ପାରାଦୀପ,୪।୯(ସ୍ବ.ପ୍ର.): ରାଜ୍ୟରେ ସ୍ବଚ୍ଛ ଶାସନ ସମ୍ପର୍କରେ ସରକାର ପ୍ରାୟତଃ ଗଣମାଧ୍ୟମରେ ପ୍ରଚାର ପ୍ରସାର କରୁଛନ୍ତି। କିନ୍ତୁ ବାସ୍ତବରେ ଅନେକ ସ୍ଥାନରେ ସରକାରୀ ତଥ୍ୟରେ ସମାନତା ଦେଖିବାକୁ ମିଳୁନି। ଏହାର ଦୃଷ୍ଟାନ୍ତ ଜଗତସିଂହପୁର ଜିଲା ପାରାଦୀପ ପୌରାଞ୍ଚଳରେ ଦେଖିବାକୁ ମିଳିଛି।
ପାରାଦୀପ ପୌରାଞ୍ଚଳର ଅନେକ ସ୍ଥାନରେ ଆର ଆଣ୍ଡ ବି ଡିଭିଜନ(ପୂର୍ତ୍ତ ଓ ଗୃହ ନିିର୍ମାଣ ବିଭାଗ) ଜଗତସିଂହପୁର ପକ୍ଷରୁ ନୂତନ ପ୍ରକଳ୍ପ, ମରାମତି, ନବୀକରଣ, ରୂପାନ୍ତରିକରଣ ଆଦି କରାଯାଇଛି। ମାତ୍ର ସେ ସମ୍ପର୍କରେ ତଥ୍ୟ ମାଗିଲେ ତା’ର କୌଣସି ଉତ୍ତର ମିଳୁନାହିଁ। ପାରାଦୀପ ପୌରାଞ୍ଚଳରେ କୌଣସି କାମ କରାଯାଇନାହିଁ ବୋଲି ଲିଖିତ ଭାବେ ସୂଚନା ମିଳିଛି। ଅପରପକ୍ଷେ ମୋ ସ୍କୁଲ ପକ୍ଷରୁ ଲିଖିତ ଭାବେ କୁହାଯାଇଛି ଯେ, ସ୍କୁଲର ମରାମତି ଓ ରୂପାନ୍ତରିକରଣ କାମ ଆର ଆଣ୍ଡ ବି ଡିଭିଜନ ଓ ମୁନିସିପାଲିଟି କରିଛି। ଏଭଳି ଭିନ୍ନ ଉତ୍ତରରେ ପ୍ରକୃତ ତଥ୍ୟ ଲୋକଲୋଚନକୁ ଆସିପାରୁନାହିଁ।
ପାରାଦୀପ ପୌରାଞ୍ଚଳର ୧୯ଟି ଯାକ ୱାର୍ଡ ସୀମା ମଧ୍ୟରେ ଆର ଆଣ୍ଡ ବି ଡିଭିଜନ ୨୦୧୮ ମାର୍ଚ୍ଚ ୩୧ରୁ ୨୦୨୨ ଏପ୍ରିଲ ୧ ତାରିଖ ମଧ୍ୟରେ କେଉଁ କେଉଁ ମରାମତି ନବୀକରଣ, ନୂତନ ପ୍ରକଳ୍ପ, ରୂପାନ୍ତରୀକରଣ ଆଦି କାମ କରିଛି ତାର ସବିଶେଷ ବିବରଣୀ ମଗାଯାଇଥିଲା। ସୂଚନା ଆଇନ ଜରିଆରେ ଜୁନ ୭ରେ ଏସବୁ ତଥ୍ୟ ମଗାଯାଇଥିଲା। ଏହାର ଜବାବ ଧାର୍ଯ୍ୟ ସମୟ ୩୦ ଦିନ ମଧ୍ୟରେ ମିଳିଲା ନାହିଁ। ଏନେଇ ପ୍ରଥମ ଅପିଲ ଜୁଲାଇ ୮ରେ କରାଯାଇଥିଲା। ଏହାର ମାସକ ପରେ ଅଗଷ୍ଟ ୧୬ରେ ସୁପରଣ୍ଟେଣ୍ଡିଙ୍ଗ ଇଞ୍ଜିନିୟର ଆର ଆଣ୍ଡ ବି ଡିଭିଜନ ଜଗତ୍ସିଂହପୁର ଅଫିସ ପକ୍ଷରୁ ଉତ୍ତର ମିଳିଛି। ଚିଠି ନଂ.