ଯେଉଁ ବ୍ୟବସାୟୀମାନେ ନିୟମ ମାନିବେ ଓ ଜରିମାନାର ସମ୍ମୁଖୀନ ନ ହେବେ, ସେମାନଙ୍କୁ କ୍ଷତିପୂରଣ ଦିଆଯିବ ବୋଲି କୁହାଯାଇଛି। ଶୁକ୍ରବାର ଏ ନେଇ ପ୍ରାଧାନମନ୍ତ୍ରୀ ୟୋଶିହାଇଡ୍ ସୁଗା ଏନେଇ ଔପଚାରିକ ଭାବେ ଘୋଷଣା କରିବେ। ଅନ୍ୟ ଅଞ୍ଚଳକୁ ଇମର୍ଜେନ୍ସି ବଢ଼ାଇବା ସରକାରଙ୍କ ପ୍ରାରମ୍ଭିକ ଯୋଜନାଠାରୁ ଟିକିଏ ଭିନ୍ନ। ହିରୋଶିମାରେ ଆୟୋଜନ ହେବାକୁ ଥିବା ମଶାଲ ରାଲିକୁ ମଧ୍ୟ ଇତିମଧ୍ୟରେ ବାତିଲ କରାଯାଇଛି।
ଅଲିମ୍ପିକ୍ ଆୟୋଜନକୁ ଜାପାନରେ ପ୍ରବଳ ବିରୋଧ କରାଯାଉଛି। ଫଳରେ ସୁଗାଙ୍କ ସରକାର ଚାପରେ ରହିଛନ୍ତି। ବାରମ୍ବାର ଇମର୍ଜେନ୍ସି ନେଇ ଘୋଷଣା ହେବା ଓ ଟିକାକରଣରେ ମନ୍ଥରତା ଲୋକଙ୍କ ମଧ୍ୟରେ ଅସନ୍ତୋଷ ବଢାଇଛି। ଲୋକେ ମଧ୍ୟ ସରକାରଙ୍କୁ ସହଯୋଗ କରିବାକୁ ଅମଙ୍ଗ ହେଉଛନ୍ତି। ଏପର୍ଯ୍ୟନ୍ତ ୨ ପ୍ରତିଶତରୁ କମ୍ ଲୋକଙ୍କୁ ଟିକା ଦିଆଯାଇଛି। ଅଲିମ୍ପିକ୍ସକୁ ବାତିଲ କରିବାକୁ ସ୍ବାକ୍ଷରତା ଅଭିଯାନ ମଧ୍ୟ କରାଯାଇଛି। ୩ ଲକ୍ଷ ୫୦ ହଜାର ଲୋକଙ୍କ ସ୍ବାକ୍ଷର ସଂଗ୍ରହ କରାଯାଇ ସାରିଲାଣି। ଅଲିମ୍ପିକ୍ସ ଆୟୋଜନ ନେଇ ଖର୍ଚ୍ଚ ହେବାକୁ ଥିବା ଅର୍ଥ ମହାମାରୀ ବିରୋଧୀ ଲଢ଼େଇରେ ବିନିଯୋଗ ଓ ଲୋକଙ୍କୁ ଆର୍ଥିକ ସାହାଯ୍ୟ କରାଯିବା ଉଚିତ ବୋଲି କୁହାଯାଇଛି।
