ନୂଆଦିଲ୍ଲୀ,୧୫।୫(ପି.ଟି.): ପୂର୍ବତନ ଭାରତୀୟ ଓପନର ଡବ୍ଲ୍ୟ.ଭି. ରମଣଙ୍କୁ ହଠାତ୍ ଭାରତୀୟ ମହିଳା କ୍ରିକେଟ ଦଳର ହେଡ୍ କୋଚ୍ ପଦରୁ ବିଦା କରାଯିବା ପରେ ବିବାଦ ସୃଷ୍ଟି ହୋଇଛି। ପୂର୍ବତନ କ୍ରିକେଟ ମଦନ ଲାଲ୍ଙ୍କ ନେତୃତ୍ୱାଧୀନ କ୍ରିକେଟ ଉପଦେଷ୍ଟା କମିଟି (ସିଏସି), ସିଏସି ସଦସ୍ୟ ସୁଲକ୍ଷଣା ନାଏକ ଓ ନୀତୁ ଡେଭିଡ୍ଙ୍କ ଚୟନ କମିଟି ଏବେ ସନ୍ଦେହ ଘେରକୁ ଆସିଛନ୍ତି। ଏମାନେ ଏବେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ସନ୍ଦେହ ଘେରକୁ ଆସିଛନ୍ତି।
ରମଣଙ୍କ ତତ୍ତ୍ୱାବଧାନରେ ଭାରତୀୟ ମହିଳା ଦଳ ଗତବର୍ଷ ଅଷ୍ଟ୍ରେଲିଆରେ ଅନୁଷ୍ଠିତ ଟି୨୦ ବିଶ୍ୱକପ୍ର ଫାଇନାଲରେ ପ୍ରବେଶ କରିଥିଲା। ସେ ମଧ୍ୟ ଜଣେ ସଫଳ କୋଚ୍ ରୂପେ ଜଣାଶୁଣା ଥିଲେ। ତେବେ ସିଏସି ତାଙ୍କୁ ବହିଷ୍କାର କରି ପୂର୍ବତନ କ୍ରିକେଟର ରମେଶ ପାଓ୍ବାରଙ୍କୁ ଏହି ହାଇପ୍ରୋଫାଇଲ ପଦରେ ଗୁରୁବାର ନିଯୁକ୍ତ କରିଥିଲା। ପାଓ୍ବାରଙ୍କୁ ମଧ୍ୟ ଏହି ପଦରୁ ୨୦୧୮ରେ ବହିଷ୍କାର କରାଯାଇଥିଲା। ତେଣୁ ଲୋଧା କମିଟିର ନିୟମ ଅନୁସାରେ ମଦନ ଲାଲ୍ଙ୍କ ସିଏସି ବେଆଇନ କାର୍ଯ୍ୟ କରିଛି ବୋଲି ପ୍ରଶ୍ନ ଉଠାଇଛି। କେଉଁ ଭଳି ସ୍ଥିତିରେ ରମଣଙ୍କୁ ପଦରୁ ବହିଷ୍କାର କରାଗଲା ସେ ନେଇ ସନ୍ଦେହ ସୃଷ୍ଟି ହୋଇଛି।
ପୂର୍ବତନ ଭାରତୀୟ ଖେଳାଳି ସୁଲକ୍ଷଣା ନାଏକ ମୁମ୍ବାଇ କ୍ରିକେଟ ଆସୋସିଏଶନ ସମ୍ଭାଦକ ସଞ୍ଜୟ ନାଏକଙ୍କ ସାନ ଭଉଣୀ। ସେ ଏପର୍ଯ୍ୟନ୍ତ ସିଏସିର ୩ଟି ବୈଠକରେ ଅଂଶଗ୍ରହଣ କରିଛନ୍ତି। ଗତ ଦକ୍ଷିଣ ଆଫ୍ରିକା ସିରିଜରେ ଦଳ ଚୟନ ନେଇ ରମଣ ଅସନ୍ତୋଷ ଜାହିର କରିଥିଲେ। ବ୍ୟାଟିଂ ସେନସେସନ ଶେଫାଳୀ ବର୍ମା ଓ ଶିଖା ପାଣ୍ଡେଙ୍କୁ ଦକ୍ଷିଣ ଆଫ୍ରିକା ଦିନିକିଆ ସିରିଜରେ ସାମିଲ କରାଯାଇ ନ ଥିଲ। ଏ ନେଇ ରମଣ ଓ ଚୟନ କମିଟି ମଧ୍ୟରେ ମତପାର୍ଥକ୍ୟ ଦେଖାଦେଇଥିଲା। ତେଣୁ ବିଭିନ୍ନ କାରଣ ନେଇ ରମଣ ଓ ଅନ୍ୟମାନଙ୍କ ମଧ୍ୟରେ ତିକ୍ତତା ଦେଖାଦେଇଥିଲା। ଯାହା ଫଳରେ ରମଣଙ୍କୁ ପଦରୁ ହଟାଯିବାର ଅଭିଯୋଗ ହୋଇଛି। କିନ୍ତୁ ଏଥିପାଇଁ ସିଏସି, ନୀତୁ ଓ ନାଏକ ଏବେ ସନ୍ଦେହ ଘେରକୁ ଆସିଛନ୍ତି।
ଗାଙ୍ଗୁଲି, ଡ୍ରାଭିଡ୍ଙ୍କୁ ରମଣଙ୍କ ଚିଠି
ଏ ସଂକ୍ରାନ୍ତରେ ରମଣ ବସିସିଆଇ ସଭାପତି ସୌରଭ ଗାଙ୍ଗୁଲି ଓ ଜାତୀୟ କ୍ରିକେଟ ଏକାଡେମୀ (ଏନ୍ସିଏ ) ଅଧ୍ୟକ୍ଷ ରାହୁଲ ଡ୍ରାଭିଡ୍ଙ୍କୁ ଚିଠି ଲେଖି ନିଜର ଅସନ୍ତୋଷ ଜାହିର କରିଛନ୍ତି। ପ୍ରଥମେ ମହିଳାଙ୍କୁ ଅଗ୍ରାଧିକାର ଦେବାର ସଂସ୍କୃତି ତଥା ଚଳଣି ଭାରତୀୟ ମହିଳା ଦଳରେ ରହିଛି ଓ ଏଥିରେ ପରିବର୍ତ୍ତନର ଆବଶ୍ୟକତା ରହିଛି ବୋଲି ରମଣ ଚିଠିରେ ଉଲ୍ଲେଖ କରିଛନ୍ତି। ଏଥିସହ ରମଣ ଭାରତୀୟ ମହିଳା କ୍ରିକେଟ ପାଇଁ ଏକ ରୋଡ ମ୍ୟାପ୍ ପ୍ରସ୍ତୁତ କରି ଗାଙ୍ଗୁଲି ଓ ଡ୍ରାଭିଡ୍ଙ୍କୁ ମେଲ୍ କରିଛନ୍ତି। କ୍ରିକେଟ ପାଇଁ ଦଳ ସବୁଠାରୁ ବଡ଼। କୌଣସି ଜଣେ ବା ଦୁଇଜଣଙ୍କୁ ଗୁରୁତ୍ୱ ଦିଆଯିବାର ଆବଶ୍ୟକତା ନାହିଁ ବୋଲି ସେ କହିଛନ୍ତି। ପ୍ରଥମେ ମହିଳା ସଂସ୍କୃତିକୁ ହଟାଇବାକୁ ପଡିବ ବୋଲି ସେ କହିଛନ୍ତି।
