ଗଞ୍ଜାମ,(ବିଦ୍ୟାଧର ସାହୁ): ଗଞ୍ଜାମ ସହରର ବଡ଼ ବଜାର ସ୍ଥିତ ପୋଷ୍ଟ ଅଫିସର କର୍ମଚାରୀମାନଙ୍କ ମନମୁଖୀ ଆଚରଣ ନେଇ ଗ୍ରାହକମାନେ ଅତିଷ୍ଠ ହୋଇପଡ଼ିଛନ୍ତି। ଏମିତିକି ଗ୍ରାହକମାନଙ୍କ ସହ କର୍ମଚାରୀମାନେ ଦୁର୍ବ୍ୟବହାର କରୁଥିବା ଅଭିଯୋଗ ଉଠୁଛି।
ସ୍ଥାନୀୟ ଅଞ୍ଚଳର ଅଭିମନ୍ୟୁ ଆଚାର୍ଯ୍ୟ (ବାବୁଲା) ନାମକ ଜଣେ ବ୍ୟକ୍ତି ନିଜ ଖାତାରେ ଟଙ୍କା ଜମା କରିବା ପରେ ଖାତା ଅପଡେଟ ପାଇଁ ପୋଷ୍ଟ ଅଫିସ କର୍ମଚାରୀଙ୍କୁ ଅନୁରୋଧ କରିଥିଲେ। କିନ୍ତୁ “ମେଶିନ ଖରାପ ଅଛି, କାଲି ଆସ” ବୋଲି କହିବା ପରେ ସେ ଫେରିଯାଇଥିଲେ।
ପରେ ଖାତା ଅପଡେଟ କରିବା ପାଇଁ ସେ ଚାରିଥର ପୋଷ୍ଟ ଅଫିସକୁ ଯାଇଥିଲେ। ତଥାପି କାମ ନ ହେବାରୁ କର୍ମଚାରୀ ଜଣେ “ବାରମ୍ବାର କାହିଁକି ଆସୁଛ? ଆମକୁ କଣ ସୁଖ ଲାଗୁଛି? ଯାଅ, ଜୟଶ୍ରୀ କେମିକାଲ୍ ନିକଟରେ ଥିବା ପୋଷ୍ଟ ଅଫିସକୁ ଯାଅ” ବୋଲି କହି ଦୁର୍ବ୍ୟବହାର କରିଥିବା ଅଭିଯୋଗ ବାବୁଲା ଗଣମାଧ୍ୟମ ସମ୍ମୁଖରେ କହିଛନ୍ତି।
ବାବୁଲାଙ୍କ ପରି ଅନେକ ଗ୍ରାହକ ଏଭଳି ଦୁର୍ବ୍ୟବହାରର ଶିକାର ହେଉଥିବା ନେଇ ସହରରେ ଆଲୋଚନା ହେଉଛି।ଏହି ପରିସ୍ଥିତିକୁ ନେଇ ସ୍ଥାନୀୟ ଅଞ୍ଚଳବାସୀ ପ୍ରଶାସନଙ୍କୁ ଦୃଷ୍ଟିଆକର୍ଷଣ କରି ତୁରନ୍ତ ପଦକ୍ଷେପ ନେବାକୁ ଦାବି କରିଛନ୍ତି।
