ନୂଆଦିଲ୍ଲୀ,୨୯।୬: ହନି ଟ୍ରାପ୍ରେ ପଡ଼ି କାଙ୍ଗାଳ ହେଲେ ଯୁବକ। ଡେଟିଂ ଆପ୍ରେ ସୁନ୍ଦରୀ ଯୁବତୀଙ୍କୁ ପସନ୍ଦ କରି ଠକାମିର ଶିକାର ହେଲେ ସିଭିଲ ସର୍ଭିସ ଆଶାୟୀ। କିଛି ବୁଝିବା ଆଗରୁ ରେଷ୍ଟୁରାଣ୍ଟ ବିଲ୍ ହୋଇଗଲା ୧.୨ ଲକ୍ଷ ଟଙ୍କା।
ଘଟଣା ମୁତାବକ ନିକଟରେ ‘ଟିଣ୍ଡର’ ଡେଟିଂ ଆପ୍ରେ ପରିଚିତ ହୋଇଥିବା ଅଭିଯୁକ୍ତ ଯୁବତୀ ‘ବର୍ଷା’ଙ୍କ ଜନ୍ମଦିନ ପାଳନ କରିବାକୁ ଠକାମିର ଶିକାର ହୋଇଥିବା ଯୁବକ ପୂର୍ବ ଦିଲ୍ଲୀରେ ଥିବା ”ବ୍ଳାକ୍ ମିରର୍ କାଫେ” ରେ ପହଞ୍ଚିଥିଲେ। ସେଠାରେ ସେମାନେ କିଛି ସ୍ନାକ୍ସ, ଦୁଇଟି କେକ୍ ଏବଂ ଚାରୋଟି ମୃଦୁପାନୀୟ ଅର୍ଡର କରିଥିଲେ। ତେବେ ହଠାତ୍ ବର୍ଷା ପରିବାରରେ କୌଣସି ଜରୁରୀ କାରଣ ପାଇଁ ସେଠାରୁ ଚାଲିଯିବା ପର୍ଯ୍ୟନ୍ତ ଡେଟିଂ ବହୁତ ସୁନ୍ଦର ଚାଲିଥିଲା।
ଏହାପରେ ଯୁବକ ଜଣକ ବାକିଥିବା ଖାଦ୍ୟ ଖାଇବା ପରେ ଯେତେବେଳେ ପେମେଣ୍ଟ କରିବାକୁ ବାହାରିଥିଲେ, ରେଷ୍ଟୁରାଣ୍ଟ ବିଲ୍ ଦେଖି ତାଙ୍କ ମୁଣ୍ଡ ଘୁରାଇ ଦେଇଥିଲା। କାରଣ ସାମାନ୍ୟ କିଛି ସ୍ନାକ୍ସ, ଦୁଇଟି କେକ୍ ଏବଂ ଚାରୋଟି ମୃଦୁପାନୀୟ ପାଇଁ ବିଲ୍ ୧,୨୧,୯୧୭.୭୦ ଟଙ୍କା ଆସିଥିଲା। ଯାହା ପ୍ରକୃତରେ ମାତ୍ର କିଛି ହଜାର ଟଙ୍କା ହେବା କଥା।
ଯୁବକ ଜଣକ ତୁରନ୍ତ ଏହି ବିଲ୍ ଉପରେ ପ୍ରତିବାଦ କରିଥିଲେ କିନ୍ତୁ ତାଙ୍କୁ ଧମକ ଦିଆଯାଇଥିଲା ଏବଂ ପେମେଣ୍ଟ ଦେବାକୁ ବାଧ୍ୟ କରାଯାଇଥିଲା। ଅକଳରେ ପଡ଼ି ଯୁବକ କାଫେ ମାଲିକଙ୍କ ମଧ୍ୟରୁ ୩୨ ବର୍ଷ ବୟସ୍କ ଅକ୍ଷୟ ପହୱାଙ୍କୁ ଅନଲାଇନରେ ଟଙ୍କା ପେମେଣ୍ଟ କରିଥିଲେ। ପହୱା ପୂର୍ବ ଦିଲ୍ଲୀର ଶାହାଦର ବାସିନ୍ଦା ଏବଂ ଦଶମ ଶ୍ରେଣୀ ପର୍ଯ୍ୟନ୍ତ ପାଠ ପଢ଼ିଛନ୍ତି।
