ନୂଆଦିଲ୍ଲୀ,୩୧।୧୨ : ଦେଶରେ ଦିନକୁ ଦିନ କରୋନା ସଂକ୍ରମଣର ମାମଲା ବଢ଼ିବାରୁ ସ୍ବାସ୍ଥ୍ୟ ବିଶେଷଜ୍ଞଙ୍କ ଚିନ୍ତିତ ଅଛନ୍ତି॥ ଗତ ୧୦ ଦିନର ତଥ୍ୟରୁ ଜଣାପଡ଼ିଛି ପ୍ରତିଦିନ ହାରାହାରି ୫୦୦-୬୦୦ ନୂଆ ମାମଲା ରିପୋର୍ଟ କରାଯାଉଛି। କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ଦ୍ୱାରା ରବିବାର (ଡିସେମ୍ବର ୩୧) ସକାଳ ୮ ଟାରେ ଅପଡେଟ ହୋଇଥିବା ଆକଳନ ଆହୁରି ଭୟାନକ ରହିଛି।
ଗତ ୨୪ ଘଣ୍ଟା ମଧ୍ୟରେ ଦେଶରେ କରେନାର ୮୪୧ ଟି ନୂଆ ମାମଲା ରିପୋର୍ଟ ହୋଇଛି, ଯାହାକି ୨୨୭ ଦିନ ମଧ୍ୟରେ ସର୍ବାଧିକ। ଏହା ସହିତ ସକ୍ରିୟ ମାମଲା ସଂଖ୍ୟା ବର୍ତ୍ତମାନ ୪,୩୦୯ କୁ ବୃଦ୍ଧି ପାଇଛି। ସୂଚନାଯୋଗ୍ୟ ଏହା ପୂର୍ବରୁ ୧୯ ମେ ରେ ୮୬୫ ମାମଲା ରୁଜୁ ହୋଇଥିଲା।
ବର୍ତ୍ତମାନର ସଂକ୍ରମଣ ମାମଲାଗୁଡ଼ିକର ମୁଖ୍ୟ କାରଣ ଭାବରେ ସ୍ବାସ୍ଥ୍ୟ ବିଶେଷଜ୍ଞମାନେ କରୋନାର ନୂତନ ଜେଏନ.୧ ଭାରିଆଣ୍ଟକୁ ବିଚାର କରୁଛନ୍ତି। ଅଧ୍ୟୟନରେ, ଏହାର ସଂକ୍ରମଣ ହାର ଅଧିକ ବୋଲି କୁହାଯାଉଛି। ତେବେ ଦେଶରେ ସଂକ୍ରମଣ ବୃଦ୍ଧି ପାଉଥିବାରୁ ପୁଣି ନୂଆ ଲହର ଆଶଙ୍କା ଘନେଇବାରେ ଲାଗିଛି।
