ସମ୍ବଲପୁର, ୬।୧୨(ପ୍ରମୋଦ ବହିଦାର): ସମ୍ବଲପୁର ଚିଡିଆଖାନାରେ କଲରାପତରିଆ ବାଘୁଣୀ ରାଣୀର ବୁଧବାର ରାତିରେ ମୃତ୍ୟୁ ଘଟିଛି। ଗର୍ଭାଶୟ ସଂକ୍ରମଣଜନିତ ରୋଗରେ ପୀଡ଼ିତ ହୋଇ ଏହି ୭ ବର୍ଷୀୟା ବାଘୁଣୀର ମୃତ୍ୟୁ ଘଟିଥିବା ହୀରାକୁଦ ବନ୍ୟପ୍ରାଣୀ ବନଖଣ୍ଡ ଅଧିକାରୀ ଅଂଶୁପ୍ରଜ୍ଞା ଦାସ ଗୁରବାର ସୂଚନା ଦେଇଛନ୍ତି। ବନଖଣ୍ଡ ଅଧିକାରୀ ଦାସଙ୍କ ସୂଚନା ଅନୁସାରେ ବାଘୁଣୀ ରାଣୀ ବୁଧବାର ଦିନତମାମ ସକ୍ରିୟ ରହି ବୁଲାଚଲା କରୁଥିବା ବେଳେ ସନ୍ଧ୍ୟାରେ ସେ ହଠାତ୍ ଅସୁସ୍ଥ ହୋଇପଡ଼ିଥିଲା। ତା’ର ଜନନେନ୍ଦ୍ରିୟରୁ ପୂଯ ନିର୍ଗତ ହେଉଥିବା ଦେଖିବାକୁ ମିଳିଥିଲା। ଫଳରେ ପ୍ରାଣୀ ଉଦ୍ୟାନର ପ୍ରାଣୀ ଚିକିତ୍ସକ ତା’ର ଚିକିତ୍ସା ଆରମ୍ଭ କରି ୩ଟି ସଂକ୍ରମଣ ନିରୋଧକ ଇଞ୍ଜେକଶନ ଦେଇଥିଲେ। ପରବର୍ତ୍ତୀ ସମୟରେ ରାଣୀର ରକ୍ତବାନ୍ତି ହୋଇଥିଲା ଓ ଶ୍ୱାସକ୍ରିୟାରେ ସମସ୍ୟା ହୋଇଥିଲା। ତେବେ ଚିକିତ୍ସକଙ୍କ ସମସ୍ତ ପ୍ରୟାସ ସତ୍ତ୍ୱେ ଆଖି ବୁଜିଥିଲା ରାଣୀ। ଗୁରୁବାର ସକାଳେ ଚିଡ଼ିଆଖାନା ଓ ସ୍ଥାନୀୟ ପ୍ରାଣୀ ଚିକିତ୍ସକଙ୍କ ଦ୍ୱାରା ମିଳିତ ଭାବେ ରାଣୀର ମୃତଦେହ ବ୍ୟବଚ୍ଛେଦ କରାଯାଇଥିଲା। ଶାରୀରିକ ସମ୍ପର୍କ ଯୋଗୁ ଗଭାଶୟ ସଂକ୍ର୍ରମଣଜନିତ କାରଣରୁ ରାଣୀ ଅସୁସ୍ଥ ହୋଇଥିଲା। ଚିକିତ୍ସା ସମୟରେ ବାନ୍ତି ହେବା ଯୋଗୁ ହୃଦ୍ଘାତରୁ ବାଘୁଣୀର ମୃତ୍ୟୁ ଘଟିଥିବା ବ୍ୟବଚ୍ଛେଦ ରିପୋର୍ଟରୁ ସ୍ପଷ୍ଟ ହୋଇଛି ବୋଲି ସୂଚନା ଦେଇଛନ୍ତି ବନଖଣ୍ଡ ଅଧିକାରୀ ଦାସ। ବ୍ୟବଚ୍ଛେଦ ପରେ ପ୍ରାଣୀ ଉଦ୍ୟାନ ମଧ୍ୟରେ ବନ ବିଭାଗ, ପ୍ରାଣୀ ଉଦ୍ୟାନ ଅଧିକାରୀ ଓ କର୍ମଚାରୀଙ୍କ ଉପସ୍ଥିତିରେ ରାଣୀର ସଂସ୍କାର କରାଯାଇଛି ବୋଲି ସେ କହିଛନ୍ତି।
୨୦୨୩ ନଭେମ୍ବର ୫ ତାରିଖରେ ନୂଆପଡ଼ାରୁ ଧରା ହୋଇଥିବା ୮ବର୍ଷୀୟା ମଣିଷଖିଆ କଲରାପତରିଆ ବାଘ (ରାଜା)କୁ ସମ୍ବଲପୁର ଚିଡିଆଖାନା ଅଣାଯାଇଥିଲା। କେନ୍ଦ୍ରୀୟ ଚିଡିଆଖାନା ପ୍ରାଧିକରଣ(ନୂଆଦିଲ୍ଲୀ)ର ଅନୁମତିକ୍ରମେ ୮ ମାସ ସଙ୍ଗରୋଧ କରାଯାଇ ଚିକିତ୍ସା କରାଯାଇଥିଲା। ପରେ ଗତ ନଭେମ୍ବର ୯ରେ ରାଜାକୁ ଏଠାରେ ପୂର୍ବରୁ ଥିବା ମାଈ କଲରାପତରିଆ ବାଘୁଣୀ (ରାଣୀ)ସହିତ ଛଡ଼ା ଯାଇଥିଲା। ଏଠାରେ ସ୍ବତନ୍ତ୍ରଭାବେ ନିର୍ମିତ ଏକ ପ୍ରଶସ୍ତ ଗ୍ଲାସ୍-ଭ୍ୟୁ ଏନକ୍ଲୋଜର(କାଚ ପଞ୍ଜୁରି)ରେ ଉଭୟଙ୍କୁ ଏକାଠି ହେବାକୁ ଛଡ଼ାଯାଇଥିଲା। ସିସି ଟିଭିରେ ବନ ବିଭାଗ ପକ୍ଷରୁ ଉଭୟଙ୍କ ଗତିବିଧି ଉପରେ ୨୪ ଘଣ୍ଟା ନଜର ରଖାଯାଇଥିଲା। ଉଭୟ ଏକାଠି ହୋଇ ପରସ୍ପର ପ୍ରତି ଆକର୍ଷିତ ହୋଇଥିଲେ। ଏପରିକି ଉଭୟଙ୍କ ମଧ୍ୟରେ ଶାରୀରିକ ସମ୍ପର୍କ ସ୍ଥାପନ ହେଉଥିବା ଦେଖିବାକୁ ମିଳିଥିଲା। ଫଳରେ ଡିସେମ୍ବର ତୃତୀୟ ସପ୍ତାହରେ ରାଣୀର ଗର୍ଭ ଧାରଣ ସ୍ଥିତି ଯାଞ୍ଚ କରିବାକୁ ସମୟ ଧାର୍ଯ୍ୟ ହୋଇଥିଲା। ମାତ୍ର ଏଥି ପୂର୍ବରୁ ରାଣୀର ମୃତ୍ୟୁ ଘଟିଛି।
