ସୋହେଲା,୧୦ା୯(ଅଶ୍ବିନୀ ପାତ୍ର): ବରଗଡ଼ ଜିଲା ସୋହେଲା ଥାନା ଅଧୀନ ମାଷ୍ଟରପଡ଼ାରେ ରବିବାର ଏକ ଅଭାବନୀୟ ଘଟଣା ଘଟିଛି। ଗୋଟିଏ ପରିବାରର ୩ଜଣ ବିଷପାନ କରିବା ଅଞ୍ଚଳରେ ଆଲୋଡନ ଖେଳାଇ ଦେଇଛି। ସେମାନେ ହେଲେ କୁମୁଦିନୀ ସାହୁ(୫୦), ପୁଅ ବଂଶୀଧର(୨୫) ଏବଂ ଝିଅ ସୁବର୍ଣ୍ଣ ମହାଜନ( ୨୩)। ବୁର୍ଲା ଭୀମସାରରେ ଚିକିତ୍ସାଧୀନ ଅବସ୍ଥାରେ ବଂଶୀଧର ଏବଂ ସୁବର୍ଣ୍ଣଙ୍କ ମୃତ୍ୟୁ ଘଟିଥିବା ବେଳେ କୁମୁଦିନିଙ୍କ ସ୍ବାସ୍ଥ୍ୟାବସ୍ଥା ସଙ୍କଟାପନ୍ନ ରହିଛି। ସୋହେଲା ଥାନା ପୋଲିସ ମୃତକଙ୍କ ଘରୁ ମାର୍ଶଲ ନାମକ ୨ ଖାଲି କୀଟନାଶକ ବୋତଲ ଜବତ କରିଛି। ଘଟଣାକ୍ରମରେ ଗତ ୬ତାରିଖରେ ପରିବାର ମୁଖ୍ୟ ତଥା କୁମୁଦିନୀଙ୍କ ସ୍ବାମୀ ଅର୍ଜୁନ ସାହୁଙ୍କ ମଧୁମେହ ଓ ରକ୍ତଚାପ ଯୋଗୁ ମୃତ୍ୟୁ ଘଟିଥିଲା।
ରବିବାର ସକାଳେ ସୁବର୍ଣ୍ଣଙ୍କ ୨ବର୍ଷର ଝିଅ ଘର ବାହାରେ କାନ୍ଦୁଥିବା ପଡୋଶୀ ଲୋକେ ଦେଖିବାକୁ ପାଇଥିଲେ। ଘର କବାଟ ବନ୍ଦ ଥିବା ଦେଖି ସେମାନେ ଡାକିଥିଲେ ବି କେହି ଶୁଣି ନ ଥିଲେ। ସନ୍ଦେହ କରି ସେମାନେ ପୋଲିସକୁ ସୂଚନା ଦେଇଥିଲେ। ପୋଲିସ ପହଞ୍ଚିବା ପରେ କବାଟ ଭଙ୍ଗା ଯାଇଥିଲା। ଘର ଭିତରେ କୁମୁଦିନୀ, ବଂଶୀଧର ଏବଂ ସୁବର୍ଣ୍ଣ ଅଚେତ ହୋଇ ପଡିିଥିଲେ। ପୋଲିସ ସେମାନଙ୍କୁ ଉଦ୍ଧାର କରି ସୋହେଲା ଡାକ୍ତରଖାନା ପଠାଇଥିଲା। ପ୍ରାଥମିକ ଚିକିତ୍ସା ପରେ ସେମାନଙ୍କୁ ଜିଲା ମୁଖ୍ୟ ଚିକିତ୍ସାଳୟ ଓ ସଙ୍କଟାପନ୍ନ ହେବାରୁ ସମସ୍ତଙ୍କୁ ବୁର୍ଲା ସ୍ଥାନାନ୍ତର କରାଯାଇଥିଲା।
ବଂଶୀଧର ଅବିବାହିତ ଥିଲେ। ସୁବର୍ଣ ଛତିଶଗଡରେ ବିବାହ କରିଥିଲେ। ହେଲେ କୌଣସି କାରଣରୁ ବିବାହ ପରଠାରୁ ବାପ ଘରେ ରହୁଥିଲେ। ବାସନକୁସନ ବିକ୍ରି କରିବା ପରିବାରର ଜୀବିକା ଥିଲା। ସୋହେଲାରେ ତାଙ୍କ ଏକ ବାସନକୁସନ ଦୋକାନ ରହିଛି। ଅର୍ଜୁନ ଦୋକାନରେ ବସୁଥିବା ବେଳେ ବଂଶୀଧର ବାସନକୁସନ ଧରି ବିଭିନ୍ନ ଗ୍ରାମକୁ ବିକ୍ରି କରିବାକୁ ଯାଉଥିଲେ। ପଡୋଶୀଙ୍କ କହିବା ମୁତାବକ ଅର୍ଜୁନଙ୍କ ମୃତ୍ୟୁ ପରେ ପରିବାର ଲୋକେ ମାନସିକ ଚାପରେ ରହୁଥିଲେ। ଏପରିକି ଏହି ପରିବାର ଦୁଇଦିନ ତଳେ କୀଟନାଶକ ପିଇ ଆତ୍ମହତ୍ୟା କରିବାକୁ ସାମୂହିକ ଉଦ୍ୟମ କରିଥିଲେ। ପୋଲିସ ସେମାନଙ୍କଠାରୁ ୨ବୋତଲ କୀଟନାଶକ ଜବତ କରିଥିଲା। ଥାନାକୁ ଡାକି ବୁଝାଶୁଝା କରିବା ପରେ ସମସ୍ତଙ୍କୁ ଘରକୁ ପଠାଇ ଦିଆଯାଇଥିଲା ବୋଲି ସୋହେଲା ଥାନା ଏଏସଆଇ ଜୀବନଲାଲ ସାହୁ କହିଛନ୍ତି। ବିଷପାନର ପ୍ରକୃତ କାରଣ ସ୍ପଷ୍ଟ ହୋଇ ନ ଥିବା ବେଳେ ବାପାଙ୍କ ଶୁଦ୍ଧିକ୍ରିୟା ନ ସରୁଣୁ ଝିଅ ପୁଅଙ୍କ ମୃତ୍ୟୁ ସମସ୍ତଙ୍କୁ ସ୍ତବ୍ଧ କରିଛି।
