ନୂଆଦିଲ୍ଲୀ,୬।୮: ମାନହାନି ମାମଲାରେ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ସୁପ୍ରିମକୋର୍ଟରୁ ଆଶ୍ୱସ୍ତି ମିଳିବା ପରେ ବିରୋଧୀ ମେଣ୍ଟ ‘ଇଣ୍ଡିଆ’ର ତୃତୀୟ ବୈଠକ ଅଗଷ୍ଟ ୩୧ ଏବଂ ସେପ୍ଟେମ୍ବର ୧ରେ ମୁମ୍ବାଇରେ କରିବା ଲାଗି ସ୍ଥିର ହୋଇଛି। କଂଗ୍ରେସ ଏବଂ ଶିବସେନା ଉଦ୍ଧବ ଠାକ୍ରେଙ୍କ ଗୋଷ୍ଠୀ ପକ୍ଷରୁ ଏହା ଘୋଷଣା କରାଯାଇଛି। ଶନିବାର ମୁମ୍ବାଇରେ ମହାବିକାଶ ଅଘାଡ଼ି ମେଣ୍ଟର ବୈଠକ ପରେ ଶିବସେନା (ୟୁବିଟି) ନେତା ସଞ୍ଜୟ ରାଉତ ଏହି ସୂଚନା ଦେଇଛନ୍ତି। ଗ୍ରାଣ୍ଡ ହୟାତରେ ହେବାକୁ ଥିବା ବିରୋଧୀ ମେଣ୍ଟ ବୈଠକରେ ରାହୁଲ ଗାନ୍ଧୀ ଏବଂ ୫ ଜଣ ମୁଖ୍ୟମନ୍ତ୍ରୀ ଯୋଗଦେବେ। ଉଦ୍ଧବ ଠାକ୍ରେ ବିରୋଧୀ ନେତାମାନଙ୍କ ପାଇଁ ୩୧ ତାରିଖ ସନ୍ଧ୍ୟାରେ ଡିନରର ଆୟୋଜନ କରୁଛନ୍ତି। ବୈଠକରେ ବହୁ ଗୁରୁତ୍ୱପୂର୍ଣ୍ଣ ପ୍ରସ୍ତାବ ଉପରେ ଆଲୋଚନା ହେବ ବୋଲି କଂଗ୍ରେସ ମହାରାଷ୍ଟ୍ର ମୁଖ୍ୟ ନାନା ପାଟୋଲେ କହିଛନ୍ତି। ଜୁନ୍ ୨୩ରେ ପାଟନାରେ ଅନୁଷ୍ଠିତ ପ୍ରଥମ ବିରୋଧୀ ମେଣ୍ଟ ବୈଠକରେ ୧୬ଟି ବିରୋଧୀ ଦଳର ନେତା ଯୋଗଦେଇଥିଲେ। ଜୁଲାଇ ୧୭-୧୮ରେ ବେଙ୍ଗାଲୁରୁଠାରେ ଅନୁଷ୍ଠିତ ଦ୍ୱିତୀୟ ବୈଠକରେ ବିରୋଧୀ ଦଳ ସଂଖ୍ୟା ୨୬କୁ ବୃଦ୍ଧି ପାଇଥିଲା। ଏହି ବୈଠକରେ ମେଣ୍ଟର ନାଁ ନ୍ୟାଶନାଲ ଡେଭେଲପମେଣ୍ଟାଲ ଇନ୍କ୍ଲୁସିଭ୍ ଆଲିଆନ୍ସ (ଇଣ୍ଡିଆ) ରଖିବାକୁ ସ୍ଥିର କରାଯାଇଥିଲା।
