ଭୁବନେଶ୍ୱର,୩।୧୧(ବ୍ୟୁରୋ): ରାଜଧାନୀ ଉପକଣ୍ଠ ତମାଣ୍ଡୋ ଥାନା ଅନ୍ତର୍ଗତ କଳିଙ୍ଗନଗର ଅଞ୍ଚଳରେ ମଙ୍ଗଳବାର ଘଟିଥିବା ଡବଲ୍ ମର୍ଡର ଚାଞ୍ଚଲ୍ୟ ସୃଷ୍ଟି କରିଥିଲା। ତେବେ ଏହି ହତ୍ୟାକାଣ୍ଡ ପଛରେ ମହିଳାଙ୍କ ସ୍ବାମୀ ଅବନ୍ତୀ ମଙ୍ଗରାଜ ଥିବା ଜଣାପଡ଼ିଛି। ଆର୍ଥିକ ସମସ୍ୟା ପାଇଁ ସେ ତାଙ୍କ ସ୍ତ୍ରୀ ଏବଂ ପୁଅକୁ ହତ୍ୟା କରିଥିବା ନେଇ ବୁଧବାର ଭୁବନେଶ୍ୱର ଡିସିପି ଉମାଶଙ୍କର ଦାସ ସ୍ପଷ୍ଟ କରିଛନ୍ତି।
ଡିସିପି କହିଛନ୍ତି, ଅଭିଯୁକ୍ତଜଣଙ୍କ ବିଭିନ୍ନ ଜାଗାରୁ ଟଙ୍କା ଧାର ଆଣିଥିଲେ। ଏହାକୁ ନେଇ ସେ ମାନସିକ ଦୁଶ୍ଚିନ୍ତାରେ ଥିଲେ। ସୋମବାର ମଧ୍ୟାହ୍ନ ଭୋଜନ ସମୟରେ ସେ ସ୍ତ୍ରୀ ଓ ପୁଅଙ୍କୁ ନିଦ ଔଷଧ ଦେଇଥିଲେ। ଏହାପରେ ଉଭୟ ଗଭୀର ନିଦରେ ଶୋଇପଡ଼ିଥିଲେ। ରାତି ୩ଟା ବେଳେ ସେ ପ୍ରଥମେ ସ୍ତ୍ରୀ ଓ ପରେ ପୁଅଙ୍କ ବେକକୁ ଓଢ଼ଣୀରେ ଭିଡି ହତ୍ୟା କରିଥିଲେ। ଏହାପରେ ସେ ନିଜେ ଆତ୍ମହତ୍ୟା କରିବାକୁ ପ୍ରୟାସ କରିଥିଲେ। ହେଲେ ବିଫଳ ହୋଇଥିଲେ। ମଙ୍ଗଳବାର ଦିନ ୧୦ଟା ଯାଏ ସେ ଘରେ ରହିଥିଲେ। ଏହାପରେ ସେ ଘରକୁ ଭିତରପଟୁ ବନ୍ଦ କରି ଛାତ ଉପରୁ ଡେଇଁ ବାହାରକୁ ଚାଲିଯାଇଥିଲେ। ଭୁବନେଶ୍ୱରରେ ବୁଲୁଥିବା ବେଳେ ନିଜ ଭଣଜାଙ୍କୁ ହ୍ବାଟ୍ସଆପ୍ ଜରିଆରେ ସ୍ତ୍ରୀ ଓ ପୁଅଙ୍କୁ ହତ୍ୟା କରିଥିବା ଜଣାଇଥିଲେ। ଏପରିକି ସେ ନିଜେ ଆତ୍ମହତ୍ୟା କରିବାକୁ ଯାଉଥିବା କହିଥିଲେ। ଭଣଜାଙ୍କ ବୟାନ ପରେ ରେକର୍ଡ କରାଯିବ ବୋଲି ଡିସିପି କହିଛନ୍ତି। ତେବେ ମହିଳା ଓ ତାଙ୍କ ପୁଅର ମୃତଦେହର ପୋଷ୍ଟମର୍ଟମ ଏମ୍ସରେ କରାଯିବା ସହ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯିବ ବୋଲି ସେ କହିଛନ୍ତି।
ସୂଚନାଯୋଗ୍ୟ, କଳିଙ୍ଗନଗର ଅଞ୍ଚଳର ଏକ ଘର ଭିତରୁ ମା’ ଓ ପୁଅଙ୍କ ମୃତଦେହ ଉଦ୍ଧାର କରାଯାଇଥିଲା। ମୃତକଦ୍ୱୟ ହେଲେ ସ୍ବର୍ଣ୍ଣଲତା ମଙ୍ଗରାଜ ଏବଂ ୯ ବର୍ଷର ପୁଅ ଦିପ୍ତିଦୀପକ। ସେମାନଙ୍କୁ ହତ୍ୟା କରିବା ପରେ ସ୍ବାମୀ ଅବନ୍ତୀ ଫେରାର ହୋଇଯିବା ସହ ଏ ବିଷୟରେ ଶଳା ଓ ଭଣଜାଙ୍କୁ ଜଣାଇଥିଲେ। ପରେ ପୋଲିସ ଉପସ୍ଥିତିରେ ଘରର କବାଟ ଭଙ୍ଗାଯାଇ ଉଭୟ ମୃତଦେହକୁ ଉଦ୍ଧାର କରାଯାଇଥିଲା।
