ନୟାଗଡ଼,୨୨।୯(ଲୋକନାଥ ମିଶ୍ର): ନୟାଗଡ଼ ଜିଲା ନୂଆଗାଁ ବ୍ଲକର ଆଦିବାସୀ ଅଧ୍ୟୁଷିତ ଅଞ୍ଚଳବାସୀଙ୍କ ପାଇଁ ନିର୍ମାଣ କରାଯାଉଥିବା ମୋବାଇଲ ଟାଓ୍ବାର କାମ ଦୀର୍ଘ ମାସ ହେଲା ଅଧାପନ୍ତରିଆ ଭାବେ ପଡିରହିଛି। ଏ ସଂକ୍ରାନ୍ତରେ ବାରମ୍ବାର ବିଭାଗୀୟ ଅଧିକାରୀଙ୍କ ନିକଟରେ ଅଭିଯୋଗ କରାଗଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ। ଏଥିପାଇଁ ନୂଆଗାଁ ବ୍ଲକର ଗୁମି, ଡିମିରିପଲି, ବରକୋଳା, କାପ୍ତାପଲିି, ଫାମ୍ପୁଣି, ଗୁନାମାଟି ସାନଡାମନାଡୁ ଆଦି ଆଦିବାସୀ ଅଞ୍ଚଳବାସୀ ମୋବାଇଲ ସେବା ପାଇବାରୁ ବଞ୍ଚତ୍ତ ହୋଇଛନ୍ତି। ଉପରୋକ୍ତ ଅଞ୍ଚଳରେ ହାଇସ୍କୁଲ, ଡାକ୍ତରଖାନା, ପଞ୍ଚାୟତ କାର୍ଯ୍ୟାଳୟ ଆଦି ରହିଥିଲେ ମଧ୍ୟ ମୋବାଇଲ ସେବା ନ ଥିବାରୁ କୌଣସି ଅନ୍ଲାଇନ କାମ ହୋଇପାରୁ ନାହିଁ। ଏପରି କି ସରକାରୀ କାର୍ଯ୍ୟ ମଧ୍ୟ କରାଯାଇ ପାରୁନାହିଁ। ଛାତ୍ରୀଛାତ୍ରମାନଙ୍କୁ ଡିଜିଟାଲ ମାଧ୍ୟମରେ ଶିକ୍ଷା ଦେବା ପାଇଁ ବ୍ୟବସ୍ଥା କରାଯାଇଥିଲେ ମଧ୍ୟ ମୋବାଇଲ ଟାଓ୍ବାର ନ ଥିବାରୁ ଡିଜିଟାଲ ପାଠପଢା ମଧ୍ୟ ହୋଇପାରୁ ନାହିଁ। ତେଣୁ ମୋବାଇଲ ଟାଓ୍ବାର ନିର୍ମାଣ ପାଇଁ ଦଶପଲ୍ଲା ବିଧାୟକ ରମେଶ ଚନ୍ଦ୍ର ବେହେରାଙ୍କୁ ଅଞ୍ଚଳବାସୀ ଗୁହାରି କରିଥିଲେ। ବିଧାୟକ ବେହେରାଙ୍କ ଉଦ୍ୟମରେ ଗୁମି ପଞ୍ଚାୟତର ବରଡିହି ଓ କାପ୍ତାପଲି ପଞ୍ଚାୟତର ଫାମ୍ପୁଣି ନିକଟରେ ଟାଓ୍ବାର ନିର୍ମାଣ କରିବା ପାଇଁ ନିଷ୍ପତ୍ତି ନିଆଯାଇଥିଲା। ବିଏସ୍ଏନ୍ଏଲ କମ୍ପାନୀର କର୍ମଚାରୀମାନେ ଆସି ଟାଓ୍ବାର ନିର୍ମାଣ କାର୍ଯ୍ୟ ଆରମ୍ଭ କଲେ। ଇତିମଧ୍ୟରେ ୬ ମାସରୁ ଊର୍ଦ୍ଧ୍ୱ ସମୟ ବିତି ଥିଲେ ମଧ୍ୟ କେବଳ ଟାଓ୍ବାରର ମୂଳ ପିଲାର କାମରେ ଅଟକି ରହିଛି। ଲୋକମାନଙ୍କୁ ମୋବାଇଲ ସେବା ଯୋଗାଇ ଦେବା ପାଇଁ ଅଞ୍ଚଳବାସୀଙ୍କ ତରଫରୁ ଦାବି ହୋଇଛି।