୨୮୯୬ରେ ଜନସୂଚନା ଅଧିକାରୀ ଲିଖିତ ଭାବେ ଦର୍ଶାଇଛନ୍ତି ଯେ, ପାରାଦୀପ ପୌରାଞ୍ଚଳରେ ଥିବ କୌଣସି ଓ୍ବାର୍ଡରେ ବିଭାଗ ପକ୍ଷରୁ କାମ କରାଯାଇନାହିଁ।
ଅପରପକ୍ଷେ, ପାରାଦୀପର ୧୪ ନଂ ୱାର୍ଡ ନୂଆବଜାରରେ ଥିବା ସଞ୍ଜୟ ଗାନ୍ଧୀ ହାଇସ୍କୁଲର ମରାମତି ନବୀକରଣ ରୂପାନ୍ତରିକରଣ ସମ୍ପର୍କରେ ଗତ ଏପ୍ରିଲ ୨୮ ରେ ସୂଚନା ମଗାଯାଇଥିଲା। ଜବାବରେ ହାଇସ୍କୁଲ ପ୍ରଧାନଶିକ୍ଷୟତ୍ରୀ ସବିତା କୁମାରୀ ପରିଡା ମେ’ ୨୭ ରେ ସୂଚନା (ଚିଠି ନଂ ୫୨/୨୦୨୨)ଦେଇଥିଲେ। ସେଥିରେ ସେ ଦର୍ଶାଇଛନ୍ତି, ସ୍କୁଲକୁ ୨୦୧୮ ରୁ ୨୦୨୨ ମଧ୍ୟରେ ଦୁଇଥର ମରାମତି କରାଯାଇଛି। ଆର ଆଣ୍ଡ ବି ଡିଭିଜନ ଓ ପୌରପାଳିକା କାର୍ଯ୍ୟ ନିିର୍ବାହୀ ଅଧିକାରୀଙ୍କୁ ଏନେଇ ୧୫ ଲକ୍ଷ ଟଙ୍କା ଏନଇଏଫ୍ଟିରେ ପଠାଯାଇଛି। ସେହିପରି ପାରାଦୀପ ପୌରପାଳିକାକୁ କିଛି ସୂଚନା ମଗାଯାଇଥିଲା। ଗତ ଜୁଲାଇ ୨ରେ ମିଳିଥିବା ସୂଚନା (ଚିଠି ନଂ ୨୫୮୯)ରେ ୮୫ ପୃଷ୍ଠାର ଉତ୍ତର ମିଳିଛି। ସେଥିରେ ଅନେକ ସ୍ଥାନରେ କାମର ସବିଶେଷ ସୂଚନା ଆର ଆଣ୍ଡ ବି ଡିଭିଜନକୁ ଦିଆଯାଇଛି ବୋଲି ଦର୍ଶାଯାଇଛି। କିନ୍ତୁ ସୂଚନା ମାଗିଲେ କୌଣସି ଉତ୍ତର ମିଳୁନାହିଁ।
ଏ ସମ୍ପର୍କରେ ଆର ଆଣ୍ଡ ବି ଯନ୍ତ୍ରୀ ନିମାଇଁ ଦାସଙ୍କୁ ପଚାରିଲେ କୁହନ୍ତି,ଆମ ବିଭାଗ ପକ୍ଷରୁ ୨୦୧୮ ରୁ ୨୦୨୨ ମଧ୍ୟରେ କିଛି ନୂଆ କାମ ହୋଇନାହିଁ। ମୋ ସ୍କୁଲ ଦେଇଥିବା ଚିଠିରେ ଏହି ବିଭାଗ ନାମ ରହିଥିବା କୁହାଯିବାରୁ ଦାସ କହିଥିଲେ ମୋ ପାଖକୁ ଉକ୍ତ ଚିଠି ପଠାନ୍ତୁ। ତାକୁ ଦେଖିବା ପରେ ମତ ରଖିବି।
