ପୃଥିବୀରେ ଦେଖାଯାଉଥିବା ଜଟିଳ ତଥା ବଂଶାନୁକ୍ରମିକ ରୋଗ ମଧ୍ୟରେ ‘ହେମୋଫିଲିଆ’ ଅନ୍ୟତମ। ଏହି ରୋଗ ସମ୍ପର୍କରେ ଜନସଚେତନତା ସୃଷ୍ଟି ଲାଗି ପ୍ରତିବର୍ଷ ଏପ୍ରିଲ ୧୭ ତାରିଖକୁ ‘ବିଶ୍ୱ ହେମୋଫିଲିଆ ଦିବସ’ ଭାବରେ ପାଳନ କରାଯାଇ ଆସୁଅଛି। ଚଳିତବର୍ଷ ଏହି ଦିବସର ଥିମ୍ ରହିଛି- ‘ପରିବର୍ତ୍ତନକୁ ଗ୍ରହଣ କରି ନୂତନ ବିଶ୍ୱରେ ଦୀର୍ଘସ୍ଥାୟୀ ସେବାକୁ ଗୁରୁତ୍ୱ ଦେବା’। ଆମେ ପରସ୍ପର ମାନସିକ ସ୍ତରରେ ଏକାଠି ହୋଇ ଏହାର ପ୍ରତିକାର ନିମନ୍ତେ ଜନସଚେତନତା ସୃଷ୍ଟି କରିବାର ଆବଶ୍ୟକତା ରହିଛି; ଯଦ୍ଦ୍ବାରା ଉକ୍ତ ରୋଗରେ ପୀଡ଼ିତ ବହୁ ବ୍ୟକ୍ତି ଏହାର କୁପ୍ରଭାବରୁ ରକ୍ଷା ପାଇପାରିବେ।
ଏହି ରୋଗ ସମ୍ପର୍କରେ ଡା. ବସନ୍ତ କୁମାର ଷଡ଼ଙ୍ଗୀ କହନ୍ତି, ”ଚିକିତ୍ସା ଶାସ୍ତ୍ରର ଅଧ୍ୟୟନରୁ ଜଣାଯାଏ ଯେ, ଏହି ରୋଗ ଇଂଲଣ୍ଡର ଭିକ୍ଟୋରିଆ ରାଜ ପରିବାରରେ ପ୍ରଥମେ ଦେଖାଦେଇଥିଲା। ହେମୋଫିଲିଆର ଅର୍ଥ ‘ଅସ୍ବାଭାବିକ ରକ୍ତସ୍ରାବ’ ଅର୍ଥାତ୍, ମନୁଷ୍ୟ ଶରୀରର କୌଣସି ଅଙ୍ଗପ୍ରତ୍ୟଙ୍ଗରେ ଆଘାତ ହେବା କାରଣରୁ କ୍ଷତ ହେଲେ ଉକ୍ତ ସ୍ଥାନରୁ ଅଧିକ ତଥା ଦୀର୍ଘସମୟ ଧରି ରକ୍ତସ୍ରାବ ହୋଇଥାଏ। କେବଳ ସେତିକି ନୁହେଁ, ରକ୍ତ ଶୀଘ୍ର ଜମାଟ ବାନ୍ଧି ନ ଥାଏ। ସାଧାରଣ ମନୁଷ୍ୟଙ୍କଠାରେ କୌଣସି କ୍ଷତ ହେଲେ ନିର୍ଦ୍ଦିଷ୍ଟ ସମୟ ଭିତରେ ରକ୍ତସ୍ରାବ ସ୍ବାଭାବିକ ଭାବେ ବନ୍ଦ ହେଉଥିବାବେଳେ ଏହି ରୋଗରେ ପୀଡ଼ିତ ବ୍ୟକ୍ତିଙ୍କଠାରେ ଏହା ଅସ୍ବାଭାବିକ ତଥା ଅନିର୍ଦ୍ଦିଷ୍ଟ ସମୟ ଯାଏ ରକ୍ତସ୍ରାବ ଦେଖାଦେଇଥାଏ। ହେମୋଫିଲିଆ ପୁରୁଷଙ୍କଠାରେ ଅଧିକ ଦେଖାଦେଇଥାଏ l ଏହା ଏକ ବଂଶାନୁକ୍ରମିକ ରୋଗ। ହେମୋଫିଲିଆ ରୋଗୀ ସର୍ବଦା ସନ୍ତୁଳିତ ଖାଦ୍ୟ ଖାଇବା ଜରୁରୀ। ଭିଟାମିନ୍- ‘କେ’ଯୁକ୍ତ ଖାଦ୍ୟ ଖାଇବା ସହ କୌଣସି କାରଣରୁ ଶରୀର କ୍ଷତ ହେବାଠାରୁ ଦୂରେଇ ରହିବା ନିମନ୍ତେ ସତର୍କତା ଅବଲମ୍ବନ କରିବା ଆବଶ୍ୟକ। ଦୈନନ୍ଦିନ
କାର୍ଯ୍ୟ ତଥା ଗାଡ଼ି ମୋଟରରେ ଯାତାୟାତ ବେଳେ ସତର୍କ ରହିବା ଜରୁରୀ। ନିଜର ବୟସ ଅନୁଯାୟୀ ଓଜନ ଠିକ୍ ରଖିବା ସହ ଶରୀରର ଦୁର୍ବଳତା ଦୂର ପାଇଁ ସତର୍କ ରହିବା, ବ୍ଲଡପ୍ରେସର, ଡାଇବେଟିସ୍ ଆଦିଠାରୁ ଦୂରେଇ ରହିବା ନିମନ୍ତେ ଯତ୍ନବାନ ହେବା ଆବଶ୍ୟକ। କୌଣସି କାରଣରୁ ଶରୀରରେ କ୍ଷତ ଘଟିଲେ ତୁରନ୍ତ ଡାକ୍ତରଙ୍କ ପରାମର୍ଶ ନେବା ଜରୁରୀ l
