ଦିଗପହଣ୍ଡି,୧୦ା୫(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ଫରେଷ୍ଟ ରେଞ୍ଜ ଅଧୀନ ରତନେଇ ରେଖାଙ୍କିତ ସଂରକ୍ଷିତ ଜଙ୍ଗଲ ଜକର ଫରେଷ୍ଟ ବିଟ୍ର ଜକର ଗ୍ରାମ ନିକଟ ମା’ ରତନେଇ ମନ୍ଦିର ପାଖରେ ବାଘ ଆତଙ୍କ ଲାଗି ରହିଛି। ବାଘ ଜଣେ ବ୍ୟକ୍ତିଙ୍କ ଗୁହାଳରେ ପଶି ୩ ଛେଳି ନେଇ ଖାଇଦେଇଥିବା ଅଭିଯୋଗ ହୋଇଛି। ଶନିବାର ଅପରାହ୍ନରେ କିଛି ବ୍ୟକ୍ତି କାର୍ ଓ ବାଇକ୍ରେ ଦିଗପହଣ୍ଡିରୁ ଚିକିଟି ଅଭିମୁଖେ ଯାଉଥିବା ବେଳେ ଏକ କଲରା ପତରିଆ ବାଘ (ଲିଓପାର୍ଡ)କୁ ଦେଖି ମୋବାଇଲରେ ଭିଡିଓ ଓ ଫୋଟ ଉଠାଇ ଭାଇରାଲ କରିଥିଲେ। ଖବର ପ୍ରଚାରିତ ହେବା ପରେ ଗ୍ରାମ ସମେତ ଆଖପାଖ ଗ୍ରାମର ବହୁ ସଂଖ୍ୟକ ବ୍ୟକ୍ତି ବାଘ ଦେଖିବାକୁ ସେଠାରେ ପହଞ୍ଚିଥିଲେ।
ଏନେଇ ଦିଗପହଣ୍ଡି ବନ ବିଭାଗ କାର୍ଯ୍ୟାଳୟକୁ ସୂଚନା ଦିଆଯିବା ପରେ ରବିବାର ସକାଳେ ରେଞ୍ଜର ଦିବ୍ୟରଞ୍ଜନ ସାହୁ, ଚିକିଟି ଫରେଷ୍ଟର କାମନା ଭୂୟାଁ, ଫରେଷ୍ଟ ଗାର୍ଡ ମିତାରାଣୀ ବିଶ୍ୱାସରାୟ, ବନ ବିଭାଗ ସ୍କ୍ବାଡ୍ ସଦସ୍ୟ ସନ୍ତୋଷ ଗୌଡ଼ ପ୍ରମୁଖ ଘଟଣାସ୍ଥଳରେ ପହଞ୍ଚି ତନାଘନା କରିଥିଲେ। ବନବିଭାଗ ପକ୍ଷରୁ ଡ୍ରୋନ କ୍ୟାମେରା ସହାୟତାରେ ବାଘ ଠାବ ପାଇଁ ପଦକ୍ଷେପ ନିଆଯାଇଥିଲା। ପରେ ନିକଟସ୍ଥ ଗୁହାଳ ଓ ନଦୀଘାଟ ନିକଟରେ ୨ଟି ଟ୍ରାପ୍ କ୍ୟାମେରା ସଂଯୋଗ କରାଯାଇଛି। ଘଟଣାସ୍ଥଳରୁ କିମ୍ବା ଆଖପାଖ ଜଙ୍ଗଲ ଇଲାକାରୁ ବାଘର କୌଣସି ପାଦ ଚିହ୍ନ ମିଳିନଥିବା ରେଞ୍ଜର କହିଛନ୍ତି। ପରେ ବନ କର୍ମଚାରୀ ବୃନ୍ଦ ଉପସ୍ଥିତ ଗ୍ରାମବାସୀଙ୍କ ସହ ଏନେଇ ବିସ୍ତୃତ ଆଲୋଚନା କରିଥିଲେ। ଗୃହପାଳିତ ପ୍ରାଣୀମାନଙ୍କୁ ରାତିରେ ବାହାରେ ଛାଡ଼ି ନ ଦେଇ ଗୁହାଳରେ ବାନ୍ଧି ରଖିବା ସହ ଗ୍ରାମବାସୀ ସତର୍କ ଓ ସୁରକ୍ଷିତ ରହିବା ପାଇଁ ବନ କର୍ମଚାରୀ ବୃନ୍ଦ ପରାମର୍ଶ ଦେଇ ଫେରିଥିବା ଜଣାପଡ଼ିଛି।
