ଛେଣ୍ଡିପଦା,୨୬ା୧୧(ଡି.ଏନ.ଏ.)- ଛେଣ୍ଡିପଦା ଥାନା ବରସାହି ପଞ୍ଚାୟତ ରଙ୍ଗମାଟିଆ ସାହିର ଖକନ ବେହେରା(୪୭) ଗୁରୁବାର ନିଜ ଘର ପୋଡ଼ିଦେବା ସହ ତଣ୍ଟି କାଟି ଗୁରୁତର ହେବା ଚର୍ଚ୍ଚାର ବିଷୟ ହୋଇଛି। ପାରିବାରିକ କଳହକୁ କେନ୍ଦ୍ରକରି ଖକନ ଏପରି କରିଥିବା ପୋଲିସ ସୂଚନା ଦେଇଛି।
ବାଗଡ଼ିଆ ଫାଣ୍ଡି ଅଧିକାରୀ ଅବଦୁଲ୍ ଓ୍ବାସିମ ଖାନ କହିଛନ୍ତି, ପୂର୍ବାହ୍ନ ୯ଟାରେ ଖକନ ନିଜ ଘରେ ନିଅଁା ଲଗାଇଦେବା ପରେ ଏକ କଟୁରିରେ ତଣ୍ଟି ଓ ପେଟକୁ କାଟି ଦୌଡ଼ି ପଳାଇ ଯାଇଥିଲେ। ଖବରପାଇ ଅଗ୍ନିଶମ କର୍ମଚାରୀ ପହଞ୍ଚି ନିଆଁକୁ ଆୟତ୍ତ କରିଥିଲେ। ସରପାଳଠାରେ ଖକନ ଗୁରୁତର ଅବସ୍ଥାରେ ଦୀର୍ଘ ସମୟ ଧରି ପଡିରହିଥିଲେ ମଧ୍ୟ ସ୍ଥାନୀୟ ଲୋକେ ସହାୟତା କରି ନ ଥିଲେ। ପରେ ଥାନା ଗାଡ଼ି ନେଇ ସେ ଖକନଙ୍କୁ ଉଦ୍ଧାର କରି ହସ୍ପିଟାଲ ଆଣିଥିଲେ। ଏପରି କି ଉଦ୍ଧାର ସମୟରେ ଉପସ୍ଥିତ ଜନସାଧାରଣ ସହଯୋଗ କରି ନ ଥିଲେ। ଛେଣ୍ଡିପଦା ଥାନାର କେତେଜଣ କର୍ମଚାରୀ ଡାକ୍ତରଖାନା ପହଞ୍ଚି ଖକନଙ୍କୁ ଆଶୁ ଚିକିତ୍ସା ବିଭାଗରେ ଭର୍ତ୍ତି କରିଥିଲେ। ଅବସ୍ଥା ଗୁରୁତର ଥିବାରୁ ସମ୍ପୃକ୍ତ ଯୁବକଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଏ ନେଇ ଛେଣ୍ଡିପଦା ଥାନାରେ କୌଣସି ଅଭିଯୋଗ ହୋଇ ନ ଥିବାବେଳେ ପୋଲିସ ନିଜଆଡୁ ଘଟଣାର ତଦନ୍ତ କରୁଥିବା ଫାଣ୍ଡି ଅଧିକାରୀ ପ୍ରକାଶ କରିଛନ୍ତି।
