ଦାରିଙ୍ଗବାଡି, ୬।୯ (ଅରୁଣ ସାହୁ):ବିଦ୍ୟାଳୟରେ ବିଭିନ୍ନ ବର୍ଗର ଶିକ୍ଷକ ରହିଛନ୍ତି। ସେମାନେ ସମାନ କାମ କରୁଛନ୍ତି। ତେଣୁ ସମାନ କାମକୁ ସମାନ ଦରମା ଦେବାକୁ ନିଖିଳ ଉତ୍କଳ ଶିକ୍ଷକ ଫେଡେରେସନର ପୂର୍ବତନ ମହାସଚିବ ଶେଖ ଅବଦୁଲ ଖାଲିକ ଦାବି କରିଛନ୍ତି। ଏକ କାର୍ଯ୍ୟକ୍ରମରେ ମୁଖ୍ୟବକ୍ତା ଭାବେ ଯୋଗଦେବା ଅବସରରେ ଏକ ଖବରଦାତା ସମ୍ମିଳନୀରେ ପ୍ରକାଶ କରିଥିଲେ। ସେ ଆହୁରି କହିଥିଲେ, ସରକାର ନୂତନ ପେନସନ ସ୍କିମକୁ ଉଛେଦ କରି ସେହି ପୁରୁଣା ପେନସନ ସ୍କିମରେ ସମସ୍ତଙ୍କୁ ପେନସନ ଦେବା ବ୍ୟବସ୍ଥା କରନ୍ତୁ ବୋଲି ଦାବି ଉଠାଇଥିଲେ।
ଶିକ୍ଷକଙ୍କ ଦରମା ସମ୍ପର୍କରେ ସେ ଉଦବେଗ ପ୍ରକାଶ କରି ସେ କହିଥିଲେ,ଜଣେ ଗଣଶିକ୍ଷକ ସମାନ କାମ କରି ୧୦ ହଜାର ଦରମା ପାଉଥିବା ବେଳେ ଏକ୍ସ କେଡର ତାଠାରୁ ଟିକିଏ ଅଧିକା ଆଉ ନୂତନ ପେନସନ ସ୍କିମର ଶିକ୍ଷକ ଆଉ କିଛି ଅଧିକା ପାଉଥିବାବେଳେ ପୁରୁଣା ପେନସନ ସ୍କିମର ଶିକ୍ଷକ ସମସ୍ତଙ୍କଠାରୁ ଅଧିକା ଦରମା ସରକାର ଦେଉଛନ୍ତି। ତେଣୁ ସମସ୍ତଙ୍କ ଦରମା ସମାନ କରନ୍ତୁ ବୋଲି ସେ ସରକାରଙ୍କ ନିକଟରେ ଦାବି କରିଛନ୍ତି। ସେହିପରି ବିଦ୍ୟାଳୟ ଭିତ୍ତିଭୂମିର ଅଭାବ ରହିଥିବାବେଳେ ବିଦ୍ୟାଳୟରେ ଇଣ୍ଟରନେଟ ବ୍ୟବସ୍ଥା ନ ଥିବା ଶ୍ରେଣୀ କୋଠାର ଅଭାବ, ପ୍ରତି ଶ୍ରେଣୀ ପାଇଁ ଶିକ୍ଷକ ଅଭାବ, ଖେଳ ପଡିଆର ଅଭାବ, ସୁଇପର, କିରାଣୀ ଅଭାବ ଅନେକ ବିଦ୍ୟାଳୟରେ ବିଦ୍ୟୁତ ଅଭାବ ସହ ସରକାର ଶିକ୍ଷକଙ୍କ ଦ୍ୱାରା ବିଭିନ୍ନ କାର୍ଯ୍ୟ କରାଉଛନ୍ତି। କିନ୍ତୁ ତାଙ୍କୁ ମୋବାଇଲ କିମ୍ବା ଟାବଲେଟ ଦିଆଯାଉ ନ ଥିବା ସେ ଅଭିଯୋଗ କରିବା ସହ ଏତେ ସମସ୍ୟା ଭିତରେ ଶିକ୍ଷକ ମଧ୍ୟାହ୍ନ ଭୋଜନ ଦାୟିତ୍ୱଠାରୁ ସମଗ୍ର ଦାୟିତ୍ୱ ନେଉଛନ୍ତି। ଫଳରେ ଗୁଣାତ୍ମକ ଶିକ୍ଷା ପ୍ରଦାନରେ ସମସ୍ୟା ଦେଖାଯାଉଥିବା ସେ କହିଥିଲେ। ତେଣୁ ଶିକ୍ଷକ ମାନଙ୍କୁ ବିଭିନ୍ନ କାର୍ଯ୍ୟରୁ ମୁକ୍ତ କରି କେବକ ଶିକ୍ଷାଦାନ ପାଇଁ ନିୟୋଜିତ କଲେ ଶିକ୍ଷାର ମାନ ବୃଦ୍ଧି ପାଇବ ବୋଲି ସେ କହିଛନ୍ତି। ଲୋକଙ୍କ ସରକାର ନିଶ୍ଚିତ ଶିକ୍ଷକ ସମାଜର ବିକାଶ ପାଇଁ ତାଙ୍କ ଦୀର୍ଘ ବର୍ଷର ଦାବିଗୁଡିକ ପୂରଣ କରିବେ ବୋଲି ଆଶାବାଦୀ ଥିବା ସେ କହିଛନ୍ତି। ଏହି ଖବରଦାତା ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ବ୍ଲକ ପ୍ରାଥମିକ ଶିକ୍ଷକ ସଂଘର ସଭାପତି ଯାମିନୀକାନ୍ତ ପଡ୍ରା, ସାଧାରଣ ସମ୍ପାଦକ ସଂଗ୍ରାମ କୁମାର ନାୟକ, ଜିଲ୍ଲା ସମ୍ପାଦକ ବିଦୁଭୂଷଣ ନାୟକ,ରମାକାନ୍ତ ଦିଗାଲ,ମୁକୁନ୍ଦ ବଳିୟାରସିଂ, ମୋହନ ସାହୁଙ୍କ ସମେତ ବହୁ ଶିକ୍ଷକ ନେତା ଉପସ୍ଥିତ ଥିଲେ।
