ଆର.ଉଦୟଗିରି,୮।୫(ଡି.ଏନ.ଏ.): ସରକାର ଗାଁ ଗାଁକୁ ସଂଯୋଗ କରିବା ଲକ୍ଷ୍ୟରେ ବିଭିନ୍ନ ଯୋଜନା ମାଧ୍ୟମରେ ଲକ୍ଷ ଲକ୍ଷ ଟଙ୍କା ପାଣି ଭଳି ଖର୍ଚ୍ଚ କରୁଛନ୍ତି। ହେଲେ ଆଜି ମଧ୍ୟ ଅନେକ ଗ୍ରାମ ସରକାରଙ୍କ ଦୃଷ୍ଟି ଆଢୁଆଳରେ ରହିଯାଇଛି। ଗ୍ରାମବାସୀ ବାରମ୍ବାର ପ୍ରଶାସନ ହେଉ କିମ୍ବା ଜନ ପ୍ରତିନିଧିଙ୍କୁ ଗୁହାରି ଜଣାଇ ଆସୁଥିଲେ ମଧ୍ୟ ଗ୍ରାମକୁ ଯିବାକୁ ହେଲେ ପାଦଚଲା ରାସ୍ତା ସେମାନଙ୍କ ପାଇଁ ସାହା ଭରସା ପାଲଟିଛି। ଫଳରେ ଗ୍ରାମବାସୀ ନିଜେ ନିଜର ଶ୍ରମଦାନ କରି ଅସ୍ଥାୟୀ ରାସ୍ତା ନିର୍ମାଣ କରୁଥିବା ଦେଖିବାକୁ ମିଳିଛି। ଗଜପତି ଜିଲା ଏକ ଆଦିବାସୀ ଅଧ୍ୟୁଷିତ ଦୁର୍ଗମ ଅଞ୍ଚଳ। ଦୁର୍ଗମ ଅଞ୍ଚଳର ବିକାଶ କରିବା ପାଇଁ ଅନେକ ଯୋଜନା କରିଛନ୍ତି। ଏଭଳି କି ନିର୍ବାଚନ ଆସିଲେ ସମସ୍ତ ପ୍ରକାର ପ୍ରତିଶ୍ରୁତି ମଧ୍ୟ ମିଳୁଛି। ହେଲେ ବାରମ୍ବାର ଅଭିଯୋଗ କରୁଥିଲେ ମଧ୍ୟ ପକ୍କାରାସ୍ତା ଖଣ୍ଡେ ହୋଇପାରୁନି। ଫଳରେ ବର୍ଷ ବର୍ଷ ଧରି ରାସ୍ତା ସମସ୍ୟାକୁ ନେଇ ଘାଣ୍ଟି ହେଉଛନ୍ତି ଗଜପତି ଜିଲା ମୋହନା ବ୍ଲକର ପାହାଡ଼ ପର୍ବତ ଘେରରେ ଥିବା ଗୁରିଗୁଡ଼ା ଗ୍ରାମବାସୀ। ଏହି ଗ୍ରାମ ମୋହନା ବ୍ଲକ କାର୍ଯ୍ୟାଳୟଠାରୁ ମାତ୍ର ୧୨ କିଲୋମିଟର ଦୂରରେ ଅବସ୍ଥିତ। ଗ୍ରାମରେ ପ୍ରାୟ ୫୦୦ ଆଦିବାସୀ ପରିବାର ବସବାସ କରୁଛନ୍ତି। ସେମାନଙ୍କ ମୁଖ୍ୟ ସମସ୍ୟା ରହିଛି ରାସ୍ତା। ଗ୍ରାମବାସୀ ପଞ୍ଚାୟତକୁ ଯିବା ପାଇଁ ଭଲ ରାସ୍ତା ଖଣ୍ଡେ ନାହିଁ। ଗ୍ରାମରେ ଯଦି କାହାର ସ୍ବାସ୍ଥ୍ୟ ଖରାପ ହୁଏ, ତା’ହେଲେ ଗ୍ରାମକୁ ଆମ୍ବୁଲାନ୍ସ ମଧ୍ୟ ଯାଇପାରୁନାହିଁ। ଫଳରେ ଅନେକ ସମୟରେ ଖଟିଆ କରି ବୋହି ଆଣିବାକୁ ପଡ଼ିଥାଏ। ଗ୍ରାମବାସୀଙ୍କ ଦୁଃଖ ଜିଲା ପ୍ରଶାସନର ଅଣଦେଖା ଓ ଜନପ୍ରତିନିଧିଙ୍କ ପ୍ରତିଶ୍ରୁତି ପାଣିର ଗାର ପାଲଟିଛି। ଫଳରେ ଏଭଳି ନାନା ଅସୁବିଧାର ସମ୍ମୁଖୀନ ହେଉଥିବା ହେତୁ ଗ୍ରାମର ପିଲାଠୁ ବୁଢ଼ା ଏବେ ଅଣ୍ଟା ଭିଡ଼ି ସରକାରଙ୍କୁ କଟାକ୍ଷ କଲାଭଳି ନିଜେ କୋଡ଼ି କୋଦାଳ ଧରି ଅସ୍ଥାୟୀ ରାସ୍ତା ନିର୍ମାଣ କରିଛନ୍ତି। ଅନ୍ତରବା ଗ୍ରାମ ପଞ୍ଚାୟତର ଗୁରିଗୁଡ଼ା ଗ୍ରାମରେ ଭଲ ରାସ୍ତା ଖଣ୍ଡେ ନ ଥିବାରୁ ଗ୍ରାମରେ ଶିକ୍ଷକ ମଧ୍ୟ ଯିବାଆସିବା କରିବା କଷ୍ଟ ଭୋଗୁଛନ୍ତି। ଯାହାକି ଅନେକ ସମୟରେ ଲିଖିତ ଓ ମୌଖିକ ଭାବେ ଅଭିଯୋଗ କରିଥିଲେ ମଧ୍ୟ ପକ୍କା ରାସ୍ତା ଖଣ୍ଡେ ହୋଇପାରୁନି। ଆଗାମୀ ଦିନରେ ସରକାର ଗ୍ରାମକୁ ଭଲ ରାସ୍ତା ଖଣ୍ଡେ କଲେ ଗ୍ରାମବାସୀ ଏଭଳି ଦୁର୍ଦ୍ଦଶାରୁ ମୁକ୍ତ ହେବେ ବୋଲି କହିଛନ୍ତି। ଯଦି ନ କରିବେ ବ୍ଲକ କାର୍ଯ୍ୟାଳୟ ସମ୍ମୁଖରେ ଧାରଣା ଦେବାକୁ ବାଧ୍ୟ ହେବୁ ବୋଲି ଚେତାବନୀ ଦେଇଛନ୍ତି। ଆମେ ଏ ନେଇ ମୋହନା ବିଡିଓ ତପସ୍ବିନୀ ହଁାସଦାଙ୍କୁ ପଚାରି ବୁଝିଥିଲୁ। ସେ ଏ ବାବଦରେ କୌଣସି ପ୍ରତିକ୍ରିୟା ଦେବାପାଇଁ ମନା କରିଦେଇଥିଲେ।
