ଆମେରିକାର ଜଣେ ତିନି ବର୍ଷର ବାଳକ ବିରଳ ରୋଗରେ ପୀଡିତ ଅଛନ୍ତି। ଏହି ରୋଗଟି ହେଉଛି ବେକ୍ଓ୍ବିଥ୍-ଓ୍ବିଡ୍ମ୍ୟାନ୍ ସିଣ୍ଡ୍ରୋମ୍(ବିଡବ୍ଲୁଏସ)। ଏହି ରୋଗରେ ଆକ୍ରାନ୍ତ ହେଲେ ଶରୀରର ବିଭିନ୍ନ ଅଙ୍ଗ ବଢିବାକୁ ଲାଗେ। ୧୫ ହଜାର ଶିଶୁଙ୍କ ମଧ୍ୟରୁ ଜଣଙ୍କୁ ଏଭଳି ବିରଳ ରୋଗ ହେବାର ସମ୍ଭାବନା ଥାଏ। ଆମରେିକାର ଓଭେନ୍ ନାମକ ଜଣେ ଶିଶୁ ଏହି ରୋଗରେ ପୀଡିତ ହୋଇଛନ୍ତି। ଫଳସ୍ବରୂପ ତାଙ୍କ ଜିଭ ସମାନ୍ୟରୁ ଚାରିଗୁଣା ବୃଦ୍ଧି ପାଇଛି। ଜନ୍ମରୁ ତାଙ୍କ ଜିଭ ବଢିଚାଲିଛି। ଜନ୍ମହେବା ପରେ ଓଭେନଙ୍କ ମା’ ଥେରେସା ଡାକ୍ତରଙ୍କୁ ସାମାନ୍ୟ ଜିଭ ବୃଦ୍ଧି ବିଷୟରେ ପଚାରିଥିଲେ। କିନ୍ତୁ ସେ ସମୟରେ ରୋଗ ବିଷୟରେ କିଛି ଜଣାପଡି ନ ଥିଲା। ଧୀରେ ଧୀରେ ଓଭେନଙ୍କ ଜିଭ ବଢିବା ପରେ ଥେରେସା ଡାକ୍ତରଙ୍କ ପରାମର୍ଶ କରିଥିଲେ। ଓଭେନ୍ ବିଡବ୍ଲୁଏସ ରୋଗରେ ପୀଡିତ ଥିବା ଡାକ୍ତର ପ୍ରକାଶ କରିଥିଲେ। ଓଭେନ୍ ଫେବୃୟାରୀ ୭, ୨୦୧୮ ଜନ୍ମ ହୋଇଥିଲେ। ଜନ୍ମବେଳେ ତାଙ୍କର ଜିଭ ବଡ ଥିଲା। ସେ ନିଃଶ୍ୱାସପ୍ରଶ୍ୱାସ ନେବାରେ ମଧ୍ୟ କଷ୍ଟ ଅନୁଭବ କରୁଥିଲେ। ଅନେକଥର ରାତିରେ ଶୋଇଥିବା ସମୟରେ ତାଙ୍କ ନିଶ୍ୱାସ ବନ୍ଦ ମଧ୍ୟ ହୋଇଯାଉଥିଲା। ସେ ବାନ୍ତି କରିପକାଉଥିଲେ। ଏଭଳି ଘଟଣା ପରେ ଓଭେନଙ୍କ ମାତାପିତା ଘରକୁ ଏକ ଡିଜିଟାଲ୍ ମନିଟର୍ ଆଣିଥିଲେ। ଏହାଦ୍ୱାରା ଓଭେନ୍ଙ୍କ ହାର୍ଟ ରେଟ୍ ଏବଂ ଅକ୍ସିଜେନ୍ ଲେବଲ୍ ଟେଷ୍ଟ କରାଯାଉଥିଲା। କିଛି ଅସାମାନ୍ୟ ଜଣାପଡିଲେ ତାହା ମନିଟର୍ ସୂଚେଇ ଦେଉଥିଲା। ଏଥିରୁ ଜଣାପଡିଥିଲା ଯେ, ଓଭେନଙ୍କୁ ଅକ୍ସିଜେନ୍ ଠିକ୍ ଭାବରେ ମିଳିପାରୁ ନାହିଁ। ଏହାପରେ ଡାକ୍ତରଙ୍କ ପରାମର୍ଶ କ୍ରମେ ଉଭେନ୍ଙ୍କ ଜିଭ ୨ ଇଞ୍ଚ୍ ସର୍ଜରୀ କରି କଟାଯାଇଥିଲା। ତାହା ସତ୍ତ୍ୱେ ଏବେ ମଧ୍ୟ ତାଙ୍କ ଜିଭର ଆକାର ବଢିଚାଲିଛି।
