ନୂଆଦିଲ୍ଲୀ, ୨୧।୭- ଅଷ୍ଟ୍ରେଲିଆ କ୍ରିକେଟ୍ ଦଳର ପୂର୍ବତନ ଦ୍ରୁତ ବୋଲର ମିଚେଲ ଜନସନ ନିଜର ଶାଣିତ ବୋଲିଂ ଲାଗି ବିଶ୍ୱ କ୍ରିକେଟରେ ବେଶ୍ ପରିଚିତ ଲାଭ କରିଥିଲେ। ସେ ଅଷ୍ଟ୍ରେଲିଆ ପକ୍ଷରୁ ୭୩ ଟେଷ୍ଟ, ୧୫୩ ଦିନିକିଆ ଓ ୩୦ ଟି୨୦ ମ୍ୟାଚ୍ ଖେଳି ଯଥାକ୍ରମେ ୩୧୩, ୨୩୯ ଓ ୩୮ ଉଇକେଟ୍ ଅକ୍ତିଆର କରିଛନ୍ତି। ହୁଏତ ଅନେକ ଲୋକ ଜାଣି ନ ଥିବେ ଯେ ୨୦୧୫ରୁ ଅନ୍ତର୍ଜାତୀୟ କ୍ରିକେଟ୍ରୁ ସନ୍ନସ୍ୟା ନେଇସାରିଥିବା ଜନସନଙ୍କ ସ୍ତ୍ରୀ ଜେସିକା ଜଣେ ଜଣାଶୁଣା କରାଟେ ଖେଳାଳି। ସ୍ବାମୀ ଯେମିତି କ୍ରିକେଟ୍ରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିପାରିଛନ୍ତି ଜେସିକା ମଧ୍ୟ ଅନେକ ଜାତୀୟ ଓ ଅନ୍ତର୍ଜାତୀୟ କରାଟେ ପ୍ରତିଯୋଗୀତାରେ ଅଂଶଗ୍ରହଣ କରି ସଫଳତା ପାଇଛନ୍ତି। ୨୦୧୧ରେ ଉଭୟ ଜନସନ ଓ ଜେସିକା ବିବାହ ବନ୍ଧନରେ ଆବଦ୍ଧ ହୋଇଥିଲେ। କିନ୍ତୁ ଏଥିପୂର୍ବରୁ ୩୭ ବର୍ଷୀୟା ଜେସିକା କରାଟେ ପ୍ରତିଯୋଗିତାରେ ବେଶ୍ ସକ୍ରିୟ ଥିଲେ। ସେ କରାଟେରେ ସମ୍ମାନଜନକ ବ୍ଲାକ୍ ବେଲ୍ଟ ହାସଲ କରିବା ସହ ଜାତୀୟସ୍ତରରେ ୩୦ ଓ ଅନ୍ତର୍ଜାତୀୟସ୍ତରରେ ୧୪ ଟାଇଟଲ ଜିତିଛନ୍ତି। ଯାହା ମଧ୍ୟରେ ୨୦୦୬ କରାଟେ ଓ୍ବାଲର୍ଡ ଚାମ୍ପିୟନଶିପ୍ ବ୍ରୋଞ୍ଜ ପଦକ ଅନ୍ୟତମ। ଜେସିକାଙ୍କ ବାପାଙ୍କର ପର୍ଥରେ ଏକ କରାଟେ ସ୍କୁଲ ରହିଛି। ଏହି କାରଣରୁ ସେ ମାତ୍ର ୯ ବର୍ଷ ବୟସରେ କରାଟେ ଶିଖିବା ଆରମ୍ଭ କରିଥିଲେ। ଏହାପରେ ସେଠାରେ ସେ ୧୫ ବର୍ଷ ଧରି ପିଲାଙ୍କୁ ମଧ୍ୟ କରାଟେ ଶିଖାଇଥିଲେ। ଗଣମାଧ୍ୟମ ପାଠ୍ୟକ୍ରମରେ ଶିକ୍ଷା ଗ୍ରହଣ କରିଥିବା ଜେସିକା ଯେ କେବଳ ଜଣେ କରାଟେ ଖେଳାଳି ଏହା ନୁହେଁ, ସେ ମଧ୍ୟ ଜଣେ ସଫଳ ବିଜନେସଓମ୍ୟାନ। ସେ ନିଜ ନାମରେ ଏକ ଫ୍ୟାଶନ ଆସେସୋରିଜ ଓ ହ୍ୟାଣ୍ଡ୍ ବ୍ୟାଗ୍ ଷ୍ଟୋର୍ ଖୋଲିଛନ୍ତି। ଯାହାର ନାମ ‘ଜେସିକା ବାର୍ଟିକ୍’ ରହିଛି। ସେଲିବ୍ରିଟିଙ୍କ ମଧ୍ୟରେ ତାଙ୍କ ବ୍ରାଣ୍ଡ୍ ବେଶ୍ ଲୋକପ୍ରିୟ ହୋଇପାରିଛି।
