ଭଞ୍ଜନଗର,୧୨। ୩(ବାବୁଲା ପ୍ରଧାନ)-ବର୍ତ୍ତମାନ ସମୟରେ ବ୍ୟବସାୟିକ ଉଦ୍ଦେଶ୍ୟରେ ଖୋଲା ମଞ୍ଚ ନାଟକର ଚାହିଦା ବୃଦ୍ଧି ପାଉଥିବା ବେଳେ ଗଞ୍ଜାମ ଜିଲା ଭଞ୍ଜନଗରଠାରେ ବିଗତ ୪୦ ବର୍ଷ ହେଲା ସ୍ଥାନୀୟ କଳାକାରଙ୍କୁ ନେଇ ମଞ୍ଚ ନାଟକ ପରିବେଷଣ କରାଯାଉଛି। ଚଳିତ ବର୍ଷ ଅନୁଷ୍ଠାନର ବାର୍ଷିକ ଉତ୍ସବ ପାଳନ ଅବସରରେ ମଙ୍ଗଳବାର ଓ ବୁଧବାର ଧନଞ୍ଜୟ ନଗରଠାରେ ସ୍ଥାନୀୟ କଳାକାରଙ୍କୁ ନେଇ ୨ ଟି ନାଟକ ‘ଜାଲ’ ଓ ‘ଆସନ୍ତାକାଲିର ସୂର୍ଯ୍ୟ’ ପରିବେଷଣ କରାଯାଇଛି। ଏହାକୁ ଗଙ୍ଗାଧର ବିଷୋୟୀ ରଚନା କରିଥିବା ବେଳେ ଅଭିମନ୍ୟୁ ବିଷୋୟୀ ନିର୍ଦ୍ଦେଶନା ଦେଇଥିଲେ।
ପ୍ରଥମ ଦିବସରେ ମୁଖ୍ୟ ଅତିଥି ରୂପେ ଭଞ୍ଜନଗର ଗୋଷ୍ଠୀ ଉନ୍ନୟନ ଅଧିକାରୀ ଭାରତୀ ଦେବୀ ଯୋଗ ଦେଇ କାର୍ଯ୍ୟକ୍ରମକୁ ଉଦଘାଟନ କରିଥିଲେ। ଏଥିରେ ମୁଖ୍ୟବକ୍ତା ଭାବେ ବରିଷ୍ଠ ନିର୍ଦ୍ଦେଶକ ଉପେନ୍ଦ୍ର କୁମାର ଶତପଥୀ, ଅନୁଷ୍ଠାନର ସଭାପତି ଗରୀବ ସ୍ୱାଇଁ, ଉପଦେଷ୍ଟା ରୋଟାରିଆନ ରଞ୍ଜିତ କୁମାର ବାରିକ, ସମ୍ପାଦକ କଣ୍ଟୁ ପାଣିଗ୍ରାହୀ ମଞ୍ଚାସୀନ ହୋଇ ଅନୁଷ୍ଠାନ ପକ୍ଷରୁ ବହୁ ବର୍ଷ ଧରି କଳା ପରିବେଷଣ କରିବା ସହ ନୂତନ କଳାକାରଙ୍କୁ ମଞ୍ଚ ନାଟକରେ ସୁଯୋଗ ମିଳୁଥିବାରୁ ସେମାନେ ଆଗାମୀ ଦିନରେ ଅଭିନୟ କ୍ଷେତ୍ରରେ ବେଶ ପ୍ରଶଂସିତ ହୋଇପାରିବେ ବୋଲି କହିଥିଲେ ।