ତେବେ ଯୁବକ ଜଣକ ସେଠାରୁ ସିଧାସଳଖ ପୋଲିସ ପାଖକୁ ଯାଇ ଅଭିଯୋଗ କରିଥିଲେ। ଅଭିଯୋଗ ପାଇ ପୋଲିସ ଏହି ଘଟଣାର ତଦନ୍ତ କରିବାକୁ ବାହାରିଥିଲା ଏବଂ ଇନ୍ସପେକ୍ଟର ସଞ୍ଜୟ ଗୁପ୍ତାଙ୍କ ନେତୃତ୍ୱରେ ଏକ ଚାରିଜଣିଆ ଟିମ୍ ଗଠନ କରିଥିଲା। ପୋଲିସ ତ୍ୱରିତ କାର୍ଯ୍ୟାନୁଷ୍ଠାନ ଗ୍ରହଣ କରି ପହୱା’ଙ୍କୁ ଗିରଫ କରିଥିଲା।
ତଦନ୍ତ ବେଳେ ‘ପହୱା’ ପୋଲିସକୁ କହିଥିଲେ ଯେ ‘ବ୍ଲାକ୍ ମିରର୍ କାଫେ’ ତାଙ୍କ ବନ୍ଧୁ ଅଂଶ ଗ୍ରୋଭର ଏବଂ ୱାନ୍ସ ପହୱାଙ୍କର ଅଟେ। ଅକ୍ଷୟ ଏବଂ ବଂଶ ସମ୍ପର୍କୀୟ ହୋଇଥିବାବେଳେ ଅନଶ ସେମାନଙ୍କର ବନ୍ଧୁ ଅଟନ୍ତି। ଏହି କାଫେରେ ଆର୍ଯ୍ୟନ୍ ନାମକ ଜଣେ ବ୍ୟକ୍ତିଙ୍କ ସମେତ ଅନେକ “ଟେବୁଲ୍ ମ୍ୟାନେଜର” ନିୟୋଜିତ ହୋଇଥିଲେ; ଏବଂ ଏହି “ଟେବୁଲ୍ ମ୍ୟାନେଜର୍” ମାନେ ଜଣେ ଡିଗ୍ରାନସୁଙ୍କ ଦ୍ୱାରା ପରିଚାଳିତ ବୋଲି ସେ କହିଥିଲେ। ତେବେ ଆର୍ଯ୍ୟନ୍ ସପ୍ତମ ଡ୍ରପ୍ ଆଉଟ୍ ଏବଂ ବର୍ତ୍ତମାନ ବେକାର ବୋଲି ଜଣା ପଡ଼ିଥିଲା।
ପହୱା ମଧ୍ୟ ଛଦ୍ମନାମ (ବର୍ଷା) ୨୫ ବର୍ଷିୟ ଆଫସାନ୍ ପରଓ୍ବିନଙ୍କୁ ଏହି ଠକାମିରେ ନିୟୋଜିତ କରିଥିଲେ, ଯିଏ ଆୟେଶା ଏବଂ ନୁର ନାମରେ ମଧ୍ୟ ଯୁବକଙ୍କୁ ଫସାଇଛନ୍ତି। ଯେତେବେଳେ ପୋଲିସ୍ ପରଓ୍ବିନଙ୍କୁ ଖୋଜା ଖୋଜି କରିଥିଲା ସେ ସମୟରେ ପରଓ୍ବିନ ଅନ୍ୟ ଏକ କାଫେରେ ଥିଲେ। ସେଠାକୁ ମୁମ୍ବାଇର ଜଣେ ବ୍ୟକ୍ତିଙ୍କ ସହ ସେ ଯାଇଥିଲେ, ଯାହାଙ୍କ ସହିତ ତାଙ୍କର ସାକ୍ଷାତ Shaadi.com ରେ ହୋଇଥିଲା।
ଧରାପଡ଼ିବା ପରେ ପରଓ୍ବିନ ସେମାନଙ୍କ ଠକାମିର ସମସ୍ତ ଖୁଲାସା ପୋଲିସ ନିକଟରେ କରିଥିଲେ।
