ଥିରୁଭାନନ୍ତପୁରମ,୨୪ ।୧୦: ସାରା ଦେଶରେ ପିଆଜର ଦର ଏବେ ଅହେତୁକ ଭାବେ ବଢି ଚାଲିଛି । ଏହାକୁ ନେଇ କେରଳର କୃଷି ମନ୍ତ୍ରୀ ଭିଏସ୍ ସୁନିଲ କୁମାର କହିଛନ୍ତି କେନ୍ଦ୍ରର ମୋଦି ସରକାରଙ୍କ ଦ୍ୱାରା ମଞ୍ଜୁରୀ ପାଇଥିବା କୃଷି ନିୟମର ଏହା ପ୍ରଥମ ପ୍ରଭାବ । ଏବେ ପାର୍ବଣ ଋତୁ ହୋଇଥିବା ବେଳେ କେରଳରେ ପିଆଜ ଦର କିଲୋପ୍ରତି ୮୦-୯୦ଟଙ୍କାରେ ପହଞ୍ଚିଥିବା ବେଳେ କେଉଁଠି କେଉଁଠି ଏହା ୧୨୦ଟଙ୍କା ଛୁଇଁଲାଣି । ଏହାକୁ ଦେଖି କେରଳ କୃଷିମନ୍ତ୍ରୀ ଆହୁରି ମଧ୍ୟ କହିଛନ୍ତି ଏହି ଆକାଶ ଛୁଆଁ ଦର କେବଳ ପିଆଜରେ ସୀମତ ହୋଇ ରହିବ ନାହିଁ ଆଗାମୀ ଦିନରେ ଏହାର ପ୍ରଭାବ ଡାଲି, ଚାଉଳ ଉପରେ ବି ଦେଖିବାକୁ ମିଳିବ । ହେଲେ ଏହାର ୧ଟଙ୍କା ବି କୃଷକ ପାଖକୁ ଯିବନାହିଁ । ସୂଚନାଯୋଗ୍ୟ, ରାଜ୍ୟରେ ପିଆଜର ଦର ବୃଦ୍ଧିକୁ ଦେଖି ଏବେ ରାଜ୍ୟ ସରକାର ନାଫେଡ(ରାଷ୍ଟ୍ରୀୟ କୃଷି ସହକାରୀ ବିପଣନ ମହାସଂଘ)ଠାରୁ ପାଖାପାଖି ୧୦୦ ଟନ ପିଆଜ କ୍ରୟ କରିବାକୁ ଯୋଜନା କରିଛନ୍ତି ।
