ପାରାଦୀପ,୧୭ା୬(ସ୍ବ.ପ୍ର.): ସମୁଦ୍ରରେ ବହିରାଗତ ମତ୍ସ୍ୟଜୀବୀଙ୍କୁ ଯାଞ୍ଚ, ସାମୁଦ୍ରିକ ପାଟ୍ରୋଲିଂ, ଉପକୂଳ ମିଳିତ ସମରାଭ୍ୟାସ, ଅଲିଭ ରିଡ୍ଲେ କଇଁଛଙ୍କ ସୁରକ୍ଷା, ବିପଦରେ ଥିବା ମତ୍ସ୍ୟଜୀବୀଙ୍କୁ ଉଦ୍ଧାର, ଆଦି କାମ କରୁଥିବା ରାଜ୍ୟ ସରକାରଙ୍କ ମତ୍ସ୍ୟ ବିଭାଗର ଏମ୍ଏଲ୍ସି ହର୍ଷ(ମେରାଇନ ଲଞ୍ଚ ସି ହର୍ଷ) ତଥା ସମୁଦ୍ର ଘୋଡା ଗତ ୬ ବର୍ଷ ହେଲା ଅଚଳ ହୋଇଯାଇଛି। ଚଳିତ ମାସରେ ଯାଞ୍ଚ ପରେ ଉକ୍ତ ଲଞ୍ଚକୁ ସେବାନିବୃତ୍ତ କରିବାକୁ ବିଭାଗ ପକ୍ଷରୁ ଆଲୋଚନା କରାଯାଇଛି। ଏଥିସହ ପୁଣି ଏକ ନୂଆ ପାଟ୍ରୋଲିଂ ଲଞ୍ଚ ଆଣିବା ପାଇଁ ପ୍ରୟାସ ଆରମ୍ଭ ହୋଇଛି ବୋଲି ବିଶେଷ ସୂତ୍ରରୁ ଜଣାପଡ଼ିଛି।
ସୂଚନାଯୋଗ୍ୟ, ପାରାଦୀପ ମାଛଧରାବନ୍ଦରଠାରୁ ପୁରୀ ଜିଲା ଅସ୍ତରଙ୍ଗ ପର୍ଯ୍ୟନ୍ତ ଏବଂ ପାରାଦୀପଠାରୁ କେନ୍ଦ୍ରାପଡା ଜିଲା ଗହୀରମଥା ପର୍ଯ୍ୟନ୍ତ ପାଟ୍ରୋଲିଂ ପାଇଁ ମତ୍ସ୍ୟବିଭାଗ ପକ୍ଷରୁ ୨୦୦୭ରେ ଏହି ଲଞ୍ଚ ଅଣାଯାଇଥିଲା। ଏଥିପାଇଁ ପ୍ରାୟ ୧ କୋଟି ୧୦ ଲକ୍ଷ ଟଙ୍କା ବ୍ୟୟ ହୋଇଥିଲା। ପାଟ୍ରୋଲିଂ କାର୍ଯ୍ୟରେ ୭ ଜଣ କର୍ମଚାରୀ ନିୟୋଜିତ ହୋଇଥିଲେ। ଏହି ଲଞ୍ଚ ଦ୍ୱାରା ସମୁଦ୍ରରେ ବିଭିନ୍ନ ସୁରକ୍ଷା ବ୍ୟବସ୍ଥା ଯାଞ୍ଚ କରାଯାଉଥିଲା। ଉକ୍ତ ଲଞ୍ଚ ଗତ ୨୦୧୬ରୁ ଖରାପ ହୋଇ ମାଛଧରାବନ୍ଦର ପୋତାଶ୍ରୟ ଭିତରେ ରହିଛି। ଏକାଧିକ ବାର ମରାମତି ହେବା ସତ୍ତ୍ୱେ ଏହ ଚଳନକ୍ଷମ ହୋଇପାରିନାହିଁ। ସେବେଠାରୁ ମତ୍ସ୍ୟ ବିଭାଗ ଦରକାର ବେଳେ ଭଡ଼ାରେ ଲଞ୍ଚ୍ ନେଇ କାମ ଚଳାଇଛନ୍ତି। ଇତିମଧ୍ୟରେ ସି ହର୍ଷରେ କାର୍ଯ୍ୟରତ ଥିବା କର୍ମଚାରୀଙ୍କ ମଧ୍ୟରୁ ୪ ଜଣଙ୍କ ଅବସର ଓ ବଦଳି ହୋଇସାରିଛି। ଏବେବି ୩ ଜଣ କର୍ମଚାରୀ ୬ ବର୍ଷ ହେଲା ବସିଦରମା ନେଉଛନ୍ତି। ଗତ ସପ୍ତାହରେ ବିଭାଗର ପ୍ରମୁଖ ଅଧିକାରୀମାନେ ପାରାଦୀପ ଗସ୍ତରେ ଆସିଥିବା ବେଳେ ଏହି ଲଞ୍ଚକୁ ସେବାନିବୃତ୍ତ କରିବାକୁ ଆଲୋଚନା କରିଛନ୍ତି।
ଏ ସମ୍ପର୍କରେ ସାମୁଦ୍ରିକ ମତ୍ସ୍ୟ ଅଧିକାରୀ ମନୋରଞ୍ଜନ ମହାପାତ୍ରଙ୍କୁ ପଚାରିବାରେ କୁହନ୍ତି, ସି ହର୍ଷ ଲଞ୍ଚଟି ଅନେକ ଦିନ ହେଲା ଅଚଳ ହୋଇଯାଇଛି। ଉପରିସ୍ଥ ଅଧିକାରୀମାନେ ଦେଖିଯାଇଛନ୍ତି। ବିଭାଗ ପକ୍ଷରୁ ଖୁବ୍ଶୀଘ୍ର ଏନେଇ ପଦକ୍ଷେପ ନିଆଯିବ।