ଆର୍ଯ୍ୟନ୍ ଡେଟିଂ ଆପ୍ରେ ପୀଡିତ(ଠକାମିର ଶିକାର ହୋଇଥିବା ଯୁବକ)ଙ୍କ ନିକଟରେ ପହଞ୍ଚି ବର୍ଷା ବୋଲି ନିଜର ପରିଚୟ ଦେଇ ତାଙ୍କ ସହ ଯୋଗାଯୋଗ କରିଥିଲେ। ସେ ପରଓ୍ବିନଙ୍କ ଫଟୋକୁ ଗୋଟିଏ ଥର ଦେଖିବା ମୋଡରେ ସେୟାର କରିଥିଲେ ଏବଂ ତାଙ୍କ ଜନ୍ମଦିନ ପାଳନ କରିବା ପାଇଁ ତାଙ୍କୁ ଜୁନ୍ ୨୩ ରେ ଲକ୍ଷ୍ମୀ ନଗରକୁ ନିମନ୍ତ୍ରଣ କରିଥିଲେ।
କାଫେରେ ପରଓ୍ବିନ ପାରିବାରିକ ଜରୁରୀକାଳୀନ ବାହାନା କରି ଯୋଜନା ଅନୁଯାୟୀ ସେଠାରୁ ପଳାଇଯାଇଥିଲେ ଏବଂ କାଫେ ବିଲ୍ ଯୁବକଙ୍କ ମୁଣ୍ଡରେ ଲଦି ଦେଇଥିଲେ।
ଏହି ଠକାମୀ ଯୋଜନା ଅନୁଯାୟୀ ପରଓ୍ବିନଙ୍କୁ ୧୫ %, ଟେବୁଲ୍ ଏବଂ କାଫେ ମ୍ୟାନେଜରମାନଙ୍କ ମଧ୍ୟରେ 45% ଏବଂ ଅବଶିଷ୍ଟ 40% ଟଙ୍କା ମାଲିକମାନଙ୍କୁ ଦିଆଯାଏ।
ତେବେ ଏହି ଘଟଣା ପରେ ସାଧାରଣ ଲୋକମାନଙ୍କଠାରୁ ଟଙ୍କା ଲୁଟିବା ପାଇଁ ଦିଲ୍ଲୀ-ଏନସିଆର, ମୁମ୍ବାଇ, ବାଙ୍ଗାଲୋର ଏବଂ ହାଇଦ୍ରାବାଦ ସମେତ ପ୍ରମୁଖ ମେଟ୍ରୋ ସହରରେ ଏହିପରି ଅନେକ ଠକାମୀ କରାଯାଉଛି ବୋଲି ପୋଲିସ କହିଛି।
ଏହି ଠକାମିରେ କାଫେ ମାଲିକ, ମ୍ୟାନେଜରଏବଂ ଅନ୍ୟମାନଙ୍କ ସହିତ ଜଡିତ ଏକ ସୁଚିନ୍ତିତ ଯୋଜନାରେ କାର୍ଯ୍ୟ କରୁଛନ୍ତି। ଯେଉଁମାନେ ଡେଟିଂ ଆପରେ ଯୁବକମାନଙ୍କୁ ଫସାଇ ମୋଟା ଅଙ୍କର ଟଙ୍କା ଲୁଟୁଛନ୍ତି।
ତେବେ ଏହି ମାମଲାରେ ପୋଲିସ ପରଓ୍ବିନ ଏବଂ ପହୱାଙ୍କୁ ଗିରଫ କରି ସେମାନଙ୍କ ଫୋନ ଏବଂ କାଫେ ରେଜିଷ୍ଟର ଜବତ କରିଛି। ପୋଲିସ ତଦନ୍ତ ଜାରି ରଖିଥିଲା ବେଳେ ଅନ୍ୟ ଅଭିଯୁକ୍ତଙ୍କୁ ଗିରଫ କରିବା ପାଇଁ ଉଦ୍ୟମ ଚଳାଇଛି।
