ଅକଲାଣ୍ଡ,୨୯।୬: ଟିମ୍ ଇଣ୍ଡିଆ ବିପକ୍ଷ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲରେ ନ୍ୟୁଜିଲାଣ୍ଡ ପେସର ଟିମ୍ ସୌଦି ପିନ୍ଧିଥିବା ଜର୍ସିକୁ ନିଲାମ କରିବାକୁ ଯାଉଛନ୍ତି। ଏହି ପ୍ରକ୍ରିୟାରୁ ଆୟ ହେବାକୁ ଥିବା ଅର୍ଥ ବିରଳ କର୍କଟ ରୋଗର ପୀଡ଼ିତ ୮ ବର୍ଷୀୟା କୁନି ଝିଅର ଚିକିତ୍ସାରେ ଖର୍ଚ୍ଚ ହେବ। ଏହି ଶାର୍ଟରେ ରହିଛି ନ୍ୟୁଜିଲାଣ୍ଡ ଦଳୀୟ ଖେଳାଳିଙ୍କ ହସ୍ତାକ୍ଷର।
୨୦୧୮ଠାରୁ ନ୍ୟୁରୋବ୍ଲାଷ୍ଟୋମା ନାମକ ବିରଳ କର୍କଟ ରୋଗରେ ପୀଡ଼ିତ ୮ ବର୍ଷୀୟା ହୋଲି ବେଟି। ୩୨ ବର୍ଷୀୟ ପେସର କିଛି ବର୍ଷ ତଳେ ବେଟିଙ୍କ ସ୍ବାସ୍ଥ୍ୟାବସ୍ଥା ସମ୍ପର୍କରେ ଜାଣିବାକୁ ପାଇଥିଲେ। ସେବେଠୁ ସେ ତାଙ୍କୁ ଚିକିତ୍ସାରେ ସାହାଯ୍ୟ କରିବାକୁ ଉଦ୍ୟମ କରୁଛନ୍ତି।
”ହୋଲିଙ୍କୁ ସମର୍ଥନ କରିବା ପାଇଁ ଡବ୍ଲ୍ୟୁଟିସି ଫାଇନାଲରେ ପିନ୍ଧିଥିବା ଶାର୍ଟକୁ ନିଲାମ କରୁଛି। ଏଥିରୁ ଆୟ ହେବାକୁ ଥିବା ସମସ୍ତ ଅର୍ଥ ବେଟିଙ୍କ ପରିବାରକୁ ପ୍ରଦାନ କରାଯିବ। କିଛି ବର୍ଷ ତଳେ ତାଙ୍କ କାହାଣୀ ସମ୍ପର୍କରେ ଜାଣିବାକୁ ପାଇଥିଲା ମୋ ପରିବାର। ଅଧିକ ଚିକିତ୍ସା ଦରକାର ଥିବା ଜାଣିବାକୁ ପାଇବା ପରେ ତାଙ୍କୁ ସାହାଯ୍ୟ କରିବା ପାଇଁ ମୁଁ ବାଟ ଖୋଜୁଥିଲି। ଆଶା କରୁଛି, ଏହି ଶାର୍ଟ ମାଧ୍ୟମରେ ବେଟିଙ୍କ ପରିବାରକୁ ମୁଁ ସାହାଯ୍ୟ କରିପାରିବି। ଜଣେ ବାପା ହିସାବରେ ବେଟିଙ୍କ ପ୍ରତି ମୋ ସମବେଦନା ରହିଛି“ ବୋଲି ସୌଦି ଇନଷ୍ଟାଗ୍ରାମରେ ଜର୍ସିର ଫଟୋ ସହ ଲେଖିଛନ୍ତି।
