ଭୁବନେଶ୍ୱର, ୧।୩(ବ୍ୟୁରୋ): କିଛିଦିନ ହେବ ରାଜ୍ୟରେ ଗ୍ରୀଷ୍ମ ପ୍ରବାହ ଜାରି ରହିଛି। ପାରଦ ଉପରମୁହାଁ ରହିଥିବାବେଳେ ଖରା ତାତି ଅସମ୍ଭାଳ ହୋଇଛି। ୩ଦିନ ଧରି ଭୁବନେଶ୍ୱର ରାଜ୍ୟର ସବୁଠୁ ଉତ୍ତପ୍ତ ସହର ପାଲଟିଥିବାବେଳେ ରବିବାର ଅନୁଗୋଳର ତାପମାତ୍ରା ସର୍ବାଧିକ ରହିଛି। ୪୦.୧ ଡିଗ୍ରୀ ସହ ୧୦ବର୍ଷର ରେକର୍ଡ ଭାଙ୍ଗିଛି ବୋଲି ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ସୂଚନା ଦିଆଯାଇଛି। ୨୦୦୬ ଫେବୃୟାରୀରେ ଅନୁଗୋଳରେ ସର୍ବାଧିକ ତାପମାତ୍ରା ୪୨.୧ ଡିଗ୍ରୀ ରେକର୍ଡ କରାଯାଇଥିଲା। ଏହାପରଠୁ ସହରରେ ତାତି କମ୍ ରହିଥିବାବେଳେ ୧୦ ବର୍ଷ ପରେ ଅର୍ଥାତ୍ ଗତ ଫେବୃୟାରୀରେ ପାରଦ ୩୯.୧ ଡିଗ୍ରୀରେ ପହଞ୍ଚତ୍ ସର୍ବାଧିକ ରେକର୍ଡ ସୃଷ୍ଟି କରିଥିଲା। ଏବେ ୪୦ ଡିଗ୍ରୀ ଅତିକ୍ରମ କରିଥିବାରୁ ସହରର ଜନଜୀବନ ଗୁରୁତର ପ୍ରଭାବିତ ହୋଇଛି।
ସେପଟେ ରାଜ୍ୟର ସବୁଠୁ ଉତ୍ତପ୍ତ ସହର ପାଲଟିଥିବା ଭୁବନେଶ୍ୱରର ରବିବାର ତାପମାତ୍ରା ୪୦ ଡିଗ୍ରୀ ରହିଥିବା ଆଞ୍ଚଳିକ ପାଣିପାଗ କେନ୍ଦ୍ର ସୂଚନା ଦେଇଛି। ଅନ୍ୟପକ୍ଷରେ ଉତ୍ତପ୍ତ ସହର ତାଲିକାରେ ଯୋଡ଼ି ହୋଇଛି ବୌଦ୍ଧ। ଭୁବନେଶ୍ୱରର ଭଳି ବୌଦ୍ଧର ତାପମାତ୍ରା ମଧ୍ୟ ୪୦ ଡିଗ୍ରୀ ରେକର୍ଡ କରାଯାଇଛି। ସେହିପରି ବାରିପଦା ୩୯.୪, କଟକ ୩୯.୨, ସମ୍ବଲପୁର ୩୮.୫, ଟିଟିଲାଗଡ଼, ବଲାଙ୍ଗୀର, ନୟାଗଡ଼ ୩୮.୪, ସୋନପୁର, ତାଳଚେର ଓ ଚାନ୍ଦବାଲି ୩୮.୨, ହୀରାକୁଦ ୩୭.୬, ଝାରସୁଗୁଡ଼ା ୩୬.୮, ମାଲକାନଗିରି, ଭବାନୀପାଟଣା ଓ ସୁନ୍ଦରଗଡ଼ ୩୬.୫, କେନ୍ଦୁଝର ୩୬, କୋରାପୁଟ ୩୫.୨, ବାଲେଶ୍ୱର ୩୫.୧ଡିଗ୍ରୀ ତାପମାତ୍ରା ରେକର୍ଡ କରାଯାଇଛି। ଚଳିତବର୍ଷ ଫେବୃୟାରୀ ଶେଷ ସପ୍ତାହରୁ ପ୍ରବଳ ଖରା ଆରମ୍ଭ ହୋଇଥିବାରୁ ଏପ୍ରିଲ ଓ ମେ’ ବେଳକୁ ତାପମାତ୍ରା ସବୁ ରେକର୍ଡ ଭାଙ୍ଗି ଦେବ ବାଲି ଆଶଙ୍କା ପ୍ରକାଶ ପାଇଛି।
