ବରଗଡ଼ ଅଫିସ,୧୭ା୯: ବରଗଡ଼ ସହର ସମେତ ଜିଲାର ବିଭିନ୍ନ ସ୍ଥାନରେ ଗତ କିଛିଦିନ ହେଲା ଚୋରି, ଲୁଟ୍ କରି ଆତଙ୍କ ସୃଷ୍ଟି କରିଥିବା ଏକ ଗ୍ୟାଙ୍ଗକୁ ପୋଲିସ ଧରିବାରେ ସକ୍ଷମ ହୋଇଛି। ଗ୍ୟାଙ୍ଗର ୫ ଅଭିଯୁକ୍ତଙ୍କୁ ଗିରଫ କରାଯାଇଛି। ସେମାନେ ହେଲେ, ବରଗଡ଼ ଟାଉନ ଥାନା ଅନ୍ତର୍ଗତ ବରଗଡ଼ ଡ୍ୟାମ କଲୋନୀର ମଗଶିର ମହାନନ୍ଦ(୨୨), ରାଜା ହାତୀ ଓରଫ ଗୋଲୁ(୧୯), ପ୍ରଧାନପାଲିର କିଶୋର ମେହେର(୨୦), ରୋହିତ ମେହେର(୨୦) ଏବଂ ବିଜେ ବାଗ(୨୧) । ସେମାନଙ୍କଠାରୁ ୪ଟି ଚାରି ଚକିଆ ଗାଡ଼ି, ଗୋଟିଏ ସୁନା ଚେନ, ୧୮ଟି ମୋବାଇଲ, ୨ଟି ବାଇକ, ୨ଟି ଛୁରି, ନଗଦ ୪୮୦୦ ଟଙ୍କା ଆଦି ଜବତ ହୋଇଛି।
ଗୁରୁବାର ଜିଲା ପୋଲିସ ମୁଖ୍ୟାଳୟର ଅନୁଷ୍ଠିତ ଖବରଦାତା ସମ୍ମିଳନୀରେ ଏସପି ପଦ୍ମିନୀ ସାହୁ ଏହି ସୂଚନା ଦେବା ସହିତ ଅଭିଯୁକ୍ତମାନେ ସହର ଉପକଣ୍ଠରେ ଯାଇଥିବା ଫୋରଲେନ ଜାତୀୟ ରାଜପଥ ସମେତ ବିଭିନ୍ନ ସ୍ଥାନରେ ଲୁଟତରାଜ କରୁଥିଲେ ଏବଂ ସେମାନଙ୍କୁ ଧରିବା ପୋଲିସ ପାଇଁ ଏକ ଚ୍ୟାଲେଞ୍ଜ ହୋଇ ପଡ଼ିଥିଲା। ବରଗଡ଼ ଟାଉନ ଥାନା ପୋଲିସର ଏହା ଏକ ବଡ଼ ସଫଳତା ବୋଲି କହିଥିଲେ। ଖବରଦାତା ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ଟାଉନ ଥାନା ଆଇଆଇସି ସଦାନନ୍ଦ ପୂଜାହାରୀ, ସବ ଇନ୍ସପେକ୍ଟର ସୌମ୍ୟକାନ୍ତ ବଳିୟାର ସିଂ ପ୍ରମୁଖ ଉପସ୍ଥିତ ଥିଲେ।
