ବାଲେଶ୍ୱର ଅଫିସ, ୨୨।୧୨: ରେଳ ମନ୍ତ୍ରଣାଳୟର ସେଫ୍ଟି ସାର୍ଟିଫିକେଟ୍ ବିନା ରେଳ ଓଭରବ୍ରିଜ୍ର ଉଦ୍ଘାଟନକୁ ନେଇ ଜିଲା ପ୍ରଶାସନ ଓ ରେଲଓ୍ବେ ମଧ୍ୟରେ ବିବାଦ ଦେଖାଦେଇଛି। ଗୁରୁବାର ମୁଖ୍ୟମନ୍ତ୍ରୀ ବାଲେଶ୍ୱର ଗସ୍ତରେ ଆସି ଶୋଭାରାମପୁରଠାରେ ରେଲଓ୍ବେ ଓଭରବ୍ରିଜ୍ (ଏଲ୍ସି-୭୯) ଉଦ୍ଘାଟନ କରିବାର ସମସ୍ତ କାର୍ଯ୍ୟ ଶେଷ ହୋଇଥିବା ବେଳେ ରେଲଓ୍ବେ ପକ୍ଷରୁ ଫିଟନେସ୍ ସାର୍ଟିଫିକେଟ୍ ନେଇ ନ ଥିବା ଜାଣି ରେଳ ବିଭାଗର ଡିଭିଜନାଲ ରେଲୱେ ମ୍ୟାନେଜର ଏମ୍.ଏସ୍. ହସମି ବାଲେଶ୍ୱର ଜିଲାପାଳ ଦତ୍ତାତ୍ରେୟ ଭାଉସାହେବ ଶିନ୍ଦେଙ୍କୁ ପତ୍ର ମାଧ୍ୟମରେ ଅବଗତ କରାଇଛନ୍ତି। ଏହାକୁ ନେଇ ରେଳ ଓଭରବ୍ରିଜ୍ର ଉଦ୍ଘାଟନ ହୋଇପାରିବ କି ନାହଁି ସେନେଇ ନାନା ଆଶଙ୍କା ସୃଷ୍ଟି ହୋଇଛି। ଅନ୍ୟପକ୍ଷରେ ଏହା ଏବେ ରାଜନୈତିକ ବିବାଦ ଭାବରେ ପରିଲକ୍ଷିତ ହୋଇଛି। ସଂସଦ ଚାଲୁ ରହିଥିବା ବେଳେ ବାଲେଶ୍ୱର ଏମ୍ପି ଦିଲ୍ଲୀରେ ଅଛନ୍ତି। ଏହି ସମୟରେ ରେଳ ଓଭରବ୍ରିଜ୍ ଉଦ୍ଘାଟନ ମୁଖ୍ୟମନ୍ତ୍ରୀ କରୁଥିବା ବେଳେ ଭାଜପା ମଧ୍ୟ ଅସନ୍ତୁଷ୍ଟ ରହିଛି। ଏହି କାର୍ଯ୍ୟକୁ ନେଇ କେନ୍ଦ୍ର ଓ ରାଜ୍ୟ ସରକାରଙ୍କ ମଧ୍ୟରେ ତାଳମେଳ ନ ଥିବା ସ୍ପଷ୍ଟ ବାରି ହେଉଥିବା ବେଳେ ମୁଖ୍ୟମନ୍ତ୍ରୀ ଉକ୍ତ ସ୍ଥାନକୁ ଯାଇ ରେଳ ଓଭରବ୍ରିଜ୍କୁ ଉଦ୍ଘାଟନ କରୁଛନ୍ତି କି ନାହଁି ସମସ୍ତଙ୍କ ମନରେ ପ୍ରଶ୍ନ ଉଠୁଛି।
