ଭୁବନେଶ୍ୱର, ୨୫।୪ (ବ୍ୟୁରୋ): ରାଜଧାନୀ ଭୁବନେଶ୍ୱରକୁ ୧ନମ୍ବର ସ୍ମାର୍ଟସିଟିରେ ପରିଣତ କରିବା ସହ ସହରକୁ ସ୍ବଚ୍ଛ ଓ ସୁନ୍ଦର କରି ଗଢ଼ି ତୋଳିବା ପାଇଁ ବିଏମ୍ସି ସର୍ବଦା ଚେଷ୍ଟା କରି ଆସୁଥିବା ପ୍ରଚାର କରୁଛି। କେଉଁଠି ଅଳିଆ ଉଠାଇ ତ ଆଉ କେଉଁଠି କାନ୍ଥ, ବାଡ଼ରେ ଚିତ୍ର ଆଙ୍କି ନିଜର ଡିଣ୍ଡିମ ପିଟୁଛି। ମାତ୍ର ଦୀପ ତଳ ଅନ୍ଧାର ଭଳି ସହରର ଅଧିକାଂଶ ସ୍ଥାନରେ ଲୋକଙ୍କୁ ମୌଳିକ ସୁବିଧା ଯୋଗାଇ ଦେବାରେ ଅସମର୍ଥ ହୋଇଛି। ଏହାର ଉଦାହରଣ ଦେଖିବାକୁ ମିଳିଛି ବିଏମ୍ସି ଓ୍ବାର୍ଡ ନଂ. ୧୮ ଅନ୍ତର୍ଗତ ପଳାଶୁଣି ଅଞ୍ଚଳରେ। ଏଠାରେ ସୁଲଭ ଶୌଚାଳୟ ନ ଥିବାରୁ ଲୋକମାନେ ନାହିଁ ନ ଥିବା ହଇରାଣ ହେଉଛନ୍ତି। ବିଶେଷକରି ମହିଳାମାନେ ଏଥିରେ ଅଧିକ ପ୍ରଭାବିତ ହେଉଛନ୍ତି। ସହରର ଅନ୍ୟତମ ଜନଗହଳିପୂର୍ଣ୍ଣ ବସ୍ଷ୍ଟାଣ୍ଡ ହେଉଛି ପଳାଶୁଣି ବସ୍ଷ୍ଟାଣ୍ଡ। ପ୍ରତିଦିନ ଏଠାରେ ଶହଶହ ଯାତ୍ରୀ ଯିବା ଆସିବା କରିଥାନ୍ତି। ସକାଳୁ ସଞ୍ଜ ଯାଏ ଏଠାରେ ବଜାରଘାଟ ଚାଲେ। ମାତ୍ର ଏତେ ସଂଖ୍ୟକ ଲୋକଙ୍କ ପାଇଁ ଆଖପାଖରେ କୌଣସି ଶୌଚାଳୟ ନାହିଁ। ଫଳରେ ଯାତ୍ରୀମାନେ ଅସୁବିଧାର ସମ୍ମୁଖୀନ ହେବା ସହ ବାଧ୍ୟହୋଇ ରାସ୍ତାକଡ଼, ହାଟ ନିକଟସ୍ଥ ପଡିଆରେ ମଳ, ମୂତ୍ର ତ୍ୟାଗ କରୁଛନ୍ତି। ଏହାଦ୍ୱାରା ପରିବେଶ ଦୂଷିତ ହେବା ସହ ସହରର ଚିତ୍ର ମଳିନ ହେଉଛି। ଏନେଇ ସ୍ଥାନୀୟ ବାସିନ୍ଦା ଏବଂ ସାମାଜିକ ସେବା ସଂଗଠନ ଆଞ୍ଜେଲ ଗ୍ରୁପ୍ ପକ୍ଷରୁ ବିଏମ୍ସି ଏବଂ ରାଜ୍ୟ ସରକାରଙ୍କ ନିକଟରେ ବାରମ୍ବାର ଦାବି କରାଯିବା ସତ୍ତ୍ୱେ କୌଣସି ଫଳ ମିଳୁନାହିଁ। ପ୍ରେମଚାନ୍ଦ ଚୌଧାରୀ ବିଏମ୍ସି କମିଶନର ଭାବେ ଦାୟିତ୍ୱ ନେବା ସମୟରୁ ଏ ନେଇ ଦାବି କରାଯାଉଛି। ବାରମ୍ବାର ଲିଖିତ ଭାବେ ମଧ୍ୟ ଅଭିଯୋଗ କରାଯାଇଛି। ମାତ୍ର ଏହା ମଧ୍ୟରେ ୨ଜଣ କମିଶନରଙ୍କ ବଦଳି ହୋଇ ସାରିଥିଲେ ବି ସମସ୍ୟା ଯେପରି ଥିଲା ସେହିପରି ଅଛି। ଅପରପକ୍ଷେ ବିଏମ୍ସି ଅଫିସ୍ ଗଲେ ସେଠାରେ କମିଶନରଙ୍କ ଦେଖା ମିଳୁନି। ଫଳରେ ଅତିରିକ୍ତ କମିଶନର କେବଳ ପ୍ରତିଶ୍ରୁତି ଦେଇ ଭୂଆଁ ବୁଲାଉଛନ୍ତି। ପଳାଶୁଣି ହାଟଛକ ନିକଟରେ ଇ-ଟଏଲେଟ୍ ନିର୍ମାଣ ପାଇଁ ଜାଗା ଚିହ୍ନଟ ହୋଇଥିଲା। ମାତ୍ର ସମ୍ପୃକ୍ତ ସ୍ଥାନରେ ଜଣେ ବ୍ୟକ୍ତି ଜବରଦଖଲ କରିବା ସହ ସେଠାରେ ଥିବା ନାଳକୁ ପୋତି ହୋଟେଲ ନିର୍ମାଣ କରିଛନ୍ତି। ଏନେଇ ବିଏମ୍ସିରେ ଅଭିଯୋଗ କରାଯାଇଥିଲେ ବି ଏଯାବତ୍ କୌଣସି କାର୍ଯ୍ୟାନୁଷ୍ଠାନ ନିଆଯାଉ ନ ଥିବା ସ୍ଥାନୀୟ ଅଧିବାସୀ ଅଭିଯୋଗ କରିଛନ୍ତି।
